ទីផ្សារដោះដូរកីឡាកររបស់ទ្វីបអឺរ៉ុបនឹងត្រូវបញ្ចប់នារាត្រីនេះហើយ ជុំវិញរឿងការផ្ទេរកីឡាករជម្រើសជាតិប្រេស៊ីល Neymar ចេញពីក្លិប PSG ពេលនេះក៏ឈានមកដល់ទីបញ្ចប់ដែរ។
ដោយយោងតាមប្រភពពីទស្សនាវដ្តីបាល់ទាត់របស់បារាំង L’Equipe បានឱ្យដឹងថា Neymar បានប្រាប់ក្រុមគ្រួសាររួចហើយថា រូបគេនឹងបន្តនៅក្នុងប្រទេសបារាំងតទៅទៀត ហើយក្លិបទាំង2 ដែលពាក់ព័ន្ធ(PSG និង Barcelona)ក៏បានដឹងពីការសម្រេចចិត្តចុងក្រោយនេះដែរ។
ជុំវិញរឿងផ្ទេរកីឡាកររូបនេះត្រូវបានគេដឹងថា សាមីខ្លួនពិតជាចង់ចាកចេញពីក្លិប PSG ឱ្យបាននៅក្នុងរដូវកាលនេះ ដោយមានក្លិប2 ធំៗ គឺ Bacelona និង Real Madrid ហ៊ានចូលខ្លួនចរចា ក៏ប៉ុន្តែក្លិបយក្សបារាំង PSG បានដាក់លក្ខខណ្ឌពិសេសជាច្រើន រួមជាមួយនឹងតម្លៃខ្លួនដ៏ខ្ពស់កប់ពពកដែលធ្វើឱ្យកីឡាកររូបនេះនៅតែមិនអាចចាកចេញពីក្លិបនេះបាននៅរដូវកាលនេះ៕
