យោងតាមការសន្និសីទសារព័ត៌មានកាលពីថ្ងៃទី២៩ ខែកក្កដា ឆ្នាំ២០១៩ នាហាងកាហ្វេមួយកន្លែងនៅភ្នំពេញថ្មីម្សិលមិញនេះ រឿងជីវិតពិតរបស់ជនជាតិខ្មែរមួយទៀតហើយដែលត្រូវបានផលិតករអាមេរិកយកទៅផលិតចេញជាខ្សែភាពយន្តដោយត្រៀមនឹងបញ្ចប់ការថតនៅចុងឆ្នាំ២០១៩ ខាងមុខនេះហើយ។
ភាពយន្តខ្មែរទី២ បន្ទាប់ពីរឿង “មុនដំបូងខ្មែរក្រហមសម្លាប់លោកប៉ាខ្ញុំ” របស់តារាហូលីវូដអ្នកនាង អែនជេលីណា ជូលី នោះមានចំណងជើងថា “ The Donut King Ted Ngoy” ជារឿងជីវិតពិតរបស់លោក តឹក ង៉ូយ ដែលបានភៀសខ្លួនពីប្រទេសកម្ពុជាទៅរស់នៅអាមេរិកអស់រយៈពេលជាច្រើនឆ្នាំ។ នៅក្នុងវេទិកាសន្និសីតកាសែតនោះ គេឃើញផលិតករកម្ពុជា បរទេស តារាៗនិងភ្ញៀវកិត្តិយសដែលសុទ្ធសឹងជាអ្នកពាក់ព័ន្ធនឹងវិស័យភាពយន្តកុះករបានចូលរួម។
លោក តឹក ង៉ូយ បានថ្លែងបញ្ជាក់ថាក្រោយពីលោកត្រូវបាននិរទេសទៅរស់នៅសហរដ្ឋអាមេរិក លោកក៏បានបម្រើការនៅក្នុងហាងលក់នំដូណាត់ ហើយដោយការខិតខំប្រឹងប្រែងលោកក៏ត្រូវបានថៅកែប្រគល់តំណែងជាអ្នកគ្រប់គ្រងហាងនៅរយៈពេល៣ខែក្រោយ។ បន្តបន្ទាប់មក លោកក៍ប្រឹងសន្សំលុយហើយទិញបានហាងដូណាត់មកធ្វើអាជីវកម្មផ្ទាល់ខ្លួន ដោយលោកប្រើពេលតែប៉ុន្មានឆ្នាំប៉ុណ្ណោះ ក៏ពង្រីកសាខាកើនដល់៧០-៨០ទីតាំង និងបានបំផុសឱ្យខ្មែរៗកាន់តែច្រើនបើកជំនួញលក់នំដូណាត់ រហូតធ្វើឱ្យហាងនំដូណាត់រាល់ថ្ងៃគឺថៅកែជាជនជាតិខ្មែរ មិនក្រោម៨០ភាគរយ។
ដោយសារតែភាពជោគជ័យនេះ ទើបខ្សែជីវិតតស៊ូរបស់លោកត្រូវបានយកមកចងក្រងជាប្រលោមលោក ដែលមានឈ្មោះ The Donut King Ted Ngoy ជាភាសាអង់គ្លេស និងជាភាសាខ្មែរ ខណៈដែលប្រលោមលោកនេះ ក្រោយពីបោះពុម្ពលក់ ក៏ទទួលបានការគាំទ្ររហូតផលិតករមួយក្រុមនៅអាមេរិកសុំសិទ្ធិផលិតជាភាពយន្ត។ មកទល់ពេលនេះ លោកថាផលិតករបរទេសបានសិក្សាទីតាំង និងដំណើរការចេញថតបានខ្លះ២ហើយសម្រាប់ប្លង់លើទឹកដីអាមេរិក ដោយគ្រោងនឹងជ្រើសរើសតួពាក់ព័ន្ធ ហើយថតបញ្ចប់សាច់រឿងសម្រាប់ប្លង់នៅប្រទេសកម្ពុជានៅចុងឆ្នាំនេះ ដើម្បីអាចឱ្យភាពយន្តទាំងមូលអាចដាក់បញ្ចាំងលើទីផ្សារអាមេរិកបាននៅដើមឆ្នាំក្រោយ។ លោកមិនទាន់ដឹងថាភាពយន្តមួយនេះ នឹងដំណើរការដាក់បញ្ចាំងនៅទីផ្សារកម្ពុជាដូចគ្នានឹងរឿង «មុនដំបូងខ្មែរក្រហមសម្លាប់ប៉ាខ្ញុំ» ឬ យ៉ាងណានោះទេ ប៉ុន្តែយោងតាមការចចារគឺក្រោយផលិតជាភាពយន្តនឹងយកទៅបញ្ចាំងលក់សំបុត្រនៅអាមេរិក និងប្រទេសមួយចំនួន ខណៈដែលលោកប្រាប់ថា លោកដែលជាម្ចាស់សាច់រឿង ទទួលបានប្រាក់កម្រៃមួយពីលើការធ្វើអាជីវកម្មនេះ។
លោក តឹក ង៉ូយ ដែលត្រូវជនជាតិខ្មែរនៅអាមេរិកឱ្យរហស្សនាមថា ជាស្ដេចនំដូណាត់ បានបង្ហាញពីមោទនភាពយ៉ាងខ្លាំង ដែលខ្សែជីវិតរបស់លោកត្រូវបានផលិតករបរទេស យកមកផលិតជាភាពយន្តខ្នាតធំ ដែលតាមគម្រោងគឺចំណាយចន្លោះពី៥០ម៉ឺន ទៅ១លានដុល្លារ។ សាច់រឿថងក៏នឹងក្លាយជាភាពយន្តនិយាយពីជនជាតិខ្មែរ និងពីកម្ពុជាថ្មីមួយទៀត ដើម្បីបង្ហាញអោយពិភពលោកកាន់តែស្គាល់ពីកម្ពុជាផងដែរ៕
