បច្ចុប្បន្ននេះ កង្វះពលកម្មជំនាញកំពុងក្លាយជាបញ្ហាប្រឈមនៅក្នុងតំបន់ មិនមែនតែប្រទេសកម្ពុជានោះទេ ព្រោះកំណើននៃវិស័យឧស្សាហកម្ម ការវិនិយោគ និងការសាងសង់ជាដើម បានស្រូបទាញធនធានមនុស្សកាន់តែច្រើនដើម្បីបំពេញតម្រូវការទាំងអស់នោះ។
នៅកម្ពុជា យើងឃើញហើយថា យើងស្ថិតក្នុងប្រទេសដែលកំពុងមានការអភិវឌ្ឍយ៉ាងឆាប់រហ័ស ជាពិសេសប្រព័ន្ធហេដ្ឋារចនាសម្ព័ន្ធដែលគាំទ្រដល់ការវិនិយោគ ដូចជាសំណង់អគារ រោងចក្រសហគ្រាស និងវិស័យផ្សេងៗជាច្រើនទៀត។ ហើយទន្ទឹម នឹងនេះ ប្រជាជនកម្ពុជាមួយចំនួនក៏មានការចំណាកស្រុកដើម្បីធ្វើការងារក្នុងទីផ្សារពលកម្មក្នុងប្រទេសនានា ធ្វើឱ្យកម្លាំងពលកម្មនៅក្នុងស្រុកមានបញ្ហាកង្វះខាត ហេតុនេះដើម្បីឆ្លើយតបជាមួយបញ្ហានេះយើងត្រូវការកម្លាំងពលកម្មជំនាញជាច្រើនផ្សេងទៀតដើម្បីបំពេញក្នុងទីផ្សារការងារដែលកំពុងមានតម្រូវការខ្ពស់។
ឯកឧត្តម អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា កម្ពុជាបច្ចុប្បន្នកំពុងជូបនូវកង្វះខាតកម្លាំងពលកម្មដែលមានជំនាញបច្ចេកទេសវិជ្ជា និងវិជ្ជាជីវៈ ដោយសារតែការរីកចម្រើននៃវិស័យឧស្សាហកម្ម និងលំហូរនៃការ-វិនិយោគពីបរទេសកាន់តែច្រើន។ ជាដំណោះស្រាយដើម្បីផ្គត់ផ្គង់តម្រូវការការងារ កម្ពុជាបានបង្កើតគោលនយោបាយកម្មវិធីអភិវឌ្ឍន៍ និងយន្តការដោះស្រាយ បង្កើតសាលាបណ្តុះបណ្តាល និងមជ្ឈមណ្ឌលបណ្តុះបណ្តាលជាច្រើន ដើម្បីដាក់ពង្រាយនៅទូទាំងប្រទេស។ ហើយដើម្បីឱ្យការបណ្តុះបណ្តាលបច្ចេកទេស និងវិជ្ជាជីវៈ (TVET) កាន់តែជោគជ័យ រាជរដ្ឋាភិបាលត្រូវការការចូលរួមពីសំណាក់ដៃគូអភិវឌ្ឍន៍ ដៃគូវិនិយោគ អង្គការជាតិ និងអន្តរជាតិព្រមទាំងផ្នែកឯកជននានាចូលរួមដើម្បីបង្កើតសាលា និងមជ្ឈមណ្ឌលបណ្តុះបណ្តាលឱ្យកាន់តែច្រើន។
ឯកឧត្តម ពេជ សោភ័ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈបានលើកឡើងថា យើងត្រូវការធនធាន និងបច្ចេកទេសបន្ថែមទៀតដើម្បីធ្វើការបណ្តុះបណ្តាលបច្ចេកទេស និងវិជ្ជាជីវៈឱ្យកាន់តែមានប្រសិទ្ធភាព និងសក្តានុពលទូលំទូលាយ។ អ្វីដែលយើងធ្វើគឺទាក់ទាញឱ្យប្រជាជនបានយល់ពីតម្លៃនៃជំនាញទាំងអស់នេះ ដែលអាចជាប្រភពសំខាន់ក្នុងការស្វែងរកចំណូលខ្ពស់ រួមទាំងអាចធ្វើឱ្យពួកគាត់បំពេញបាននូវតម្រូវការនៅក្នុងស្រុកដែលអ្នកវិនិយោគកំពុងត្រូវការថែមទៀតផង។ ការងារបច្ចេកទេស និងវិជ្ជាជីវៈ ពេលខ្លះទទួលបានកម្រៃខ្ពស់ជាងការងារនានាព្រោះជំនាញនេះកំពុងមានតម្រូវការខ្លាំង ហើយមានមនុស្សតិចដែលចាប់ឱកាសនេះបាន។ ហេតុនេះប្រសិនបើយើងមានអ្នកជំនាញបច្ចេកទេសច្រើន នោះយើងក៏មានភាពងាយស្រួលក្នុងការអភិវឌ្ឍផងដែរ។
ឯកឧត្តម ពេជ សោភ័ន បានមានប្រសាសន៍ថា៖ “យើងបានធ្វើការផ្សព្វផ្សាយយ៉ាងទូលំទូលាយតាម-រយៈកម្មវីធីថ្នាក់ជាតិជាច្រើនដើម្បីឱ្យប្រជាជនចាប់អារម្មណ៍ និងងាកមកសិក្សាផ្នែកបច្ចេកទេស និងវិជ្ជាជីវៈ តែទន្ទឹមនឹងនេះយើងក៏ត្រូវការបង្កើតសាលាបណ្តុះបណ្តាលឱ្យបានច្រើនបន្ថែមទៀតផងដែរដើម្បីងាយស្រួលក្នុងការបណ្តុះបណ្តាលបច្ចេកទេសឱ្យបានកាន់តែច្រើន និងទូលំទូលាយ។
អ្នកជំនាញខាងការងារខាងលើបានលើកឡើងផងដែរថា ប្រសិនបើកម្មករ ឬប្រជាជនមិនមានជំនាញ អាចមានស្ថាប័នបណ្តុះបណ្តាលនៅជិត ហើយងាកមកចាប់ជំនាញបច្ចេកទេស នោះពួកគាត់នឹងអាចអភិវឌ្ឍជីវភាពបានល្អ ដែលជួយដល់រាជរដ្ឋាភិបាលក្នុងការកាត់បន្ថយភាពក្រីក្រនៅក្នុងសហគមន៍ផងដែរ។ បន្ថែមពីលើនេះ បច្ចុប្បន្ន រោងចក្រសហគ្រាស និងការតភ្ជាប់ហេដ្ឋារនាសម្ព័ន្ធដល់ទីជនបទ ដែលធ្វើឱ្យចង្វាក់ផលិតកម្មនានាក៏ចាប់ផ្តើមទៅដល់ផងដែរ ហេតុនេះប្រសិនបើប្រជាជនអាចចាប់ឱកាសនេះបាន នោះពួកគាត់នឹងទទួលបាននូវចំណូលកាន់តែច្រើន៕
