ភ្នំពេញៈ ទំនងជាអត់ទ្រាំនឹងដំណឹងក្រុមតារាម៉ូដែលជាច្រើនដួងគ្រោងដើរចេញពីក្រុមបង្ហាញម៉ូដ Cambodia Super Model ដែលពិធីការិនីកញ្ញា ដួង ហ្សូរីដា ជាប្រធានក្រុម និងអ្នកគ្រប់គ្រងនោះ ក៏បានចេញសារប្រតិកម្មខ្លាំងបោះពាក្យសម្ដីថា «កាលមិនទាន់ល្បីរត់រក បានល្បីរត់ចេញ»។
ពីគណនីហ្វេសប៊ុកកញ្ញា បានបង្ហោះសារប្រតិកម្មយ៉ាងវែងអន្លាយថា៖ «កាលមិនទាន់ល្បី មកសុំជ្រកក្រោមដំបូលក្រុម ដំបូលក្រុមហ៊ុន មិនសូវខ្វល់ពីតម្លៃឈ្នួលការងារទេ ធ្វើម៉េចឲ្យតែបានចេញមុខក្នុងក្រុមជាមួយបងៗតារាបង្ហាញម៉ូតល្បីនៃ Cambodia Super Models ដល់តែពេលក្រុមហ៊ុនប្រូម៉ូតឲ្យឡើងល្បីបញ្ចូនឈ្មោះឲ្យធ្វើ MC តាមប៉ុស្តិ៍បញ្ចូនឈ្មោះឲ្យខាងខ្សែភាពយន្ត ដល់ពេលគេល្បី មានអ្នកខ្លះក៏នៅរក្សាធាតុដើម តែអ្នកខ្លះក៏ដុះស្លាប ហើរទៅបាត់ដោយភ្លេចកំណើត»។ កញ្ញាបានគាស់កកាយដំណើរចាប់ផ្តើមសិល្បៈរបស់កូនក្រុមថា៖ «មានអ្នកខ្លះភ្លេចគិតថា ពេលមិនទាន់ល្បី រកតែលុយជិះម៉ូតូដុបមកបើកលុយ មិនបានផង ម្តាយឈឺផង សុំឲ្យបង ហ្សូ ជួយរកការងារឲ្យធ្វើ ឲ្យតែបានលុយឲ្យម៉ែបង់ថ្លៃពេទ្យ តែដល់ឥឡូវឡើងកូដ បែរជាបំភ្លេចក្រុមហើយព្យាយាមឲ្យខ្លួនឯងលេចធ្លោតែម្នាក់ឯង ដោយការគ្រប់គ្រងរបស់ក្រុមផ្សេង»។
យ៉ាងណាប្រធានក្រុមតារាបង្ហាញម៉ូដរូបនេះ ក៏មិនភ្លេចលើកសរសើរអ្នកនៅតស៊ូជាមួយក្រុមដោយថា៖ «ក៏អរគុណដល់សមាជិកក្រុមរបស់យើងដទៃទៀតដែលនៅតែល្អនឹងគ្នាទោះបីមានគ្រួសារ មានបាន ហើយក្តី តែនៅតែរក្សាកំណើតល្អរបស់ខ្លួនដដែល»។
កញ្ញា ឌួង ហ្សូរីដា បន្តថា៖ «សួរថាកាលដែលលោក អ្នក មិនទាន់ល្បី មានអ្នកទាំងអស់ហ្នឹងគេនឹកឃើញលោកអត់? កុំប្តូរចរិតលឿនពេកណាប្រយ័ត្នធ្លាក់ក្តុកមកវិញទៅ»។ ឆ្លើយតបនឹងសារប្រតិកម្មរបស់ប្រធានក្រុមបង្ហាញម៉ូដ Cambodia Super Model កញ្ញា ឌួង ហ្សូរីដា ក៏មានអ្នកចូលរួមបញ្ចេញមតិជាច្រើន ។ ដោយពួកគេលើកឡើងថា៖ «ធម្មតាទេ អ្នកខ្លះមិនទាន់នឹងបានក្លាយជាអ្វីឲ្យអស្ចារ្យផង សម្ដីឈ្លើយភ្លេចកំណើតបាត់ទៅហើយ»។ ខណៈខ្លះទៀតសរសេរក្នុងន័យគាំទ្រប្រធានក្រុមបង្ហាញម៉ូដថា៖ «ជុងមិនដែលភ្លេចកុកទេ មេអំបៅភ្លេចខ្លួនជាដង្កូវ»។
ទន្ទឹមនឹងនេះ ក៏ឃើញមានអ្នកនាង ចន ច័ន្ទលក្ខិណា ក៏ជាសមាជិកក្នុងក្រុមបង្ហាញម៉ូដ Cambodia Super Model ដែលគ្រប់គ្រងដោយ កញ្ញា ឌួង ហ្សូរីដា នោះ ក៏លើកឡើងថា៖ «បែកតែអ្នកចង់បែក និង ចង់រកទីផ្សារខ្លួនឯងដោយមិនចង់នៅក្រោមក្រុមហ៊ុន»។ ប្រធានក្រុមបង្ហាញម៉ូដ ដែលប្រតិកម្មរឿងកូនក្រុមដើរចេញនោះ កញ្ញា ឌួង ហ្សូរីដា ក៏មិនបង្ហាញដែរពីឈ្មោះអ្នកចង់បែកពីក្រុម ប៉ុន្តែកញ្ញាប្រាប់ថា៖ «អ្វីដែលខ្ញុំលើកឡើងនោះ ក៏មិនមែនចង់ចងជើងតារាម្នាក់ណានៅក្នុងក្រុមនោះដែរ ព្រោះជាទីផ្សាររបស់គេ។ តែអ្វីដែលខ្ញុំតូចចិត្តនិងនិយាយនេះ សូមកុំឲ្យតែពួកគាត់ភ្លេចកំណើតនោះខ្ញុំទទួលយកបានហើយ»៕
