ការដែលកូននិយាយតាមពាក្យសម្ដីរបស់មិត្តភក្តិដែលនៅសាលា មិត្តភក្តិដែលនៅផ្ទះជិតគ្នា មនុស្សធំ ឬសូម្បីតែតាមរឿងក្នុងទូរទស្សន៍ក្តី គឺជារឿងមួយដែលឪពុកម្តាយមិនអាចចៀសរួចឡើយ ហើយបើពាក្យសម្ដីអស់ទាំងនោះជាសម្តីដែលអាក្រក់ស្តាប់ផងនោះ តើលោកឪពុកអ្នកម្តាយត្រូវធ្វើយ៉ាងដូចម្ដេចទៅ? លេខនេះ ឡារ៉ែន មានវិធីល្អៗមកជម្រាបជូនដូចតទៅ ៖
1. ចៀសវាងការធ្វើឱ្យកូនខ្មាសគេ
គឺជារឿងសំខាន់ខ្លាំងណាស់ដែលមិនចាំបាច់ត្រូវដាក់ទោសកូនដែលនិយាយដដែលៗនូវពាក្យដែលខ្លួនគេមិនទាំងយល់ និងមិនដឹងផងថា ពាក្យនោះវាគួរនិយាយ ឬមិនគួរនិយាយនោះឡើយ។ មិនចាំបាច់សោះដែលត្រូវបន្ទោសកូន ព្រោះបើអ្នកធ្វើឱ្យកូនត្រូវនឹកខ្មាសខ្លួនឯងខ្លាំងនោះ អាចធ្វើឱ្យគេមានអារម្មណ៍ថា “បាក់មុខ” ហើយនៅថ្ងៃក្រោយបើមានអ្វីទៀត គេនឹងលាក់ទុកក្នុងចិត្ត លែងនិយាយឱ្យឪពុកម្ដាយឮ តែទៅនិយាយនៅកន្លែងផ្សេង ដែលនឹងធ្វើឱ្យប៉ះពាល់មកលើខ្លួនអ្នកជាឪពុកម្តាយទៅវិញ។ អ្នកគួរបង្កើតបរិយាកាសដែលធ្វើឱ្យកូនមានអារម្មណ៍ថា សប្បាយចិត្តចំពោះរឿងដែលអ្នកបានប្រាប់ មិនចាំបាច់ខ្លាចអ្នក ព្រោះតែរឿងដែលគេមិនដឹងនោះឡើយ។
2. ពាក្យនោះបានន័យថាម៉េច…
អធិប្បាយឱ្យកូនបានដឹងថា ពាក្យអាក្រក់ៗទាំងនោះ មិនសមរម្យយ៉ាងម៉េចយ៉ាងត្រង់ទៅត្រង់មកខ្លីៗ ងាយយល់ និងអធិប្បាយឱ្យស័ក្តិសមនឹងវ័យរបស់កូន ដើម្បីឱ្យកូនមិនបាច់លាក់ទុកក្តីសង្ស័យទៅសួរអ្នកដទៃ។ ការអធិប្បាយនឹងធ្វើឱ្យកុមារពេញចិត្តអស់ក្តីសង្ស័យ និងដឹងពីមូលហេតុថា ហេតុអីបានជាគេមិនគួរនិយាយពាក្យទាំងនោះ។
3. បានឮមកពីណា
នៅពេលសួរកូនថា ឮពាក្យនោះមកពីណា? អ្នកម្តាយគួរតែបញ្ជាក់ប្រាប់កូនឱ្យច្បាស់ថា អ្នកម្ដាយនឹងមិនទៅរករឿងអ្នកដែលនិយាយពាក្យហ្នឹងទេ គ្រាន់តែចង់ដឹងប៉ុណ្ណោះ។ បើកូនប្រាប់ថា បានឮពីពួកម៉ាកមក ក៏កុំសម្តែងទឹកមុខបែបណាឱ្យសោះ កុំទៅថាឱ្យពួកម៉ាករបស់កូនឱ្យសោះ ព្រោះជាការបំផ្លាញទំនុកចិត្តដែលកូនមានចំពោះរូបអ្នក តែគួរប្រយ័ត្នប្រភពដើមរបស់ពាក្យអាក្រក់នោះផង។
4. ហេតុអ្វីបានពាក្យអាក្រក់ៗនោះ វាមិនល្អ…
គ្រួសារនីមួយៗអាចនឹងមានហេតុផលក្នុងការហាមនិយាយពាក្យអាក្រក់ៗនោះផ្សេងៗពីគ្នា។ ចូរអធិប្បាយពីហេតុផលរបស់ក្រុមគ្រួសារអ្នកឱ្យកូនបានយល់ ដូចជាការនិយាយពាក្យអាក្រក់ៗ គឺជាការខុសនឹងសីលធម៌ចំណុចទី4 ឬការនិយាយពាក្យអាក្រក់ស្តាប់ គឺជាការឆ្លុះបញ្ចាំងពីកិរិយាមារយាទរបស់ពូជពង្សវង្សត្រកូល ឬការនិយាយពាក្យអាក្រក់ គឺជាការបញ្ចុះតម្លៃរបស់ខ្លួនឯង ឬការនិយាយពាក្យអាក្រក់ គឺជាការបង្ហាញថា មិនចេះគោរពអ្នកដទៃជាដើម។ល។
5. បើហាមហើយ នៅតែមិនស្តាប់
បើអធិប្បាយពន្យល់អស់ហើយ តែកូននៅតែនិយាយពាក្យអាក្រក់ៗទៀតនោះ ចូរធ្វើកិច្ចសន្យាទុកសម្រាប់លើកក្រោយតែម្តងថា បើនិយាយពាក្យអាក្រក់ៗទាំងនោះទៀត នឹងឈប់ឱ្យលុយទៅសាលា ឈប់ឱ្យប្រើកុំព្យូទ័រ ឬប៉ាម៉ាក់នឹងឈប់នាំទៅដើរលេងទៀតជាដើម។ល។
6. ឬបើនៅតែមិនព្រមឈប់និយាយពាក្យអាក្រក់ៗទាំងនោះទៀត
ចូររកមើលពីមូលហេតុថា តើបណ្ដាលមកពីអ្វី? កូនអាចនិយាយព្រោះតែសប្បាយមាត់ ឬដើម្បីឱ្យអ្នកឯទៀតមើលមកថា គេជាមនុស្សធំហើយ ក្លាយជាមនុស្សចាស់ហើយ និងមានអំណាច ឬនិយាយតាមមនុស្សធំដែលគេនៅជិតរាល់ថ្ងៃ ឬគេនិយាយឡើងព្រោះតែមួម៉ៅក្តៅក្រហាយ ឬមានបញ្ហាជាមួយមិត្តភក្តិនៅឯសាលាជាដើម។ នៅពេលដឹងពីមូលហេតុហើយ គួរកែបញ្ហានេះឱ្យត្រូវចំណុច និងយ៉ាងចិត្តត្រជាក់៕
