ទោះបីជាមានការធ្វើកំណែទម្រង់ការប្រឡងមធ្យមសិក្សាទុតិយភូមិជាច្រើនឆ្នាំហើយក៏ដោយ ក៏ឆ្នាំនេះក្រសួងអប់រំ យុវជន និងកីឡា នៅតែរឹតបន្តឹង និងគ្មានការបន្ធូរបន្ថយណាមួយចំពោះបេក្ខជនឡើយ ដើម្បីធានាបាននូវគុណភាពអប់រំប្រកបដោយប្រសិទ្ធភាព។
នៅពេលថ្មីៗនេះ ក្រសួងអប់រំបានជំរុញឱ្យនៅតាមវិទ្យាល័យទាំងអស់ទូទាំងប្រទេសរៀបចំកិច្ចប្រជុំសំណេះសំណាល និងផ្សព្វផ្សាយ និងកម្រិតវិន័យជូនដល់សិស្សានុសិស្សថ្នាក់ទី12 ដែលកំពុងត្រៀមខ្លួនប្រឡងសញ្ញាបត្រមធ្យមសិក្សាទុតិយភូមិ។ ការប្រឡងបាក់ឌុបនឹងឈានចូលមកដល់នៅថ្ងៃទី19 ខែសីហា ឆ្នាំ2019 ហើយការផ្សព្វផ្សាយនេះ គឺដើម្បីឱ្យសិស្សដែលជាបេក្ខជនប្រឡង បានដឹងច្បាស់លាស់អំពីព័ត៌មានសំខាន់ៗ លក្ខខណ្ឌនានាជុំវិញការប្រឡង និងជាពិសេសប្រការដែលសិស្សគួរប្រព្រឹត្ត និងមិនគួរប្រព្រឹត្តទៅតាមបទប្បញ្ញត្តិ និងកម្រិតវិន័យ។
ដើម្បីត្រៀមប្រឡងឱ្យបានល្អ សិស្សគួរខិតខំប្រឹងប្រែងអភិវឌ្ឍសមត្ថភាពដោយខ្លួនឯង ព្រោះគ្មានការអន្តរាគមន៍ ឬការលួចចម្លងណាមួយអាចធ្វើទៅបាននោះទេក្នុងបន្ទប់ប្រឡង ឬក្នុងមណ្ឌលប្រឡង។ ការប្រឡងចាំបាច់ត្រូវតែប្រើប្រាស់សមត្ថភាពខ្លួនឯងដោយផ្ទាល់ដើម្បីទទួលបានជោគជ័យ៕
