សាធារណរដ្ឋកូរ៉េ នឹងបន្តបង្កើនកូតាសម្រាប់ពលករកម្ពុជាបន្ថែមទៀត នៅក្នុងឆ្នាំបន្តបន្ទាប់ ដោយសារតែការងារនៅសាធារណរដ្ឋកូរ៉េ បានអនុវត្តទៅយ៉ាងល្អប្រសើរ និងកិច្ចសហការល្អ រវាងប្រទេសទាំង2 កម្ពុជា-កូរ៉េ។ នេះជាការលើកឡើងរបស់លោកបណ្ឌិត KIM DONG MAN ប្រធានអង្គភាពអភិវឌ្ឍន៍ធនធានមនុស្សនៃសាធារណរដ្ឋកូរ៉េ ក្នុងជំនួបពិភាក្សាជាមួយ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី22 ខែកក្កដា ឆ្នាំ2019 ស្តីពីប្រព័ន្ធអនុគ្រោះការងារ(EPS) នៅទីស្តីការក្រសួង។
ឯកឧត្តម អ៊ិត សំហេង បានថ្លែងអំណរគុណចំពោះកិច្ចខិតខំប្រឹងប្រែងរបស់ HRD-KOREA ដែលបន្តជួយជ្រើសរើសកម្លាំងពលកម្មបរទេស ជាពិសេសបងប្អូនពលករ-ពលការិនីកម្ពុជា។ លោករដ្ឋមន្ត្រីសង្ឃឹមថា ក្នុងអាណត្តិការងាររបស់លោកបណ្ឌិត KIM DONG MAN រយៈពេល 3ឆ្នាំនេះ នឹងកាន់តែធ្វើឱ្យកិច្ចសហប្រតិបត្តិការរវាងគណៈកម្មាធិការបណ្តុះបណ្តាល និងបញ្ជូនពលករទៅបរទេស នៃក្រសួងការងារ និងបណ្តុះបណ្តាលវិជ្ជាជីវៈ(MTOSB) និងអង្គភាពអភិវឌ្ឍន៍ធនធានមនុស្សនៃក្រសួងមុខរបរ និងការងារនៃសាធារណរដ្ឋកូរ៉េ (HRD-KOREA) នឹងកាន់តែប្រសើរឡើងបន្តទៀត។
ទន្ទឹមនឹងនេះដែរ លោកប្រធានអង្គភាពអភិវឌ្ឍន៍ធនធានមនុស្សនៃសាធារណរដ្ឋកូរ៉េ ប្តេជ្ញាជំរុញនូវកិច្ចសហប្រតិបត្តិការ លើវិស័យនៃការបញ្ជូនពលករនេះឱ្យកាន់តែរឹងមាំបន្ថែមទៀត ដើម្បីបម្រើផលប្រយោជន៍ទៅវិញទៅមករវាងប្រទេសទាំង2។
ក្នុងឱកាសនោះដែរ ភាគីកូរ៉េនឹងផ្តល់ជូននូវអ្នកបច្ចេកទេស ដើម្បីជួយបណ្តុះបណ្តាលផ្នែកបច្ចេកវិទ្យាដល់ពលករកម្ពុជា ដែលកំពុងបម្រើការងារនៅសាធារណរដ្ឋកូរ៉េ ឱ្យទទួលបានជំនាញខាងបច្ចេកវិទ្យានេះកាន់តែប្រសើរ ខណៈពួកគេត្រឡប់មកស្រុកកំណើតវិញ នឹងមានជំនាញមួយច្បាស់លាស់បន្ថែមទៀត។
សូមបញ្ជាក់ថា ចាប់ពីឆ្នាំ2007មក ការប្រឡងតេស្តសមត្ថភាពកូរ៉េ(EPS-TOPIK) រៀបចំបានចំនួន 16លើកមកហើយ(លើកទី16 កំពុងអនុវត្ត) ដែលអនុវត្តដោយអង្គភាពអភិវឌ្ឍន៍ធនធានមនុស្សនៃក្រសួងមុខរបរ និងការងារនៃសាធារណរដ្ឋកូរ៉េ (HRD-Korea) រួមសហការជាមួយគណៈកម្មាធិការបណ្តុះបណ្តាល និងបញ្ជូនពលករទៅបរទេស(MTOSB) ដែលមានបេក្ខជនដាក់ពាក្យសុំសិទ្ធិប្រឡងសរុបចំនួន 434,054នាក់ ហើយបេក្ខជនប្រឡងជាប់សរុបចំនួន 89,393នាក់។
ចាប់ពីឆ្នាំ2018 ការជ្រើសរើសបេក្ខជនដើម្បីដាក់ពាក្យសុំស្វែងរកការងារធ្វើនៅសាធារណរដ្ឋកូរ៉េក្រោមប្រព័ន្ធ EPS ដោយផ្អែកលើកត្តា 3យ៉ាងជាចាំបាច់៖ ទី1-តេស្តភាសាកូរ៉េ EPS-TOPIK តាមប្រព័ន្ធកុំព្យូទ័រ។ ទី2-តេស្តជំនាញ និងទី3-ការវាយតម្លៃសមត្ថភាព។
មានន័យថា បេក្ខជនដែលប្រឡងជាប់តេស្តសមត្ថភាពកូរ៉េ ត្រូវប្រឡងជាប់តេស្តជំនាញ និងការវាយតម្លៃសមត្ថភាព ទើបក្លាយជាបេក្ខជនជាប់ជាស្ថាពរ មានសិទ្ធិដាក់ពាក្យសុំស្វែងរកការងារធ្វើនៅសាធារណរដ្ឋកូរ៉េ(ដែលកន្លងមក បេក្ខជនប្រឡងជាប់តេស្តសមត្ថភាពកូរ៉េ គឺអាចដាក់ពាក្យសុំស្វែងរកការងារធ្វើនៅសាធារណរដ្ឋកូរ៉េបានតែម្តង)។
បច្ចុប្បន្នកម្ពុជាជាប់ចំណាត់ថ្នាក់លេខ4 សម្រាប់រយៈពេលនៃការបញ្ជូននេះ តែបើធៀបជាមួយប្រទេសធំៗវិញ កម្ពុជាទទួលបានចំណាត់ថ្នាក់លេខ1។ ពោលគឺកម្ពុជាទទួលបានចំណាត់ថ្នាក់លេខ1 ដែលបានបញ្ជូនពលករច្រើនជាងគេក្នុងចំណោម 16ប្រទេស ក្នុងឆ្នាំ2019នេះ (លេខ2 ប្រទេសនេប៉ាល់ លេខ3 វៀតណាម លេខ4 ឥណ្ឌូនេស៊ី និងលេខ5 ប្រទេសថៃ)៕