ធនាគារ អេស៊ីលីដា ភីអិលស៊ី និងក្រុមហ៊ុន លី ហួរផេប្រ៉ូ ភីអុិលស៊ី(លី ហួរ វេរលុយ) បានប្រកាសជាផ្លូវការនូវភាពជាដៃគូផ្តល់សេវាផ្ទេរប្រាក់ និងទូទាត់ប្រាក់ទូទាំងប្រទេសដើម្បីដាក់ឱ្យដំណើរការនូវសេវា ដាក់ និងដកប្រាក់រវាងគណនីធនាគារ អេស៊ីលីដា ភីអិលស៊ី និងបណ្តាញភ្នាក់ងារ លី ហួរ វេរលុយ។ ឥឡូវនេះ អតិថិជនដែលមានកាតឥណទាន និងគណនីធនាគាររបស់ធនាគារ អេស៊ីលីដា ភីអិលស៊ី អាចធ្វើការដាក់ និងដកប្រាក់នៅតាមភ្នាក់ងារ លី ហួរ វេរលុយ ជាង 4,500កន្លែងទូទាំងប្រទេស។
ការដាក់ឱ្យដំណើរការនូវសេវាទាំង2នេះ នឹងជួយសម្រួលទម្លាប់ជាទូទៅរបស់អតិថិជនធនាគារ អេស៊ីលីដា ភីអិលស៊ី ដែលគាត់ត្រូវធ្វើដំណើរទៅកាន់ទីស្នាក់ការសាខារបស់ធនាគារ អេស៊ីលីដា ភីអិលស៊ី ដើម្បីធ្វើប្រតិបត្តិការដក និងដាក់ប្រាក់ជំនួសដោយការមកប្រើសេវាតាមភ្នាក់ងារ លី ហួរវេរលុយ ដែលនៅក្បែរផ្ទះរបស់គាត់។ ភាពងាយស្រួលនេះ នឹងជួយឱ្យគាត់ចំណេញពេលវេលាដែលអាចបង្កើនចំណូលប្រចាំថ្ងៃរបស់ពួកគាត់ក្នុងការ-ប្រើប្រាស់សេវាតាមភ្នាក់ងារលី ហួរ វេរលុយ ដែលមានដូចជា ផ្ទេរប្រាក់ ដាក់ប្រាក់សន្សំ បើកប្រាក់ខែ បង់ប្រាក់សងកម្ចីប្រចាំខែរបស់ពួកគាត់។
លោកឧកញ៉ា លី ហួរ ប្រធាននាយកប្រតិបត្តិ ក្រុមហ៊ុន លី ហួរ គ្រុប បានលើកឡើងថា ការសហការនេះគោលបំណងរួម គឺផ្តល់នូវភាពងាយស្រួល រហ័សទាន់ចិត្ត មានសុវត្ថិភាព និងសន្សំសំចៃពេលវេលាដល់ប្រជាពលរដ្ឋខ្មែរដែលជាអតិថិជនរបស់ធនាគារ អេស៊ីលីដា ភីអិលស៊ី ដោយឱ្យ ពួកគាត់អាចប្រើប្រាស់សេវាហិរញ្ញវត្ថុមួយចំនួនតាមរយៈភ្នាក់ងារ លី ហួរ វេរលុយដែលមាននៅទូទាំងប្រទេសកម្ពុជា។
លោកឧកញ៉ា លី ហួរ មានប្រសាសន៍ថា៖ “ការចាប់ផ្តើមនេះនឹងធ្វើឱ្យយើងឈានដល់ដំណាក់កាលមួយទៀតក្នុងបេសកម្មរបស់យើងដើម្បីពង្រីកវិសាលភាពក្នុងវិស័យហិរញ្ញវិត្ថុ លើកស្ទួយជីវភាពប្រជាពលរដ្ឋ និងផ្តល់នូវភាពងាយស្រួលដល់ពួកគាត់ មិនថាក្នុងការធ្វើប្រតិបត្តិការសេវាហិរញ្ញវត្ថុប្រចាំថ្ងៃ ការបង្វិលប្រាក់សម្រាប់ការសម្រេចចិត្តធ្វើការវិនិយោគក្នុងរយៈពេលវែង ការដាក់ ឬដកប្រាក់បញ្ញើជាសាច់ប្រាក់ភ្លាមៗ និងការផ្ដល់ជូននូវលទ្ធភាពជាច្រើនផ្សេងទៀត”។
បណ្ឌិត អុិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានលើកឡើងថា ធនាគារ អេស៊ីលីដា ភីអិលស៊ី មានសេចក្តីសោមនស្សរីករាយ ដែលក្រុមហ៊ុន លី ហួរ ផេប្រ៉ូ ភីអិលស៊ី បានចាប់ដៃគូយុទ្ធសាស្ត្រ សហប្រតិបត្តិការជាមួយធនាគារ អេស៊ីលីដា ភីអិលស៊ី ក្នុងការបម្រើសេវាកម្មរបស់ស្ថាប័នទាំងពីរឱ្យរឹងរឹតតែទូលំទូលាយថែមទៀត ក្នុងការប្រើប្រាស់បច្ចេកវិទ្យាហិរញ្ញវត្ថុ (FinTech) ក្នុងវិស័យធនាគារ និងហិរញ្ញវត្ថុ ដើម្បីលើកកម្ពស់ក្នុងការពង្រីកប្រតិបត្តិការធនាគារឱ្យកាន់តែទំនើប ប្រកបដោយប្រសិទ្ធភាព និងសុវត្ថិភាពថែមទៀត។ បច្ចុប្បន្ន ធនាគារ អេស៊ីលីដា ភីអិលស៊ី មានបណ្តាញម៉ាស៊ីនអេធីអឹមធំជាងគេចំនួន 577គ្រឿង គ្រប់ខេត្ត និងរាជធានី ទូទាំងប្រទេសកម្ពុជា ទាំងនៅក្នុងការិយាល័យ ធនាគារ អេស៊ីលីដា ភីអិលស៊ី និងនៅតាមផ្សារទំនើប សាកលវិទ្យាល័យ សណ្ឋាគារ ក្រុមហ៊ុននានា។ ចំពោះម៉ាស៊ីនឆូតកាតអេស៊ីលីដា មានចំនួនជាង 4,000 គ្រឿង ព្រមទាំងអតិថិជនដែលកំពុងប្រើប្រាស់អេស៊ីលីដាយូនីធីទាន់ចិត្តមានចំនួនច្រើនជាង 900,000នាក់។ ទន្ទឹមនឹងនេះ កិច្ចសហប្រតិបត្តិការរវាងក្រុមហ៊ុនទាំង2 គឺក្នុងគោលបំណងដើម្បីបង្កើនភាពងាយស្រួលជូនដល់អតិថិជនក្នុងការធ្វើប្រតិបត្តិការ ដូចជាទី1 ផ្ទេរប្រាក់ រវាងគណនី Core Banking របស់ធនាគារ អេស៊ីលីដា ភីអិលស៊ី និងគណនី E-Wallet របស់គ្រឹះស្ថាន លី ហួរ ផេ ប្រ៉ូ ភីអិលស៊ី។ ទី2 ផ្ទេរប្រាក់ រវាងគណនីអេស៊ីលីដាយូនីធីទាន់ចិត្ត និងគណនី E-Wallet របស់គ្រឹះស្ថាន លី ហួរ ផេ ប្រ៉ូ ភីអិលស៊ី។ ទី3ដកប្រាក់ពីគណនី E-Wallet របស់គ្រឹះស្ថាន លី ហួរ ផេ ប្រ៉ូភីអិលស៊ី តាមរយៈម៉ាស៊ីន អេ ធី អឹម របស់ធនាគារអេស៊ីលីដា ភីអិលស៊ី ដោយមិនប្រើកាត និងសេវាផ្សេងៗទៀតដែលនឹងសហការគ្នា ទៅតាមស្ថានភាពជាក់ស្តែងនាពេលអនាគត។
បណ្ឌិត អុិន ចាន់នី បានបន្ថែមទៀតថា កិច្ចសហប្រតិបត្តិការនេះ បានជួយជំរុញឱ្យការផ្ទេរប្រាក់របស់អតិថិជន កាន់តែទូលំទូលាយ ឆាប់រហ័ស ងាយស្រួល និងមានសុវត្ថិភាព ពីព្រោះធនាគារ អេស៊ីលីដាភីអិលស៊ី និងក្រុមហ៊ុន លី ហួរ ផេប្រ៉ូ ភីអិលស៊ី មានបណ្តាញប្រតិបត្តិការទូលំទូលាយគ្របដណ្តប់គ្រប់ខេត្ត-ក្រុង នៃព្រះរាជាណាចក្រកម្ពុជា។ សមិទ្ធផលនេះបានផ្តល់អត្ថប្រយោជន៍យ៉ាងច្រើនដល់អតិថិជន និងសាធារណជន និងគាំទ្រដល់ការរីកលូតលាស់របស់អតិថិជន ជាមួយនឹងការកាត់បន្ថយចំណាយ និងហានិភ័យ៕
