ដំបូងឡើយមានលេចឮព័ត៌មានដែលគួរឱ្យពិចារណាបានកើតឡើងរវាងតារាបង្ហាញម៉ូដ Kim Kardashian ជាមួយក្រុមអ្នកគាំទ្រផលិតផលរបស់នាង ដោយការបង្ហោះរូបភាពផ្សាយពាណិជ្ជកម្មផលិតផលគ្រឿងសម្អាងម៉ាកល្បីៗ KKW BEAUTY ក្នុងការផាត់មុខប្ដូរព័ណ៌ស្បែក ធ្វើឱ្យបណ្ដាអតិថិជនរបស់នាងមួយចំនួនធំមិនពេញចិត្ត ហើយតារាស្រីខាងលើក៏បានតបវិញថា នឹងធ្វើការផ្លាស់ប្ដូរ កែតម្រូវឱ្យបានល្អប្រសើរឡើងវិញ។
ជាលើកដំបូងហើយដែលតារាបង្ហាញម៉ូដត្រគៀកធំរូបនេះ បានដាក់ផលិតផលលក់នៅលើបណ្ដាញសង្គមអនឡាញ ហើយក៏ជាថ្ងៃដំបូងដែរដែលហាក់បីដូចជា មិនសម្រេចតាមគម្រោងការលក់របស់នាង ព្រោះគ្រឿងសម្អាងជាង3សែនប្រភេទរបស់នាង ត្រូវបានស្រីៗជាច្រើនរិះគន់ថា មានតម្លៃថ្លៃពេក រហូតដល់ធ្វើឱ្យ Kim Kardashian សម្រេចលក់ផលិតផល Sold Out លក្ខណៈទ្រង់ទ្រាយធំ ដែលជាការសងសឹកទៅកាន់ពួកស្រីៗទាំងនោះឱ្យមកតម្រង់ជួរគ្នាទិញផលិតផលរបស់នាងជាច្រើនខ្សែ។
គួរបញ្ជាក់ផងដែរថា តារាស្រីរូបនេះបានទម្លាក់តម្លៃគ្រឿងសម្អាងមកត្រឹម 48ដុល្លារក្នុងមួយប្រភេទ ដែលបានធ្វើឱ្យនាងរងការខាតបង់ពីការលក់នេះរហូតដល់ 14.4លានដុល្លារ តែទោះបីយ៉ាងណា ការងារនេះបែរជាធ្វើឱ្យនាងសប្បាយចិត្ត និងមានស្នាមញញឹមទៅវិញ ព្រោះគ្រឿងសម្អាងរបស់នាងបានល្បីឡើងវិញ ហើយអាចប្រកួតប្រជែងជាមួយគ្រឿងសម្អាងម៉ាក KYLIE របស់តារាបង្ហាញម៉ូដ Kylie Jenner បានទៀតផង៕
