ក្នុងការលើកកម្ពស់ការងារគ្រប់គ្រងផលិតផលឱសថ និងគ្រឿងសម្អាងឱ្យបានកាន់តែប្រសើរបន្ថែមទៀត សំដៅចូលរួមចំណែកក្នុងការលើកកម្ពស់គុណភាពសេវាសុខាភិបាលក្នុងប្រទេស រដ្ឋមន្ត្រីក្រសួងសុខាភិបាលបានប្រកាសដាក់ឱ្យប្រើប្រាស់ជាផ្លូវការនូវ «ប្រព័ន្ធចុះទិដ្ឋាការ បញ្ជិកាផលិតផលឱសថតាមប្រព័ន្ធអនឡាញកម្ពុជា» (Cambodia Pharmaceutical Online Registration System “CamPORS”) ។
លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានថ្លែងថា៖«ការដាក់ឱ្យប្រើប្រាស់ប្រព័ន្ធអនឡាញនាពេលនេះ គឺដើម្បីលើកកម្ពស់ការងារគ្រប់គ្រងផលិតផលឱសថ និងគ្រឿងសម្អាងឱ្យបានកាន់តែប្រសើរបន្ថែមទៀត សំដៅចូលរួមចំណែកក្នុងការលើកកម្ពស់គុណភាពសេវាសុខាភិបាលក្នុងប្រទេស ហើយការប្រើប្រាស់ប្រព័ន្ធចុះទិដ្ឋាការបញ្ជិកាផលិតផលឱសថតាមប្រព័ន្ធអនឡាញកម្ពុជា ឬហៅថា CamPORS នេះក៏ជាកំណែទម្រង់មួយដ៏មានសារៈសំខាន់ និងជាប្រវត្តិសាស្ត្រនៃវិស័យសុខាភិបាលកម្ពុជាក្នុងការគ្រប់គ្រងផលិតផលឱសថ និងគ្រឿងសម្អាងផងដែរ។
ក្រសួងសុខាភិបាលបានដាក់ចេញនូវយន្តការគ្រប់គ្រង ត្រួតពិនិត្យ ប្រយុទ្ធប្រឆាំងឱសថ និងគ្រឿងសម្អាងក្លែងក្លាយ និងអន់គុណភាពនៅក្នុងព្រះរាជាណាចក្រកម្ពុជា ដូចជា ៖
1− សហការជាមួយស្ថាប័នមានសមត្ថកិច្ចផ្សេងៗទៀតក្នុងការចុះបង្ក្រាបករណីចែកចាយ ឬលក់ផលិតផលឱសថ និងគ្រឿងសម្អាងខុសច្បាប់។
2− ការប្រយុទ្ធប្រឆាំងការលក់ឱសថតាម online ដែលជាផលិតផលគ្មានប្រភពច្បាស់លាស់ ឬក្លែងក្លាយ គ្មានការទទួលស្គាល់ពីក្រសួងសុខាភិបាល ដែលអាចបង្កគ្រោះថ្នាក់ដល់សុខភាពរបស់ប្រជាពលរដ្ឋ។
3– ការប្រើប្រព័ន្ធអនឡាញ CamPORS និង QR Code ដើម្បីងាយស្រួលក្នុងការត្រួតពិនិត្យ។
លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានដឹកនាំក្រុមការងារអភិវឌ្ឍន៍ប្រព័ន្ធអនឡាញ CamPORS នេះ បានលើកឡើងអំពីអត្ថប្រយោជន៍នៃប្រព័ន្ធនេះថា ប្រព័ន្ធនេះនឹងជួយកាត់បន្ថយបាននូវការចំណាយ ធានាបាននូវតម្លាភាព គណនេយ្យភាព ប្រសិទ្ធភាព បង្កលក្ខណៈងាយស្រួល ឆាប់រហ័ស អាចធ្វើបានគ្រប់ពេលវេលា និងគ្រប់ទីកន្លែង ព្រមទាំងសម្រួលដល់ភ្នាក់ងារត្រួតពិនិត្យឱសថក្នុងការចុះត្រួតពិនិត្យផលិតផលឱសថ និងគ្រឿងសម្អាងលើទីផ្សារ។
លោកស្រីក៏បានបញ្ជាក់ផងដែរថា ក្រសួងសុខាភិបាលនឹងចាប់ផ្តើមអនុវត្តការប្រើប្រព័ន្ធ QR Code នៅលើវិញ្ញាបនបត្រ និងបានចេញប្រកាសរបស់ក្រសួងរួចហើយលើការបិទដាក់លើប្រអប់ផលិតផលឱសថ និងគ្រឿងសម្អាងនូវ QR Code ដើម្បីពង្រឹងការងារគ្រប់គ្រងឱសថ ឧបករណ៍បរិក្ខារពេទ្យ និងគ្រឿងសម្អាងដើម្បីងាយស្រួលក្នុងការគ្រប់គ្រង និងត្រួតពិនិត្យផលិតផលលើទីផ្សារកម្ពុជា។
លោកស្រីវេជ្ជបណ្ឌិត Li Ailan តំណាងអង្គការសុខភាពពិភពលោកប្រចាំនៅកម្ពុជា ក៏បានអបអរសាទរដល់រាជរដ្ឋាភិបាលកម្ពុជា ក៏ដូចជាក្រសួងសុខាភិបាលចំពោះការអភិវឌ្ឍប្រព័ន្ធចុះទិដ្ឋាការបញ្ជិកាផលិតផលឱសថតាមប្រព័ន្ធអនឡាញកម្ពុជាប្រកបដោយជោគជ័យនេះដែរ។ នៅតំបន់ប៉ាស៊ីហ្វិកខាងលិចនៃអង្គការសុខភាពពិភពលោក មានតែប្រទេសមួយចំនួនតូចប៉ុណ្ណោះ ដែលភាគច្រើនមានប្រាក់ចំណូលខ្ពស់មានប្រើប្រព័ន្ធអនឡាញមួយនេះ។ ដូច្នេះកម្ពុជា ជាប្រទេសមួយក្នុងចំណោមចំនួនប្រទេសចំនួនដ៏តិចតួចបំផុតដែលបានដាក់ឱ្យប្រើប្រាស់ប្រព័ន្ធអនឡាញនេះ។
លោកស្រីក៏បានបន្ថែមទៀតថា ផលិតផលឱសថមានគុណភាព គឺមិនអាចខ្វះបានសម្រាប់ការបង្ការ ការព្យាបាល និងការជួយសង្គ្រោះអាយុជីវិតមនុស្ស ដូច្នេះបទប្បញ្ញត្តិគឺចាំបាច់ ដើម្បីធានាបាននូវគុណភាព សុវត្ថិភាព និងប្រសិទ្ធភាព ។ យើងនឹងគាំទ្រដល់ការកសាងសមត្ថភាព លើកកម្ពស់បទប្បញ្ញត្តិ និងការខិតខំប្រឹងប្រែងរបស់ក្រសួងសុខាភិបាលដើម្បីលើកកម្ពស់ចំណេះដឹង និងជំនាញវិជ្ជាជីវៈក្នុងការអនុវត្តនិតិវិធីក្នុងការគ្រប់គ្រងផលិតផលឱសថឱ្យកាន់តែល្អប្រសើរឡើងថែមទៀត៕
