ជារៀងរាល់ឆ្នាំ ការប្រកួតប្រជែងក្នុងកម្មវិធី Techno Innovation ត្រូវបានគេមើលឃើញថាមានការនាំមកនូវស្នាដៃវិទ្យាសាស្ត្រល្អៗជាច្រើនដែលកូនខ្មែរបានរកឃើញ ដើម្បីដោះស្រាយបញ្ហានានាដោយប្រើប្រាស់ជំនាញវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) បូករួមជាមួយគំនិតសហគ្រិនភាពដើម្បីឱ្យផលិតផលនោះពេញលក្ខណៈ។
ថ្ងៃនេះ កាសែត ឡារ៉ែន ពាណិជ្ជ បានជួបសម្ភាសជាមួយលោក ឡេង ហ៊ីវហ្វ៊ី អ្នកសម្របសម្រួលកម្មវិធី Techno Innovation ឆ្នាំ2019 ដើម្បីចែករំលែកពីចំណុចសំខាន់ៗនៃកម្មវិធីដ៏មានសារៈសំខាន់នេះសម្រាប់ឆ្នាំ2019 នេះ។
1. តើកម្មវិធី Techno Innovation នៅឆ្នាំនេះមានអ្វីប្លែកជាងឆ្នាំមុន?
កម្មវិធី Techno Innovation Challenge ជាការប្រកួតប្រជែងជាក្រុម លើការបង្កើតសមិទ្ធផលបែបវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ដែលមានភាពច្នៃប្រឌិតខ្ពស់សម្រាប់ដោះស្រាយបញ្ហាជាក់ស្តែងក្នុងជីវិតរស់នៅប្រចាំថ្ងៃរបស់ប្រជាជនកម្ពុជា ដែលកម្មវិធីនេះរៀបចំដោយវិទ្យាស្ថានបច្ចេកវិទ្យាកម្ពុជា ហើយក្រុមដែលចូលរួមមានរយៈពេល 4សប្តាហ៍ក្នុងការប្រកួត។
សម្រាប់ឆ្នាំនេះយើងមានកម្មវិធី មានការរៀបចំអ្នកតម្រង់ទិសល្អៗដើម្បីធ្វើការណែនាំដល់ក្រុមប្រកួត និងធ្វើការសម្រួលយ៉ាងច្រើនដើម្បីធ្វើយ៉ាងណាឱ្យទាំងអ្នកបច្ចេកទេស និងអ្នករៀបគម្រោងអាជីវកម្ម បានធ្វើការងារដោយរលូនរហូតស្នាដៃរបស់ពួកគេអាចចេញមកបាន ហើយធានាថា អាចប្រែក្លាយទៅជាផលិតផលសម្រេចដែលអាចចរាចរលើទីផ្សារដើម្បីប្រកួតប្រជែងជាមួយសមិទ្ធផលល្អៗជាច្រើនផ្សេងទៀត។ ក្រៅពីនេះយើងក៏បានជ្រើសរើសអ្នកកាត់សេចក្តីជំនាញៗដែលមានបទពិសោធក្នុងការផលិតផលិតផលថ្មីៗដើម្បីដាក់ពិន្ទុ និងផ្តល់យោបល់បន្ថែមផងដែរចំពោះក្រុមដែលមិនទទួលបានជយលាភី។
2. តើគោលដៅសំខាន់ៗអ្វីខ្លះដែលកម្មវិធីបានរៀបចំសម្រាប់ឆ្នាំនេះ?
កម្មវិធី Techno Innovation សម្រាប់ឆ្នាំនេះក៏មិនខុសពីឆ្នាំមុនៗដែរ គឺយើងផ្តល់ឱកាសឱ្យកាន់តែច្រើនសម្រាប់ក្រុមយុវជនដែលមានស្នាដៃល្អៗចូលរួមប្រកួតទាំងអ្នកដែលបានបញ្ចប់ការសិក្សាហើយ និងមិនទាន់បញ្ចប់ការសិក្សា។ សម្រាប់និស្សិតដែលកំពុងសិក្សាថ្នាក់អនុបណ្ឌិត ក៏អាចចូលរួមបានដែរ។
ជាគោលដៅសំខាន់មួយផ្សេងទៀត គឺដើម្បីជំរុញឱ្យយុវជនកម្ពុជាកាន់តែច្រើន មានទឹកចិត្តក្នុងការបង្កើតស្នាដៃថ្មីៗ ឬជំរុញសហគ្រិនភាពក្នុងស្រុកដោយការប្រើចំណេះដឹងផ្នែកវិទ្យាសាស្ត្រមកបង្កើតផលិតផលក្នុងស្រុកដែលស្របនឹងស្តង់ដា មានលក្ខខណ្ឌគ្រប់គ្រាន់សម្រាប់ការប្រកួតប្រជែង និងអាចកាត់បន្ថយការនាំចូលផងដែរ។ និស្សិតដែលចូលរួមនៅក្នុងកម្មវិធីប្រកួតនៅថ្ងៃនេះ អាចនឹងក្លាយជាម្ចាស់អាជីវកម្ម សិប្បកម្ម ឬឧស្សាហកម្មនៅថ្ងៃអនាគត លើរបកគំហើញដែលគេបានបង្កើតឡើង ហេតុនេះការជំរុញឱ្យមានអ្នកបង្កើតថ្មីឱ្យបានច្រើន ជាផ្នែកយ៉ាងសំខាន់ក្នុងការជំរុញឱ្យសង្គមកាន់តែអភិវឌ្ឍន៍បានល្អក្នុងដំណាក់កាលដែលកំពុងមានការប្រកួតប្រជែងខ្ពស់នេះ។
3. តើនៅឆ្នាំ2019 នេះ មានអ្នកចូលរួមប៉ុន្មានក្រុម ហើយអ្នកណាខ្លះជាអ្នកដាក់ពិន្ទុ?
នៅឆ្នាំ2019 នេះ មានអ្នកដាក់ពាក្យដល់ទៅជាង 180នាក់ ហើយចុងក្រោយយើងជ្រើសរើសបានក្រុមខ្លាំងចំនួន 19ក្រុមដើម្បីចូលរួមប្រកួតដោយក្នុងនោះពួកគេបានជ្រើសរើសគំនិតអាជីវកម្ម និងផលិតផលទាក់ទងនឹងចំណីអាហារ អាជីវកម្មអេឡិចត្រូនិក (E-Commerce) កម្មវិធីទូរស័ព្ទ (Mobile Application)កសិកម្ម គ្រឿងយន្តស្វ័យប្រវត្តិ (Automation) សេវាកម្ម និងផ្នែកជាច្រើនទៀត។
ចំពោះគណៈកម្មការវិញ គឺមកពីផ្នែកផ្សេងៗគ្នា ដូចជាអ្នកជំនាញផ្នែកបច្ចេកវិទ្យាអាហារ អ្នកគ្រប់គ្រងអាជីវកម្ម ម្ចាស់អាជីវកម្មអេឡិចត្រូនិក (E-commerce) និងអ្នកជំនាញវិទ្យាសាស្ត្រកសិកម្មជាដើម។ គណៈកម្មការទាំងអស់នេះត្រូវបានអញ្ជើញដោយពិនិត្យលើបទពិសោធ ចំណេះដឹង និងការទទួលស្គាល់នូវស្នាដៃរបស់គាត់ក្នុងការដោះស្រាយបញ្ហាប្រកបដោយប្រសិទ្ធភាពដោយប្រើប្រាស់ជំនាញរបស់ខ្លួន។
4. អ្វីជាការរំពឹងទុករបស់លោកចំពោះកម្មវិធី Techno Innovation នេះ?
ជាការរំពឹងទុកយើងសង្ឃឹមថា កម្មវិធីនេះនឹងផ្តល់ឱកាសកាន់តែច្រើនឱ្យនិស្សិត វិស្វករ ឬអ្នកជំនាញនៅកម្ពុជាមានឱកាសអភិវឌ្ឍសមត្ថភាពកាន់តែខ្លាំងដើម្បីបង្កើតអាជីវកម្មដោយខ្លួនឯង និងមានសមត្ថភាពក្នុងការបង្ហាញភាពច្នៃប្រឌិតទៅកាន់សាធារណជន និងអ្នកវិនិយោគជាដើម។ មានអាជីវកម្មខ្លះក្រោយពេលដែលបានទទួលរង្វាន់ គាត់អាចបន្តប្រើប្រាស់ស្នាដៃនោះសម្រាប់ជាមុខរបរនៅថ្ងៃអនាគត ដោយទទួលបានទុនវិនិយោគបន្ថែម។ នេះជាការចូលរួមលើកតម្លៃដល់អ្នកខិតខំប្រឹងប្រែងបង្កើតស្នាដៃថ្មី។
ម្យ៉ាងវិញទៀត យើងក៏រំពឹងទុកដែរថា ពួកគេអាចនឹងប្រើប្រាស់ជំនាញភាពជាអ្នកដឹកនាំ ភាពច្នៃប្រឌិត និងគំនិតអាជីវកម្មដើម្បីក្លាយជាអ្នកជំនាញដ៏ល្អនៅថ្ងៃអនាគត ដែលធ្វើឱ្យពួកគេក្លាយជាមនុស្សសំខាន់ក្នុងក្រុមហ៊ុន ឬក្លាយជាអ្នកជំនាញដែលអ្នកវិនិយោគត្រូវការ។ លើសពីនេះទៅទៀត ពួកគេក៏អាចនឹងក្លាយជាមនុស្សជំនាន់ថ្មីប្រកបដោយសក្តានុពលក្នុងការបន្តដឹកនាំកម្មវិធី Techno Innovation នេះឱ្យកាន់តែមានភាពច្នៃប្រឌិតខ្ពស់ ហើយធំឡើងៗនៅថ្ងៃអនាគត៕
