អ្នកណាៗក៏ចង់គេចឱ្យផុតពីបញ្ហាមួយចំនួនដែលមាននៅលើបបូរមាត់ដែរដូចជា បបូរមាត់ខ្មៅ ក្រៀម ស្រអាប់ មិនរលោងស្រស់ស្អាត និងមានសភាពគ្រើមជាដើម។ តើមានវិធីការពារបបូរមាត់ពីបញ្ហាអស់ទាំងនេះដែរឬទេ? ពិតជាមាន! ហើយថែមទាំងមិនពិបាកទៀតផង បើអ្នកអនុវត្តបានតាមវិធីងាយអស់ទាំងនេះឱ្យបានជាប់លាប់នោះ ធានាថាមិនយូរទេ ក្តីបារម្ភបែបនេះនឹងត្រូវរត់ទៅឈរនៅជួរក្រោយបំផុតមិនខានឡើយ។ តោះ! មកមើលបន្តិចមើល៍ថា ត្រូវធ្វើដូចម្តេចខ្លះ?
គ្រឿងផ្សំ៖
ប្រទាលកន្ទុយក្រពើ ម្សៅទឹកដោះគោ ទឹកក្រូចឆ្មារ ទឹកឃ្មុំ ប្រេងអាល់ម៉ុន ទឹកដំឡូងបារាំងឆៅ រួមទាំងសារធាតុផ្សំមួយចំនួនទៀត ដើម្បីភាពស្រស់ស្រាយ ទន់រលោង កាត់បន្ថយភាពខ្មៅស្រអាប់ បន្ថែមពណ៌ផ្កាឈូកដល់បបូរមាត់។
វិធីអនុវត្ត
1. សម្រាប់ការអនុវត្តជាមួយនឹងប្រទាលកន្ទុយក្រពើ វាអាចធ្វើឱ្យអ្នកមានអារម្មណ៍ថា ចាញ់ក្លិនរបស់វាបន្តិច ប៉ុន្តែមិនបាច់បារម្ភខ្លាចវាប៉ះពាល់អ្វីឡើយ ផ្ទុយមកវិញវានឹងធ្វើឱ្យបបូរមាត់ខ្មៅក្រៀមរបស់អ្នក នឹងប្រែមកជាស្រស់ស្រាយជាងមុនជាមិនខាន។ ងាយបំផុតគ្រាន់តែយកប្រទាលកន្ទុយក្រពើស្រស់ៗកាត់វាជាកំណាត់ រួចយកវាមកលាបលើបបូរមាត់របស់អ្នកឱ្យបានញឹកញាប់ជាការស្រេច។
2. បើអ្នកមិនចូលចិត្តប្រទាលប្រភេទនេះទេនោះ សូមក្រឡេកមកមើលវិធីមួយទៀត ដែលអាចឱ្យអ្នកអនុវត្តបាននោះគឺ ការលាយចូលគ្នានៃម្សៅទឹកដោះគោ ទឹកក្រូចឆ្មារ ទឹកឃ្មុំ និងប្រេងអាល់ម៉ុន (ប្រើក្នុងបរិមាណស្មើគ្នា) រួចយកមកបំពោកនៅលើបបូរមាត់របស់អ្នក រួចទុកវាចោលបែបនេះ ឱ្យបានយូរតាមដែលអ្នកអាចធ្វើបាន។ បន្ទាប់មកក៏លាងសម្អាតចេញវិញជាការស្រេច។ សូមធ្វើវាឱ្យបានពីរដងក្នុងមួយថ្ងៃ នោះបំណងដែលចង់បានបបូរមាត់ស្រស់ស្អាតនឹងក្លាយជាការពិតជាមិនខាន។
3. កាន់តែពិសេស និងងាយស្រួលជាងនេះទៀត ដែលអ្នកមិនទាន់ដឹងនោះគឺ ទឹកដំឡូងបារាំងឆៅ ក៏មានសមត្ថភាពក្នុងការព្យាបាលបបូរមាត់ដែលមានសភាពពណ៌ខ្មៅបាន ដើម្បីឱ្យអ្នកទទួលបាននូវបបូរមាត់ស្រស់ស្អាត ទន់រលោង ដោយយកទឹកដំឡូងបារាំងឆៅមកលាបពីលើបបូរមាត់របស់អ្នករួចផ្អាប់ទុកមួយសន្ទុះ ហើយក៏លាងចេញតាមធម្មតាជាការស្រេច។ កុំភ្លេចអនុវត្តបែបនេះឱ្យបានញឹកញាប់តាមដែលអាចធ្វើទៅបាន ឬ3ដងក្នុងមួយសប្តាហ៍ ដើម្បីជួយកែបញ្ហាបបូរមាត់ខ្មៅស្រអាប់របស់អ្នកចេញឱ្យឆ្ងាយពីក្តីបារម្ភរបស់អ្នកជារៀងរហូត។
4. ចំណែកឯសកម្មភាពមួយចំនួនទៀតដែលអាចចាត់ទុកថា ជាការជួយឱ្យបបូរមាត់មានសភាពល្អស្អាតដែរនោះ រួមមានដូចជា ការសម្អាតបបូរមាត់របស់អ្នកជារៀងរាល់យប់ឱ្យបានស្អាតជាមួយនឹងទឹកត្រជាក់មុនពេលចូលគេង ដើម្បីកម្ចាត់ភាពកខ្វក់ទាំងឡាយ ឬលាយមើមឆៃថាវ ម្សៅរមៀតជាមួយនឹងម្សៅទឹកដោះគោយកមកលាបលើបបូរមាត់ក៏បាន ឬដាក់ស្ករសបន្តិចនៅលើចំណិតក្រូចឆ្មារមួយចំណិត ហើយយកមកត្រដុសថ្នមៗនៅលើបបូរមាត់របស់អ្នក គឺសុទ្ធតែជាគន្លឹះនៃការព្យាបាលបបូរមាត់ដែលមានបញ្ហាយ៉ាងមានប្រសិទ្ធភាពបំផុត៕
