មិនគួរឱ្យជឿសោះ! កូននឹងក្លាយជាក្មេងរៀនពូកែ ប្រើប្រាស់ភាសា និងមានសម្ដីសំដៅល្អឥតខ្ចោះ ជាអ្នកអានដ៏ប៉ិនប្រសប់ ថែមទាំងចេះសម្របខ្លួនបានគ្រប់ស្ថានការណ៍ទៀតផង…សមត្ថភាពទាំងអស់នេះអាចកើតឡើងបានយ៉ាងងាយ ដោយគ្រាន់តែអាណាព្យាបាលឧស្សាហ៍នាំកូនញ៉ាំបាយពេលល្ងាចនៅក្នុងផ្ទះជុំគ្នាជាមួយលោកឪពុកអ្នកម្តាយតែប៉ុណ្ណោះ… តើអ្វីដែលរៀបរាប់មកនេះ ជារឿងពិតមែនឬ? ចាស គឺជារឿងពិត… ព្រោះលទ្ធផលនៃការសិក្សាវិភាគ 5យ៉ាងនៅក្នុងសហរដ្ឋអាមេរិក បានរកឃើញថា ៖
1. កុមារដែលចេញមកពីក្រុមគ្រួសារដែលតែងតែទទួលទានបាយជុំគ្នាជាញឹកញាប់នោះ នៅពេលធំឡើង ច្រើនតែមិនសូវមានបញ្ហារឿងជក់បារី ផឹកស្រាសេពគ្រឿងញៀនមានសម្ពន្ធភាពផ្លូវភេទមុនវ័យសមគួរ ឬកើតរោគស្រពាប់ស្រពោន គិតខ្លីរហូតដល់ចង់ធ្វើអត្តឃាតដូចកុមារដែលមិនដែលញ៉ាំបាយជុំគ្នាជាមួយឪពុកម្តាយនោះឡើយ។
2. កុមារដែលបានញ៉ាំបាយជួបជុំគ្នា ដោយមានលោកប៉ាជាអ្នកអង្គុយនៅក្បាលតុ នឹងធ្វើឱ្យក្រុមគ្រួសារមានភាពកក់ក្តៅកាន់តែខ្លាំងឡើង មានការនិយាយពិគ្រោះគ្នា ផ្តល់នូវការណែនាំពីទង្វើនៃការហូបចុកដែលល្អត្រឹមត្រូវ ធ្វើឱ្យមានសុជីវធម៌ក្នុងការបរិភោគ។ ពេលធំឡើងកុមារថែមទាំងមានសញ្ញាថាអាចនឹងក្លាយជាអ្នកអានសៀវភៅដ៏ពូកែម្នាក់ទៀតផង។
3. កុមារដែលលោកឪពុកអ្នកម្តាយបានចូលរួមទទួលទានបាយជាមួយ នឹងមានលទ្ធផលការរៀនសូត្រ និងមានជំនាញក្នុងការប្រើភាសាទំនាក់ទំនង ល្អជាងកុមារដែលមិនបានញ៉ាំបាយរួមជាមួយឪពុកម្តាយ និងថែមទាំងមិនសូវមានបញ្ហារឿងកើតរោគធាត់ ដែលបណ្តាលឱ្យមានផលប៉ះពាល់ដល់ការវិវឌ្ឍទៀតផង។
4. ពេលឈានចូលទៅរកវ័យត្រៀមជំទង់(ជិតស្ទាវ) កុមារនឹងមិនសូវមានបញ្ហារឿងសុខភាព ឬប្រថុយប្រថាននឹងទង្វើខុសប្រក្រតីខាងការហូបចុក ដូចជា មិនញ៉ាំអាហារញ៉ាំកាន់តែតិចទៅ ឬព្យាយាមសម្រកទម្ងន់ដោយប្រើថ្នាំ(ចំពោះកូនស្រី) ពឹងលើបារីដើម្បីបញ្ចុះទម្ងន់ឬក្អួតក្រោយពេលញ៉ាំបាយរួចជាដើម ព្រោះការបានទទួលទានអាហារជុំគ្នានឹងធ្វើឱ្យកើតមានការយកចិត្តទុកដាក់ក្នុងរឿងបរិភោគ អាចសង្កេតឃើញបានឆាប់រហ័ស បើកូនមានអាការខុសប្រក្រតីណាមួយ លោកឪពុកអ្នកម្តាយនឹងអាចកែបញ្ហាបានទាន់ពេលវេលា។
5. កុមារនឹងចេះសម្របខ្លួនតាមស្ថានភាពជុំវិញខ្លួនបានយ៉ាងល្អ បានឃើញភាពជាធ្លុងមួយ បាននៅជាក្រុមជុំគ្នា កុមារនឹងគិតបែបនេះរហូតដល់ធំក្លាយជាមនុស្សចាស់។ ដូច្នេះហើយទើបបងប្អូនដែលធ្លាប់អង្គុយញ៉ាំបាយរួមតុជាមួយគ្នានៅតែមានទំនាក់ទំនងនឹងគ្នា និងមានភាពជិតដិត ស្និទ្ធស្នាលនឹងគ្នារហូតដល់ពេលធំឡើងហ្នឹងឯង។
ចុះបើមិនបានទទួលទានបាយជុំគ្នាវិញនោះ..?
កុមារអាចនឹងមានបញ្ហាក្នុងការរស់នៅទាំងនៅផ្ទះ និងនៅសាលារៀន អាចចេះផឹកស្រាមុនអាយុ សេពគ្រឿងញៀន ឬអាចមានទង្វើខាងការបរិភោគដែលខុសពីប្រក្រតី ។ អ្នកស្រី បារ៍បារ៉ា ហ្វ៊ីសអ្នកវិភាគ និងជាសាស្ត្រាចារ្យនៅមហាវិទ្យាល័យអុីលលីណយស៍ បានចង្អុលបង្ហាញថា ទោះជាមិនមានពេលវេលាទទួលទានអាហារជុំគ្នាបានរាល់ថ្ងៃក៏ដោយ តែយ៉ាងហោចណាស់គួររៀបចំឱ្យបាន3ដងក្នុង 1សប្តាហ៍ដែរ សុខភាពដ៏ល្អទាំងផ្លូវកាយ និងផ្លូវចិត្តរបស់កុមារក៏អាចកើតមានឡើងបានដែរ៕
