ក្រុមហ៊ុន Luxury Smile Beauty Group (Cambodia) ដែលជាក្រុមហ៊ុនផលិត និងចែកចាយផលិតផលថែក្សាសម្ផស្សប្រកបដោយគុណភាពខ្ពស់ និងដ៏មានសក្តានុពលធំនៅកម្ពុជា បានសហការផ្តល់សិទ្ធិដល់ក្រុមហ៊ុន Secret Lady ដើម្បីនាំចូល និងចែកចាយផលិតផលថែរក្សាសម្រស់ Secret Lady Soap និងផលិតផល Secret Love ពីប្រទេសថៃមកក្នុងទីផ្សារកម្ពុជា។
លោកឧកញ៉ា ចិត្រ សេរីសុភ័ក្ត្រ អគ្គនាយកក្រុមហ៊ុន Luxury Smile Group (Cambodia) បានលើកឡើងថា ដោយមើលឃើញថា ដោយសារសង្គមមានការអភិវឌ្ឍកាន់តែខ្លាំង ប្រជាជនចាប់ផ្តើមមើលឃើញពីតម្លៃនៃការរក្សាសម្ផស្សដែលធ្វើឱ្យផលិតផលថែរក្សាសម្ផស្សកំពុងអភិវឌ្ឍ និងទទួលបានការគាំទ្រយ៉ាងខ្លាំងពីប្រជាជនគ្រប់ស្រទាប់វណ្ណៈ ហេតុនេះហើយទើបក្រុមហ៊ុនរបស់លោក ដែលជាក្រុមហ៊ុនផលិត និងចែកចាយផលិតផលថែរក្សាសម្ផស្សដែលមានរោងចក្រស្របតាមស្តង់ដាខ្ពស់នៅប្រទេសថៃ បានចាប់ផ្តើមគិតគូរ និងជួយផលិតនូវផលិតផលប្រកបដោយគុណភាពខ្ពស់សុវត្ថិភាព និងស្របតាមស្តង់ដាច្បាស់លាស់ ដើម្បីផ្តល់សិទ្ធិចែកចាយបន្តដល់ក្រុមហ៊ុនក្នុងស្រុកដែលចង់អភិវឌ្ឍអាជីវកម្ម ដោយបង្កើតម៉ាកសញ្ញាផ្ទាល់ខ្លួនលើវិស័យថែរក្សាសម្ផស្ស។
លោកឧកញ៉ា ចិត្រ សេរីសុភ័ក្ត្រ បានមានប្រសាសន៍ថា៖ “ការសហការ និងការផ្តល់សិទ្ធិចែកចាយផលិតផល Secret Lady Soap ដល់ក្រុមហ៊ុន Secret Lady នៅថ្ងៃនេះ គឺជាការចូលរួមចំណែកយ៉ាងសំខាន់ក្នុងការអភិវឌ្ឍអាជីវកម្មរក្សាសម្ផស្សនេះឱ្យកាន់តែមានសក្តានុពល និងផ្តល់នូវជម្រើសប្រកបដោយគុណតម្លៃខ្ពស់សម្រាប់សុភាពបុរស និងសុភាពនារីកម្ពុជាគ្រប់រូបដែលកំពុងគិតគូរពីការរក្សាសម្រស់របស់ខ្លួន”។
សហគ្រិនវ័យក្មេងប្រកបដោយគំនិតអភិវឌ្ឍន៍ខាងលើបានលើកឡើងថា យើងសង្ឃឹមថា តាមរយៈកិច្ចសហការដ៏ល្អជាមួយក្រុមហ៊ុន Luxury Smile Beauty Group ក្រុមហ៊ុនដែលជាដៃគូរបស់យើងជាច្រើនដែលកំពុងទទួលបានសិទ្ធិនាំចូល និងចែកចាយក្នុងទីផ្សារកម្ពុជា នឹងចូលរួមចំណែកអភិវឌ្ឍអាជីវកម្មផ្នែកសម្ផស្ស ទាំងផ្ទៃមុខ និងរាងកាយឱ្យកាន់តែមានថាមពលជាវិជ្ជមាន សំដៅផ្តល់គុណភាពជីវិតកាន់តែប្រសើរ ឡើងសម្រាប់ប្រជាជនគ្រប់រូប។
លោកស្រី កែ ហេងសីហា និងលោក ជា សុផារ៉ា តំណាងឱ្យក្រុមហ៊ុន Secret Lady Co Ltd បានបញ្ជាក់ថា មូលហេតុសំខាន់ដែលលោក និងអ្នកស្រីចាប់ដៃសហការជាមួយនឹងក្រុមហ៊ុន Luxury Smile Beauty Group ដោយសារតែក្រុមហ៊ុនមួយនេះ ជាក្រុមហ៊ុនដែលមានកេរ្តិ៍ឈ្មោះល្អ និងជាក្រុមហ៊ុនដ៏ធំមួយនៅក្នុងប្រទេសថៃដែលបាននាំចូលផលិតផលប្រកបដោយគុណភាពខ្ពស់ដល់តំណាងចែកចាយ និងសាខាជាច្រើននៅកម្ពុជា។ លោកស្រី កែ ហេងសីហា បានលើកឡើងថា ក្នុងនាមក្រុមហ៊ុន Secret Lady Co Ltd ដែលបាននាំចូលផលិតផល Secret Lady Soap ជាសាប៊ូបំបាត់មុន និងបំបាត់ស្លាកស្នាមបន្សល់ពីការកើតមុន រួមទាំងបន្តឹងស្បែកមុខ និងផលិតផល Secret Love ជាឱសថបង្រួមទ្វារមាស និងកែបញ្ហារោគស្ត្រីផងនោះ មានសេចក្តីរំភើបជាខ្លាំងដោយសារតែក្នុងរយៈពេលត្រឹមតែ 2សប្តាហ៍ យើងអាចលក់ផលិតផល Secret Lady Soap បានរហូតដល់ទៅ 10,000ប្រអប់ រួមជាមួយ Secret Love រហូតដល់ 30,000ប្រអប់ក្នុងរយៈពេល 2ខែ លើសពីការរំពឹងទុករបស់ក្រុមហ៊ុន។ ភាពជោគជ័យនេះកើតឡើងដោយសារតែមានការគាំទ្រពីសំណាក់បងប្អូនប្រជាជននៅទូទាំងប្រទេស។
លោកស្រី កែ ហេងសីហា បាននិយាយថា៖ “នាងខ្ញុំសូមធានាថា ក្នុងប្រទេសកម្ពុជា ក្រុមហ៊ុនយើងខ្ញុំជាក្រុមហ៊ុនដំបូងគេដែលគិតពីសុខភាពប្រជាជន សុវត្ថិភាពនៃការប្រើប្រាស់ផលិតផល និងតម្លៃសមរម្យ។ មូលហេតុដែលធ្វើឱ្យយើងគិតគូរខ្លាំងពីបញ្ហាទាំងអស់នេះ ដោយសារនាងខ្ញុំជាឱសថការិនីម្នាក់ដែលប្រកាន់ខ្ជាប់នូវគោលជំហរ ក្រមសីលធម៌គ្រូពេទ្យក្នុងការនាំចូលនូវផលិតផលដែលមានគុណភាព ប្រសិទ្ធភាព និងសុវត្ថិភាពជូនប្រជាជន មិនចង់ឱ្យបងប្អូនចំណាយលុយឥតប្រយោជន៍ ឬប្រើប្រាស់ផលិតផលខុសនោះទេ”។
គួរបញ្ជាក់ផងដែរថា ក្រុមហ៊ុន Luxury SmileBeauty Group ជាក្រុមហ៊ុន ផ្ដល់សិទ្ធិអាជីវកម្មដ៏ធំមួយ និងជាក្រុមហ៊ុននាំចូលផលិតផលល្បីៗប្រកបដោយគុណភាពខ្ពស់នៅក្នុងទីផ្សារកម្ពុជា ហើយក៏ជាក្រុមហ៊ុនដ៏ធំមួយនៅក្នុងប្រទេសថៃ ដែលទទួលផលិតរាល់ផលិតផលថែរក្សាសម្រស់គ្រប់ប្រភេទ និងផលិតផលប្រើប្រាស់ទូទៅជាច្រើនប្រភេទទៀត ដែលមានបទពិសោធខ្ពស់ និងមានការទទួលស្គាល់យ៉ាងទូលំទូលាយពីអាជីវករ និងពាណិជ្ជករកម្ពុជា និងថៃជាច្រើនស្ថាប័ន៕
