“Sleep Test” ឬការត្រួតពិនិត្យការគេងលក់ គឺជាការជំរុញឱ្យអ្នកព្យាយាមព្យាបាលអាការគេងមិនលក់បានយ៉ាងមានប្រសិទ្ធភាព។ វាបានជួយត្រួតពិនិត្យភាពខុសប្រក្រតីនៃការគេងមិនលក់របស់អ្នក ដោយផ្ដោតសំខាន់លើ5ចំណុច ហើយជួយស្មារតីរបស់អ្នកឱ្យបានល្អឡើងវិញ។ ប្រសិនបើអ្នកមានបញ្ហាសុខភាពរឿងគេងមិនលក់អ្នកអាចសាកល្បងប្រើវិធីសាស្ត្រ “Sleep Test” ទាំង5ចំណុចដូចខាងក្រោមនេះ។
1. ទម្លាប់គេឱ្យទៀងម៉ោង
មនុស្សជាច្រើនបានជួបជុំគ្នាដាច់យប់នៅថ្ងៃចុងសប្តាហ៍។ យ៉ាងណាក៏ដោយ អ្នកគួរតែព្យាយាមកំណត់រយៈពេលគេងបន្ថែមឱ្យបានមួយ ឬពីរម៉ោង ដូច្នេះអ្នកអាចរក្សាប្រព័ន្ធគ្រប់គ្រងសរីរាង្គរបស់អ្នកឱ្យមានសុខភាពល្អបាន។ ការប្រកាន់ខ្ជាប់នូវទម្លាប់នេះឱ្យបានទៀងទាត់ពេលវេលា អាចជួយអ្នកឱ្យរក្សាទម្លាប់គេងបានយ៉ាងល្អ។ គន្លឹះសំខាន់នោះគឺ ការចូលគេង និងភ្ញាក់ពីដំណេកទៀងពេលវេលាជារៀងរាល់ថ្ងៃ ដែលអាចជួយបង្កើតនូវពេលវេលាគេងមួយទៀងទាត់ប្រចាំថ្ងៃ។ ទោះបីជាទម្លាប់នេះអាចចំណាយពេលជាច្រើនសប្តាហ៍ ដើម្បីធ្វើឱ្យអ្នកសម្របខ្លួបាននក៏ដោយ ប៉ុន្តែខួរក្បាល និងរាងកាយរបស់អ្នកនឹងទម្លាប់គេង និងភ្ញាក់ពីដំណេកដោយខ្លួនឯងជាមិនខាន។
2. កុំលេងទូរស័ព្ទមុនពេលចូលគេង
វាមានផលប៉ះពាល់ខ្លាំង នៅពេលដែលអ្នកប្រើទូរស័ព្ទនៅជិតភ្នែក មុនពេលអ្នកចូលគេង។ ទោះយ៉ាងណាក៏ដោយប្រសិនបើអ្នកពិតជាមិនអាចឈប់ប្រើប្រាស់គ្រឿងអេឡិតត្រូនិកនៅមុនពេលគេងទេនោះ អ្នកនៅមានវិធីសាស្ត្រមួយចំនួនដែលអាចជួយកាត់បន្ថយផល់ប៉ះពាល់របស់វាបាន ដូចជា៖
– ប្ដូរដាក់មុខងារ Night Mode : បែបនេះវាធ្វើឱ្យអេក្រង់របស់គ្រឿងអេឡិចត្រូនិករបស់អ្នកប្ដូរទៅជាពណ៌លឿង និងមិនសូវចាំងភ្នែកខ្លាំង។
– បន្ថយពន្លឺអេក្រង់ឱ្យកាន់តែតិច ឬដាក់អេក្រង់ឱ្យឆ្ងាយបន្តិចពីមុខ របស់អ្នក : ដើម្បីកាត់បន្ថយពន្លឺខៀវ ដែលចាំងចូលមកភ្នែករបស់អ្នក។
– ប្រើកម្មវិធី ឬកញ្ចក់ការពារអេក្រង់ដែលមានមុខងារកំណត់ពន្លឺពេលយប់ : អាចជួយកាត់បន្ថយពន្លឺខៀវពីអេក្រង់ទូរស័ព្ទបានយ៉ាងល្អ។
3. អនាម័យកន្លែងគេង
បរិយាកាសកន្លែងគេងរបស់អ្នក គឺសំខាន់ណាស់ ដើម្បីជួយឱ្យអ្នកគេងនៅពេលយប់បានលក់ស្រួល។ ដើម្បីឱ្យខួរក្បាលរបស់អ្នកស៊ាំទៅនឹងគ្រែគេង និងការគេង អ្នកត្រូវរៀបចំគ្រែគេងរបស់អ្នកសម្រាប់តែគេងប៉ុណ្ណោះ។ ក្នុងន័យនេះ គឺអ្នកត្រូវប្រាកដថា គ្រែ និងបន្ទប់របស់អ្នក ត្រូវតែស្អាត និងមិនផ្លាស់ប្ដូរនោះទេ។ ម្យ៉ាងវិញទៀតសូមចៀសវាងដាក់របស់របរច្រើនពេកនៅលើគ្រែ ព្រោះវាអាចរំខានដល់ដំណេករបស់អ្នក។ អ្នកត្រូវប្រាកដថា បរិយាកាសនៅក្នុងបន្ទប់គេងមានផាសុកភាព ហើយអ្នកក៏គួរតែប្រើខ្នើយ ភួយ និងកម្រាលពូកដែលសមស្របផងដែរ។ ការជ្រើសរើសប្រើខ្នើយឱ្យត្រូវ អាចជួយអ្នកឱ្យមានអារម្មណ៍កាន់តែស្រួលខ្លួននៅពេលដាក់ខ្លួនគេង ឬកើយទៅស្រួលក ក្បាល ស្មា និងឆ្អឹងកងខ្នងរបស់អ្នក។ មិនតែប៉ុណ្ណោះ ការរក្សាសីតុណ្ហភាពនៅក្នុងបន្ទប់គេងរបស់អ្នកក្នុងកម្រិតមួយមិនឱ្យត្រជាក់ពេក ឬក្ដៅពេក ក៏អាចជួយឱ្យអ្នកគេងលក់ស្រួលនៅពេលយប់ផងដែរ។
4. របបអាហារ និងការទទួលទានទឹកឱ្យបានគ្រប់គ្រាន់ជួយកាត់បន្ថយស្រេ្តស
អ្នកប្រហែលធ្លាប់ទទួលការណែនាំឱ្យចៀសវាងការទទួលទានទឹកក្រោយម៉ោង8យប់ ឬទទួលទានឱ្យបានច្រើនម៉ោងមុនពេលចូលគេងហើយ។ ទាំងនេះគ្រាន់តែជារឿងនិយាយតៗគ្នាប៉ុណ្ណោះ អ្វីដែលអ្នកត្រូវធ្វើឱ្យប្រាកដនោះ គឺទទួលទានប្រភេទអាហារក្នុងបរិមាណត្រឹមត្រូវ ជាពិសេសនៅពេលទទួលទានអាហារពេលល្ងាចរួច។ សូមចៀសវាងការទទួលទានអាហារច្រើនជ្រុលពេក ហឹរពេក ឬអាហារដែលមានជាតិជូរខ្លាំងពេក ព្រោះវាអាចបណ្ដាលឱ្យរលាកបេះដូង និងពិបាកក្នុងការកិនរំលាយអាហារនៅពេលអ្នកជិតចូលគេង។ អ្នកក៏គួរតែកាត់បន្ថយរបបអាហារដែលផ្ទុកទៅដោយជាតិស្ករ និងស្ករសុទ្ធ ដូចជា នំប៉័ង បាយ មី និងគុយទាវជាដើម ព្រោះវាអាចបណ្ដាលឱ្យស្មារតីរបស់អ្នកស្វាង លែងងងុយគេង។ ការទទួលទានគ្រឿងស្រវឹង និងកាហ្វេអុីន ក៏អាចប៉ះពាល់ដល់វដ្ដនៃដំណេករបស់អ្នកផងដែរ។ ដើម្បីគេងនៅពេលយប់ឱ្យបានលក់ស្រួល អ្នកគប្បីទទួលទានអាហារដែលផ្ទុកដោយជាតិខ្លាញ់ល្អ និងកាបូអុីដ្រាត ដូចជា ទឹកដោះគោ យ៉ាអ៊ួ ផ្លែចេក ប៊័រ ដំឡូងជ្វា ឬគ្រាប់ធញ្ញជាតិផ្សេងៗជាដើម។ កត្តានេះនឹងជួយឱ្យអ្នកឆាប់ឆ្អែត និងមិនកូរពោះពេលគេង។
5សកម្មនៃការហាត់ប្រាណ
ក្រោយពេលបញ្ចេញចលនារាងកាយនៅពេលថ្ងៃរួចមក ជាធម្មតាវានឹងធ្វើឱ្យអ្នកមានអារម្មណ៍ថា អស់កម្លាំងនៅពេលយប់។ សកម្មភាពទាំងនេះ ធ្វើឱ្យអ្នកហត់នឿយ និងជួយឱ្យអ្នកឆាប់គេងលក់។ ការសិក្សាស្រាវជ្រាវមួយបានបង្ហាញថា ការហាត់ចលនារាងកាយទៀងទាត់ ជួយឱ្យគេងលក់ស្រួល។ ប្រការនេះក៏មានប្រសិទ្ធភាពចំពោះវដ្ដសុខភាពផងដែរ ព្រោះការហាត់ប្រាណធ្វើឱ្យអ្នកគេងបានលក់ស្រួល និងជាកត្តាជួយឱ្យអ្នកអាចសម្រេចបានលទ្ធផលកាន់តែប្រសើរ ទាំងក្នុងការងារ ឬការសិក្សាផងដែរ។ ក្រៅពីធ្វើលំហាត់ប្រាណអាចជួយឱ្យគេងលក់ស្រួល អ្នកក៏គួរតែហាត់ប្រាណ ដើម្បីថែរាង និងជួយឱ្យរាងកាយមានសុខភាពល្អផងដែរ។ ការសម្រាកគ្រប់គ្រាន់នៅពេលយប់ និងហាត់ប្រាណនៅពេលថ្ងៃឱ្យបានត្រឹមត្រូវអាចជួយឱ្យអ្នករស់នៅមានសុខភាពល្អ៕
