“សមុទ្ររាម” ត្រូវបានគេស្គាល់កាន់តែច្បាស់ និងទូលំទូលាយថា ជាទីកន្លែងកម្សាន្ត ខណៈដែលតំបន់ទេសចរណ៍នាឆ្នេរសមុទ្រមួយនេះ ត្រូវបានរាជរដ្ឋាភិបាលសម្រេចចាត់ជាឧទ្យានជាតិ និងជាតំបន់អភិរក្ស ដោយព្រះរាជក្រឹត្យ និងចាប់បើកដំណើរការកាលពីថ្ងៃទី01 ខែវិច្ឆិកា ឆ្នាំ1993 មកម្ល៉េះ។
ឧទ្យានជាតិ នាខេត្តព្រះសីហនុ “រាម” ស្ថិតនៅទិសនិរតីនៃព្រះរាជាណាចក្រកម្ពុជា និងលាតសន្ធឹងដាច់កន្ទុយភ្នែកគ្របដណ្តប់លើឃុំចំនួន2 គឺឃុំរាម និងឃុំឧកញ៉ា ហេង ក្នុងស្រុកព្រៃនប់ ដែលស្ថិតនៅជាប់ជួរភ្នំ ហើយក៏ជាចំណុចកណ្តាលខណ្ឌចែករវាងខេត្តព្រះសីហនុ និងតំបន់កម្សាន្តកោះថ្មីផងដែរ ដោយមានចម្ងាយប្រមាណ18គីឡូម៉ែត្រពីទីប្រជុំជនខេត្តព្រះសីហនុ និងប្រមាណជា194គីឡូម៉ែត្រពី រាជធានីភ្នំពេញ តាមបណ្តោយផ្លូវជាតិលេខ4។ ឧទ្យានជាតិ ដែលលម្អទៅដោយព្រៃដើមដូង និងបណ្តុំថ្មប៉ប្រះទឹកមួយនេះ មានផ្ទៃដីសរុប21,000ហិកតា ដែលក្នុងនោះ 6,000ហិកតាទៀតជាផ្ទៃទឹកសមុទ្រ ហើយ15,000ហិកតា ជាដីគោកតាមមាត់ឆ្នេរ ស្ថិតនៅជាប់តំបន់ជួរភ្នំក្រវ៉ាញ អមដោយកូនភ្នំតូចធំរ៉ាយប៉ាយមានរយៈកម្ពស់ចាប់ពី50ម៉ែត្ររហូតដល់280ម៉ែត្រ ដោយមានទីតាំងខាងជើងជាប់ផ្លូវជាតិលេខ4 ខាងជើងជាប់ឃុំបត់ត្រង់ ភូមិអុង និងឈូងសមុទ្រថៃ ដោយឡែកខាងលិចជាប់ឃុំបឹងតាព្រហ្ម និងឃុំអូរជ្រៅ ហើយខាងត្បូងជាប់នឹងឈូងសមុទ្រថៃ។
នៅទីនេះមានទិដ្ឋភាពដ៏អស្ចារ្យ និងស្រស់ស្អាតប្លែកៗពីគ្នា ដូចជា តំបន់ឆ្នេរខ្សាច់ដ៏ម៉ដ្ឋខៃ ឆ្នេរចំការដូង ឆ្នេរព្រែកចាក និងតំបន់ថ្មដុះ ដែលភាគច្រើនគេតែងហៅថា “ថ្មញី-ឈ្មោល” ក្រោមការបណ្តុំថ្មដុះតូចធំរដិបរដុប ដែលអាច អនុញ្ញាតឱ្យបណ្តាភ្ញៀវទេសចរនានាអង្គុយកម្សាន្តលេងយ៉ាងរីករាយ ស្រូបយកខ្យល់អាកាសល្អបរិសុទ្ធពីជំនោរនៃមាត់សមុទ្រ ជាពិសេសអាចគយគន់សម្រស់ធម្មជាតិដ៏ស្រស់ត្រកាលជុំវិញខ្លួនរហូតធ្លាយទៅដល់កោះតាគៀវ និងកោះស្រមោច រួមជាមួយនឹងកោះតូចៗផ្សេងទៀត ដែលហាក់បីដូចជាកំពុងងើបឈរនៅកណ្តាលសាគរយ៉ាងត្រជាក់ភ្នែក។ ដោយឡែក ប្រសិនបើអង្គុយលំហែ ឬឈរនៅលើឆ្នេរចំការដូងវិញ នោះគេនឹងមើលឃើញកូនកោះដ៏ស្រស់ស្អាត និងតូចច្រឡឹងគួរឱ្យទាក់ទាញមួយចំនួនទៀតដូចជា កោះក្របី កោះឫស្សី និងកោះចន្លុះជាដើម ហើយអ្វីដែលរឹតតែស្រស់ស្អាតបំផុតនោះ គឺការរង់ចាំមើលពន្លឺពណ៌មាសចាំងលើផ្ទៃទឹកសមុទ្រនាពេលសូរិយាអស្តង្គត។
ងាកមកចាប់អារម្មណ៍ជាមួយចំណីអាហារវិញគឺកាន់តែសម្បូរបែប និងពោរពេញទៅដោយរសជាតិឆ្ងាញ់ជាប់ចិត្ត ដែលភាគច្រើនច្នៃចេញពីជីវចម្រុះក្នុងសមុទ្រ ដូចជា ត្រី ក្តាម បង្គារ បង្គង ខ្យងជំពុះទា ងាវ ហើយជាពិសេស សារ៉ាយ-សមុទ្រដែលមានប្រយោជន៍ចំពោះសម្រស់ និងសុខភាព ក្រោមគំនិតច្នៃប្រឌិតរបស់ចុងភៅជំនាញប្រចាំអាហារដ្ឋាននានា ដែលស្ថិតនៅជាប់មាត់ឆ្នេរ ក៏ដូចជានៅភោជនីយដ្ឋាន ដែលមានទីតាំងស្ថិតនៅក្នុងតំបន់ឧទ្យានជាតិដ៏ល្បីឈ្មោះប្រចាំប្រទេសមួយនេះ។
ចង់ដឹងថា ឧទ្យានជាតិ រាម មានទិដ្ឋភាព និងសម្រស់ស្រស់ស្អាតដល់កម្រិតណានោះ លោកអ្នកអាចចំណាយពេលប្រមាណជាង3ម៉ោងកន្លះ ដើម្បីធ្វើដំណើរចាក់ចេញេពីរាជធានីភ្នំពេញឆ្ពោះទៅកាន់ទីនោះបាន តាមរយៈរថយន្តនៅលើផ្លូវជាតិលេខ4 ក្រាលកៅស៊ូរាបស្មើ ដោយឆ្លងកាត់តំបន់ស័ក្តិសិទ្ធិជ្រោះពិជ្រនិល ឬជ្រោះយាយម៉ៅ ដែលស្ថិតក្នុងឃុំត្រែងត្រយឹង ស្រុកភ្នំស្រួច នៃទឹកដីខេត្តកំពង់ស្ពឺផងដែរ៕
