ក្នុងរយៈពេលប៉ុន្មានឆ្នាំចុងក្រោយនេះ វិស័យអចលនទ្រព្យនៅកម្ពុជាបានរីកចម្រើនយ៉ាងខ្លាំង។ នៅរាជធានីភ្នំពេញ ខេត្តសៀមរាប ក្រុងព្រះសីហនុ ក្រុងប៉ោយប៉ែត បាវិត កែប និងតំបន់់ផ្សេងៗទៀត ត្រូវបានគេមើលឃើញពីកំណើនឥតឈប់ឈរនៃការសាងសង់ដែលកំពុងដំណើរការ ស្របពេលដែលការវិនិយោគធំៗភាគច្រើនមកពីប្រទេសចិនដែលបានជួយជំរុញឱ្យមានភាពរីកចម្រើនលើវិស័យអចលនទ្រព្យនេះ។
ជាក់ស្តែងការផ្គត់ផ្គង់ខុនដូ អាផាតមិន និងបុរីនិងលំនៅឋានបែបស៊ីវិល័យ វីឡាកូនកាត់ និងលំនៅឋានក្នុងតម្លៃសមរម្យ រួមទាំងផ្ទះល្វែងផ្សេងៗទៀតមានការកើនឡើងខ្លាំង។ ប្រជាជនកម្ពុជាកាន់តែច្រើនបានងើបចេញពីភាពក្រីក្រ ដោយសារកម្ពុជាបានក្លាយជាប្រទេសមានសេដ្ឋកិច្ចលូតលាស់លឿនបំផុតមួយនៅក្នុងតំបន់អាស៊ីអាគ្នេយ៍ ហើយតម្រូវការអចលនទ្រព្យក៏កំពុងមានកំណើនច្រើនផងដែរ។
រាជធានីភ្នំពេញមានគម្រោងអភិវឌ្ឍន៍ជាច្រើន ទាំងអគារពាណិជ្ជកម្ម ផ្សារទំនើប និងគម្រោងអភិវឌ្ឍន៍ចម្រុះ ដែលបានបញ្ចប់ការសាងសង់ក្នុងពេលថ្មីៗ កំពុងដំណើរការ និងខ្លះទៀតស្ថិតនៅក្នុងផែនការវិនិយោគសាងសង់ ពិសេសក្នុងតំបន់អភិវឌ្ឍន៍ជាយក្រុង ការវិនិយោគក៏កំពុងតែងាកទៅរកសំណង់បែបលំនៅឋាន ដោយសារចរន្តនៃតម្រូវការនឹងមិនធ្លាក់ចុះក្នុងពេលឆាប់ៗខាងមុខនេះទេ។
លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal បានមានប្រសាសន៍ប្រាប់ឡារ៉ែនពាណិជ្ជថា៖“យើងឃើញមានគម្រោងអភិវឌ្ឍន៍ចំនួន 2-3 ដែរ ទាំងគម្រោងជប៉ុនផង គឺទាក់ទងនឹងកម្រិតជីវភាពរបស់ប្រជា-ពលរដ្ឋយើង ធៀបនឹងកំណើនGDP យើងក្លាយជាប្រទេសមានចំណូលមធ្យមកម្រិតទាប និងឈានទៅជាប្រទេសអភិវឌ្ឍន៍មានចំណូលមធ្យមកម្រិតខ្ពស់ ប្រជាជនមានលទ្ធភាពវិនិយោគ មានលទ្ធភាពក្នុងការទិញផ្ទះស្នាក់នៅជាជាងគាត់ជួលផ្ទះគេស្នាក់នៅ”។
លោកឧកញ៉ា បានបញ្ជាក់ថា យើងមើលឃើញថា ការផ្គត់ផ្គង់លើលំនៅឋានតម្លៃខ្ពស់ និងតម្លៃមធ្យមទទួលបានជោគជ័យច្រើនកន្លែងច្រើនដែរហើយក៏មានការងាកមកចាប់អារម្មណ៍ និងការជ្រើសរើសសម្រាប់លំនៅឋានដែលមានតម្លៃទាប ក៏គេឃើញថា ទទួលជោគជ័យផងដែរ។លោកឧកញ៉ាក៏បានបញ្ជាក់បន្ថែមដែរថា៖“បើយើងងាកមកមើលពីលក្ខណៈសណ្ឋាននៃលំនៅឋានរបស់អតិថិជនយើងវិញ គឺនៅតែមានទំហំធំក្នុងការទិញគេហដ្ឋានដដែល ហើយគម្រោងផ្សេងទៀតក៏មានជាបន្តបន្ទាប់ដែរ ទោះបីជាមានផ្ទះក្នុងតម្លៃសមរម្យដែលជាគម្រោងរបស់រដ្ឋដែលមានតម្លៃចាប់ពី 25,000 ទៅ 30,000 ក្ដី បើធៀបទៅនឹងការបង់រំលស់ក្នុងរយៈពេល 20ឆ្នាំ គឺការបង់រំលស់របស់ពលរដ្ឋ ឬមន្ត្រីរាជការ មានលទ្ធភាពក្នុងចំនួនច្រើន”។
លោកឧកញ៉ាបានឱ្យដឹងដែរថា៖“ចំពោះលំនៅឋាន ដែលមានតម្លៃធូរថ្លៃនេះ គឺតម្លៃដែលអនុញ្ញាតនិងតម្លៃដែលអាចលក់បានសមរម្យ ទាល់តែស្ថិតនៅក្នុងកម្រិតចម្ងាយពី 20 ទៅ 30គីឡូម៉ែត្រ(តំបន់ខ្សែក្រវាត់ក្រុងទី2 និងទី3)ជាតម្លៃទាំងដីលំនៅឋាន និងទាំងហេដ្ឋារចនាសម្ព័ន្ធក៏នៅល្អ ក្រៅពីនេះ វាក៏មានទីតាំងស្ថិតនៅជិតទីប្រជុំជននៃរាជធានីភ្នំពេញ ដែលមានភាពងាយស្រួលក្នុងការធ្វើដំណើរចេញចូលទីក្រុងតាមរយៈខ្សែបណ្តាញផ្លូវធំៗ ជាច្រើនដែលស្ថិតនៅជុំវិញតំបន់នោះ”។
លោកឧកញ៉ា នួន រិទ្ធី បានបញ្ជាក់ទៀតថា៖ “តំបន់ផ្លូវជាតិលេខ3 ដែលស្ថិតនៅភាគខាងត្បូងរាជធានីភ្នំពេញ មានភាពងាយស្រួលក្នុងការអភិវឌ្ឍ ព្រោះតំបន់នេះភាគច្រើនគឺមានសណ្ឋានដីល្អ អំណោយផលដល់ការអភិវឌ្ឍ អ្វីដែលសំខាន់ និងជំរុញឱ្យអ្នកអភិវឌ្ឍន៍ជាច្រើនចាប់អារម្មណ៍ចូលទៅកាន់តំបន់នោះ។មូលហេតុចម្បងបំផុត គឺតម្លៃដីទាប ស័ក្ដិសមទៅនឹងគម្រោងលំនៅឋានកម្រិតមធ្យម និងក្រោមមធ្យមដែលកំពុងតែមានទីផ្សារខ្ពស់នាពេលបច្ចុប្បន្ននេះ”។
សូមបញ្ជាក់ថា ស្របពេលដែលគម្រោងអភិវឌ្ឍន៍វិស័យលំនៅឋានធំៗរបស់ក្រុមហ៊ុនក្នុងស្រុក ដូចជាគម្រោងបុរីពិភពថ្មី គម្រោងបុរីលឹម ឈាងហាក់ គម្រោងបុរីឡេង ណាវ៉ាត់ត្រា ដែលមានតម្លៃវិនិយោគរាប់សិបលានដុល្លារនោះ ក៏មានគម្រោងវិនិយោគ និងអភិវឌ្ឍន៍ទៅជាមណ្ឌលទេសចរណ៍ និងលំនៅឋានពីសំណាក់ក្រុមហ៊ុនថៃផងដែរ បន្ទាប់ពីមើលឃើញថា នៅតាមតំបន់ផ្លូវជាតិមួយចំនួនមានសក្ដានុពលខ្លាំង និងអាចមានឱកាសទទួលបានប្រាក់ចំណេញច្រើន។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ប្រាប់ពីភាពទាក់ទាញនៃតំបន់ផ្លូវជាតិថា ទីផ្សារលំនៅឋានពិតជាមានដំណើរការល្អប្រសើរ ខណៈអ្នកវិនិយោគធំៗនៅតែមានគម្រោង ហើយបាននិងកំពុងទិញដីនៅតាមបណ្តោយផ្លូវជាតិសំខាន់ៗជាច្រើន ដូចជាផ្លូវជាតិលេខ3 លេខ4 លេខ5 ផ្លូវជាតិលេខ2 ជាដើម។ ការចូលខ្លួនទៅវិនិយោគ និងអភិវឌ្ឍវិស័យលំនៅឋាននាពេលនេះ គឺនៅតែមានឱកាសល្អច្រើនដដែល។ លោកបញ្ជាក់ថា ជាធម្មតា ទាល់តែគេសម្លឹងឃើញពីឱកាសទទួលបានប្រយោជន៍ និងចំណេញ ទើបគេបណ្តាក់ទុនវិនិយោគ។
លោកប្រធានសមាគមបានបញ្ជាក់ទៀតថា៖ “ខ្ញុំមើលឃើញថា ទីផ្សារលំនៅឋាននៅតែមានតម្រូវការខ្ពស់ ដោយសារប្រជាជនស្រទាប់កណ្តាល ពិសេសអ្នកមានជីវភាពមធ្យមជាច្រើននៅមានកង្វះខាតលំនៅឋាននៅឡើយ។ ទីផ្សារលំនៅឋាន ពេលនេះកំពុងមានសម្ទុះខ្លាំង សម្រាប់់ផ្ទះតម្លៃមធ្យម និងក្រោមមធ្យម”។
លោកបានបន្តទៀតថា ដូចជានៅតំបន់ផ្លូវជាតិលេខ3 ពេលនេះកាន់តែមានភាពល្អប្រសើរជាងមុនជាពិសេសក្រោយពេលរដ្ឋាភិបាលបានកសាងបណ្តាញហេដ្ឋារចនាសម្ព័ន្ធ ហើយតំបន់ដែលមានចម្ងាយប្រមាណ 20 ទៅ 30គីឡូម៉ែត្រពីរាជធានីភ្នំពេញ នៅតែមានភាពល្អប្រសើរលើការវិនិយោគទាំងអស់។
លោក ច្រឹក សុខនីម បានបញ្ជាក់ថា៖ “ហេតុផលដែលអ្នកវិនិយោគសម្រុកទៅធ្វើការអភិវឌ្ឍនៅតំបន់នេះ ក៏ដោយសារតែកត្តាភូមិសាស្ត្រល្អ វិសាលភាពដីនៅទូលាយច្រើន ហើយតម្លៃដីនៅមានកម្រិតទាបដែលអំណោយផលដល់គម្រោងអភិវឌ្ឍន៍របស់ពួកគេ។ ពិសេសតម្លៃអចលនទ្រព្យនៅក្នុងតំបន់អភិវឌ្ឍន៍បំផុតនៅក្នុងប្រទេសយើង មានការកើនឡើងខ្លាំងក៏ពិតមែន ប៉ុន្តែនៅតែមានកម្រិតទាបនៅឡើយ បើប្រៀបធៀបទៅនឹងតម្លៃអចលនទ្រព្យដូចគ្នានៅក្នុងប្រទេសជិតខាង”។
ជាមួយនឹងការវិនិយោគលើអចលនទ្រព្យដែលកំពុងងាកមករកការវិនិយោគលំនៅឋាននេះលោកឧកញ៉ា លី ហួរ ក៏មានគម្រោងថ្មីមួយ មានទីតាំងស្ថិតនៅលើផ្លូវជាតិលេខ5 ដែលមានចម្ងាយប្រមាណ20គីឡូម៉ែត្រពីកណ្តាលរាជធានីភ្នំពេញដែរ។ ការវិនិយោគគម្រោងនេះនឹងធ្វើឡើងនាពេលខាងមុខ ប៉ុន្តែមិនទាន់អាចបញ្ជាក់ពីពេលវេលាជាក់លាក់ និងទុនវិនិយោគម្រោងដ៏ធំនេះថា មានទឹកប្រាក់ប៉ុន្មានលានដុល្លារអាមេរិកនៅឡើយទេ។
លោកឧកញ៉ាបានមានប្រសាសន៍ឱ្យដឹងថា៖“គម្រោងខ្ញុំនេះមានផ្ទៃដី 150ហិកតា ជាគម្រោងធំមួយ ដែលនឹងទាក់ទាញការរស់នៅរបស់ប្រជាពលរដ្ឋ ហើយអ្នករស់នៅក្នុងគម្រោងនេះនឹងមានភាពស៊ីវិល័យ និងមានអារម្មណ៍មិនចង់ចាកចេញ ដោយសារយើងនឹងរៀបចំសម្រាប់ផ្តល់ភាពស៊ីវិល័យ និងងាយស្រួលដល់ការរស់នៅ។ មានប្រមូលផ្ដុំនូវអ្វីៗគ្រប់យ៉ាង និងមានការដាំដើមឈើ ការរៀបចំជាបឹងសិប្បនិម្មិត និងគម្រោងជាច្រើនទៀតដែលផ្តល់ផាសុកភាពដល់អ្នករស់នៅ និងជួយដល់ការលើកកម្ពស់បរិស្ថានទៀតផង”។
លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal បានប្រសាសន៍ប្រាប់ឱ្យដឹងទៀតថា៖“សម្រាប់អ្នកវិនិយោគលើសំណង់លំនៅឋាន ការសង្កេតមើលពីទិដ្ឋភាពជាក់ស្ដែង និងក្នុងតំបន់ដែលចង់វិនិយោគ គឺត្រូវវិភាគទៅលើកត្តាភូមិសាស្ត្រ ប្រជាសាស្ត្រ ដើម្បីចៀសវាងការទិញផ្ទះ ហើយទុកចោលគ្មានតម្រូវការ។ ការទិញលំនៅឋានដោយកម្ចីពីធនាគារនាពេលបច្ចុប្បន្ននេះ វាជាជម្រើសដ៏ល្អ ដែលអាចជួយសម្រួលដល់អ្នកដែលមានចំណូលមធ្យម អាចមានលទ្ធភាពទិញលំនៅឋានស្នាក់នៅផ្ទាល់ខ្លួនបាន ដោយបង់ត្រឡប់ទៅធនាគារវិញក្នុងរយៈពេលរហូតដល់ 20ឆ្នាំ”។
លោកឧកញ៉ា នួន រិទ្ធី ក៏បានបញ្ជាក់ទៀតដែរថា៖“ហើយមិនថាទិញដោយការខ្ចីកម្ចីពីធនាគារ ឬដោយថវិកាផ្ទាល់ខ្លួនសុទ្ធក៏ដោយ និងដើម្បីទុកលក់យកចំណេញបន្ត ឬជួលក្ដី គឺសុទ្ធតែជាជម្រើសល្អ សំខាន់បុគ្គលដែលវិនិយោគនោះត្រូវចេះរៀបចំ និងគ្រប់គ្រងលំហូរសាច់ប្រាក់របស់ខ្លួនឱ្យបានត្រឹមត្រូវ គឺត្រូវចេះសិក្សា និងចេះវាយតម្លៃប្រកបដោយប្រសិទ្ធភាពខ្ពស់”៕
