កម្ពុជាបានប្រកាសដាក់ឱ្យប្រើប្រាស់ជាផ្លូវការនូវកម្មវិធីនៅលើទូរស័ព្ទដៃឆ្លាតវៃ ឬហៅថា Mobile Application (App) ថ្មីជាលើកដំបូងដែលមានឈ្មោះថា «Kingdom of wonder» ដើម្បីផ្សព្វផ្សាយពីគោលដៅទេសចរណ៍របស់ខ្លួនតាមរយៈប្រព័ន្ធឌីជីថលទៅកាន់ទីផ្សារទេសចរណ៍ពិភពលោកឱ្យកាន់តែខ្លាំងក្លាថែមទៀត។
ការប្រកាសដាក់ឱ្យប្រើប្រាស់Appថ្មីនេះ ត្រូវបានធ្វើឡើងក្នុងសិក្ខាសាលាស្ដីពីការផ្សព្វផ្សាយគោលដៅទេសចរណ៍កម្ពុជាតាមប្រព័ន្ធឌីជីថល និងការប្រកាសឱ្យប្រើប្រាស់ជាផ្លូវការនូវកម្មវិធីលើទូរស័ព្ទ «Kingdom of wonder» កាលពីព្រឹកថ្ងៃទី16 ខែកក្កដា ឆ្នាំ2019 នៅសណ្ឋាគារសុខា ខេត្តសៀមរាប ។
ឯកឧត្តម គុជ បញ្ញាសា អនុរដ្ឋលេខាធិការ ក្រសួងទេសចរណ៍បានមានប្រសាសន៍ឱ្យដឹងថា គោលបំណងនៃសិក្ខាសាលា គឺដើម្បីបង្កើនការយល់ដឹង និងចែករំលែកបទពិសោធដល់ភាគីពាក់ព័ន្ធក្នុងវិស័យទេសចរណ៍ ស្តីពីការប្រើប្រាស់ប្រព័ន្ធឌីជីថល ក្នុងការផ្សព្វផ្សាយគោលដៅទេសចរណ៍ ក៏ដូចជាការប្រែក្លាយសេវាកម្មនានាក្នុងវិស័យទេសចរណ៍ឱ្យកាន់តែមានភាពទាក់ទាញ និងមានប្រសិទ្ធភាពខ្ពស់ ស្របតាមនិន្នាការថ្មីនៃសកលលោកនាយុគសម័យបដិវត្តន៍ឧស្សាហកម្ម4.0។
ឯកឧត្តមបានបន្តឱ្យដឹងថា ដូច្នេះហើយបានជាក្រសួងទេសចរណ៍កម្ពុជាបានរៀបចំឱ្យមាន កម្មវិធីនៅលើទូរស័ព្ទដៃឆ្លាតវៃ «Kingdom of Wonder» នេះឡើង ដើម្បីដាក់ឱ្យទេសចរជាតិ-អន្តរជាតិទាញយក (Download) ក្នុងប្រព័ន្ធប្រតិបត្តិការ IOS (App Store) និងក្នុងប្រព័ន្ធប្រតិបត្តិការ Android (Play Store) ដោយឥតគិតថ្លៃ។
ដោយហេតុថា និន្នាការនៃការប្រើប្រាស់ប្រព័ន្ធឌីជីថលទទួលបានការពេញនិយមកាន់តែច្រើនពីសំណាក់ប្រជាជនក៏ដូចជាអ្នកទេសចរជុំវិញពិភពលោក ដោយគិតត្រឹមឆ្នាំ2018 មានអ្នកប្រើប្រាស់រហូតដល់ 4.1ពាន់លាននាក់ ក្នុងនោះ Facebook មានអ្នកប្រើប្រាស់ចំនួន 2.32ពាន់លាននាក់ និង YouTube មានអ្នកប្រើប្រាស់ចំនួន 1.8ពាន់លាននាក់។
ឯកឧត្តមអនុរដ្ឋលេខាធិការនៃក្រសួងទេសចរណ៍បានឱ្យដឹងទៀតថា កម្មវិធីទូរស័ព្ទដៃឆ្លាតវៃ «Kingdom of Wonder» គឺជាបណ្តុំព័ត៌មានទេសចរណ៍សំខាន់ៗរបស់កម្ពុជា ដែលរួមមាន គោលដៅទេសចរណ៍ ព្រឹត្តិការណ៍ទេសចរណ៍ ផែនទីទេសចរណ៍ ជើងហោះហើរ អាកាសធាតុ ភោជនីយដ្ឋាន កន្លែងស្នាក់នៅ មធ្យោបាយធ្វើដំណើរក្នុងស្រុក និងព័ត៌មានសំខាន់ៗដទៃទៀតដែលផ្តល់ភាពងាយស្រួលក្នុងការស្វែងរកព័ត៌មាន និងគ្រប់ជ្រុងជ្រោយសម្រាប់ភ្ញៀវទេសចរដែលមានបំណងមកទស្សនាប្រទេសកម្ពុជា ទាំងពេលបច្ចុប្បន្ន និងទៅអនាគត។
ឯកឧត្តម បានស្នើដល់គ្រប់ភាគីពាក់ព័ន្ធ ក៏ដូចជាផ្នែកឯកជនក្នុងវិស័យទេសចរណ៍ឱ្យចូលរួមផ្សព្វផ្សាយដល់បណ្តាញ និងអតិថិជនរបស់ខ្លួនឱ្យបានកាន់តែទូលំទូលាយ និងត្រៀមខ្លួនចាប់យកឱកាសទាញយកប្រយោជន៍ពីប្រព័ន្ធឌីជីថលឱ្យបានច្រើនតាមដែលអាចធ្វើបាន ជាពិសេសប្រែក្លាយសេវាកម្មក្នុងអាជីវកម្មរបស់ខ្លួនឱ្យស្របតាមនិន្នាការថ្មីនៃសកលលោក។
បើយោងតាមការឱ្យដឹងពីមន្រ្តីជាន់ខ្ពស់ក្រសួងទេសចរណ៍រូបនោះថា ក្នុងឆ្នាំ2018 កន្លងមក កម្ពុជាទទួលបានភ្ញៀវទេសចរអន្តរជាតិ 6.2លាននាក់ ក្នុងកំណើន10.7% និងនៅក្នុងត្រីមាសទី1 ដើមឆ្នាំ2019 កម្ពុជាទទួលបានភ្ញៀវទេសចរអន្តរជាតិ 1,870,000នាក់ កើនឡើង9.7%។
តាមរយៈកម្មវិធីទូរស័ព្ទឆ្លាតវៃខាងលើ ក្រសួងទេសចរណ៍សង្ឃឹមថា ភ្ញៀវទេសចរជាតិ-អន្តរជាតិ និងក្រុមហ៊ុនទេសចរណ៍ទាំងអស់នឹងមានភាពងាយស្រួលក្នុងការស្វែងរកព័ត៌មានទេសចរណ៍ ដើម្បីសម្រេចបាននូវកំណើនទេសចរអន្តរជាតិ 6.6លាននាក់ក្នុងឆ្នាំ2019 និងជាង 7លាននាក់នៅឆ្នាំ2020៕
