នៅកម្ពុជា មានមុខរបរជាច្រើនសុទ្ធតែជាមុខរបរដែលត្រូវបានគេមើលរំលង ខណៈអាជីពទាំងអស់នោះកំពុងមានតម្រូវការទីផ្សារខ្ពស់ និងអាចជាប្រភពចំណូលដ៏ល្អថែមទៀតផង។ មុខរបរតូចៗមួយចំនួននៅតាមសហគមន៍ រួមទាំងមុខរបរក្នុងវិស័យកសិកម្មមួយចំនួនទៀត សុទ្ធតែជា មុខរបរដែលមានលំនឹងល្អហើយថែមទាំងអាចជួយដោះស្រាយបញ្ហារបស់ប្រជាជនបានច្រើនទៀតផង តែគួរឱ្យសោកស្តាយ ដែលសិស្ស និស្សិតជាច្រើនមិនសូវចាប់អារម្មណ៍បើទោះបីជាស្ថាប័នពាក់ព័ន្ធខិតខំបណ្តុះបណ្តាលយ៉ាងណាក្ដី។
កាលពីពេលថ្មីៗនេះ ដើម្បីជំរុញឱ្យការបណ្តុះបណ្តាលបច្ចេកទេស និងវិជ្ជាជីវៈកាន់តែមានសក្តានុពលខ្លាំងឡើង ក្រសួងការងារ និងបណ្តុះបណ្តាលវិជ្ជាជីវៈ បានដាក់ឱ្យអនុវត្តកញ្ចប់ស្តង់ដាបណ្តុះបណ្តាលលើមុខវិជ្ជាបន្ស៊ីលោហៈ មុខរបរផលិតនំ និងមុខរបរកែច្នៃបន្លែ និងផ្លែឈើ កម្រិត3 និងកម្រិត4 ដល់ប្រជាជនខ្មែរដែលចង់ចាប់យកអាជីពទាំងអស់នេះ ឬដើម្បីទទួលស្គាល់ និងបណ្តុះបណ្តាលបន្ថែមចំពោះអ្នកដែលកំពុងប្រកបរបរនេះស្រាប់ ដែលមានបំណងចង់អភិវឌ្ឍខ្លួនបន្ថែម។
ឯកឧត្តម ពេជ សោភ័ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថាកញ្ចប់ស្តង់ដាបណ្តុះបណ្តាលលើមុខវិជ្ជាបន្ស៊ីលោហៈ មុខរបរផលិតនំ និងមុខរបរកែច្នៃបន្លែ និងផ្លែឈើនេះ នឹងក្លាយជាចំណុចវិជ្ជមានមួយសម្រាប់អ្នកសិក្សា និងប្រកបមុខរបរនេះ។ សម្រាប់សាធារណជនដែលធ្លាប់សិក្សានៅសាលាចំណេះទូទៅ ឬមានសមត្ថភាពជំនាញខ្លះៗ ឬមានបទពិសោធការងារប្រតិបត្តិជាក់ស្តែងនានា មិនថានៅទីណា ឬពេលណាក៏ដោយ ពោលគឺ អ្នកទាំងអស់នោះអាចសុំធ្វើតេស្តសមត្ថភាពដើម្បីទទួលបានការទទួលស្គាល់ពីកម្រិតសមត្ថភាពជាក់ស្តែង ឬសុំធ្វើការទទួលស្គាល់ការសិក្សាដែលខ្លួនធ្លាប់មានពីមុន និងការទទួលស្គាល់សមត្ថភាពបច្ចុប្បន្ន (RPL/RCC)។ ក្រៅពីទទួលបានការទទួលស្គាល់ដើម្បីយកទៅប្រើប្រាស់ក្នុងអាជីវកម្ម ឬការងារហើយ អ្នកទាំងអស់នោះក៏អាចធ្វើការស្នើសុំសិក្សាបន្ថែមទៅតាមកម្រិតសមត្ថភាពរៀងៗខ្លួនផងដែរ។
ឯកឧត្តម ពេជ សោភ័ន មានប្រសាសន៍ថា៖ “ការដាក់ចេញនូវកញ្ចប់ស្តង់ដាបណ្តុះបណ្តាលនេះ ជាឱកាសដ៏ល្អសម្រាប់សាធារណជន ដែលអាចទទួលបាននូវវិញ្ញាបនបត្រវិជ្ជាជីវៈ ឬសញ្ញាបត្រកម្រិតខ្ពស់ជាងនេះ ដែលទទួលស្គាល់ដោយថ្នាក់ជាតិ តាមក្របខណ្ឌគុណវុឌ្ឍិជាតិកម្ពុជា (CQF) ដើម្បីបញ្ជាក់ពីគុណវុឌ្ឍិការងារនៅកម្ពុជា និងនៅក្នុងតំបន់”។
ឯកឧត្តមរដ្ឋលេខាធិការ បានបន្ថែមថា គម្រោងដាក់ឱ្យអនុវត្តកញ្ចប់ស្តង់ដាបណ្តុះបណ្តាលលើមុខវិជ្ជាបន្ស៊ីលោហៈ មុខរបរផលិតនំ និងមុខរបរកែច្នៃបន្លែ និងផ្លែឈើ កម្រិត3 និងកម្រិត4 នេះនឹងដាក់ឱ្យអនុវត្តសាកល្បង មុននឹងដាក់ឱ្យគណៈកម្មការជាតិបណ្តុះបណ្តាល (NTB) អនុម័ត និងសម្រេចឱ្យប្រើប្រាស់ជាផ្លូវការនៅពេលខាងមុខ។ គម្រោងនេះអាចនឹងឈានទៅដល់ទិសដៅល្អមួយដែលសម្រេចបាននូវផែនការសកម្មភាពយុទ្ធសាស្ត្រសម្រាប់ការអនុវត្តនាពេលអនាគត ហើយសមាជិកគ្រប់រូប នឹងជួយអនុវត្តសកម្មភាពនានាដើម្បីគាំទ្របន្តទៀត។
ឯកឧត្តម ហឹង ស៊ីដេត អគ្គនាយកនៃអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ បានលើកឡើងថា ការដាក់ឱ្យមានគម្រោងអនុវត្តន៍ស្តង់ដាបណ្តុះបណ្តាលលើមុខរបរការបន្ស៊ីលោហៈ មុខរបរការផលិតនំ និងមុខរបរកែច្នៃបន្លែ និងផ្លែឈើនេះ គឺដោយសារមើលឃើញពីតម្រូវការនៃការអភិវឌ្ឍដែលកំពុងប្រែក្លាយពីការពឹងផ្អែកលើវិស័យកសិកម្ម ទៅជាឧស្សាហកម្ម។ ក្រៅពីនេះយើងក៏មានបំណងលើកទឹកចិត្តដល់វិទ្យាស្ថានបណ្តុះបណ្តាលទាំងអស់ឱ្យយល់ពីស្តង់ដាបណ្តុះបណ្តាលទៅលើមុខរបរទាំងអស់នេះ ឱ្យស្របទៅតាមកម្រិតជាតិ និងតំបន់ ដើម្បីអភិវឌ្ឍធនធានមនុស្សឱ្យឆ្លើយតបជាមួយនឹងតម្រូវការជាក់ស្តែង៕