កន្លងទៅថ្មីៗនេះក្រុមហ៊ុន Ggear និងសមាគមសហគ្រិនសាខាខេត្តសៀមរាប បានរៀបចំកម្មវិធីការបរិច្ចាគឈាមឈរលើប្រធានបទរួមមួយ «ចែករំលែកតំណក់ឈាមរបស់អ្នកដើម្បីជួយសង្រ្គោះជីវិតស្រ្តី និងអ្នកម្ដាយ» ខណៈតម្រូវការឈាមកំពុងកើនឡើងជាលំដាប់។
គិតជាមធ្យមក្នុងមួយថ្ងៃ កម្ពុជាត្រូវការឈាមចំនួន 200ប្លោកទូទាំងប្រទេសដើម្បីជួយសង្គ្រោះជីវិតមនុស្ស ដោយអ្នកជំងឺម្នាក់ត្រូវការឈាមជាមធ្យម 3 ប្លោក។ កម្មវិធីនេះរៀបចំឡើងក្នុងគោលបំណងដើម្បីចូលរួមអបអរសាទរក្នុងទិវាបរិច្ចាគឈាមពិភពលោក ថ្ងៃទី 14 ខែ មិថុនា ដោយមានវត្ថមានចូលរួមពីលោកវេជ្ជបណិ្ឌតហុក គឹមចេង ប្រធានមជ្ឈមណ្ឌលជាតិផ្ដល់ឈាមរាជធានីភ្នំពេញ លោកវេជ្ជបណ្ឌិតប៉ែន ផល្គុណ ប្រធានមន្ទីពេទ្យខេត្តសៀមរាប វេជ្ជបណ្ឌិតក្រុស សារ៉ាត ប្រធានមន្ទីសុខាភិបាលខេត្តសៀមរាប បណ្ឌិតទូច ណារិន ប្រធានស្ដីទីសមាគមសហគ្រិនវ័យក្មេងសាខាខេត្តសៀម រាប និងលោកឧកញ៉ា សុខ ពិសិដ្ឋ អគ្គនាយកប្រចាំក្រុមហ៊ុន ជីហ្គៀ ( GGear ) ។
លោកឧកញ៉ា សុខ ពិសិដ្ឋ បានមានប្រសាសន៍ថា៖ កន្លងមកក្រុមហ៊ុន GGearបានចូលរួមចំណែកជាច្រើនក្នុងការងារសង្គម និងសហគមន៍ ដូចជាការចូលរួមជាមួយសមាគមគ្រូពេទ្យស្ម័គ្រចិត្តការចែករំលែកបទពិសោធបច្ចេកវិទ្យាថ្មីៗដល់សិស្សានុសិស្សឱ្យបានយល់ដឹងបន្ថែម ជាដើម។
លោកបន្ដទៀតថា ឈាមគឺជាវត្ថុដែលមានតម្លៃបំផុត ដោយសារតែបច្ចុប្បន្ននេះក្នុងមួយថ្ងៃយើងត្រូវការឈាមចំនួន 200 ប្លោកទូទាំងប្រទេសដើម្បីជួយសង្គ្រោះជីវិតមនុស្ស។ ដូចនេះការបរិច្ចាគឈាម គឺមានន័យថាជាការចែករំលែក និងជួយដល់ជីវិតមនុស្សផ្សេងទៀត។ សរុបលទ្ធផល និងវត្តមានអ្នកចូលរួមប្រមាណជាង 300 នាក់ក្នុងថ្ងៃនេះ ចំនួនឈាមដែលទទួលបានពីការបរិច្ចាគមានចំនួន 208 ប្លោក។
លោកវេជ្ជបណិ្ឌតហុក គឹមចេង ប្រធានមជ្ឈមណ្ឌលជាតិផ្ដល់ឈាមរាជធានីភ្នំពេញ បានឱ្យដឹងថា ការផ្តល់ឈាម គឺជាកាយវិការដ៏សាមញ្ញដែលមនុស្សពេញវ័យមានសុខភាពល្អអាចធ្វើបានដោយត្រូវគោរពទៅតាមលក្ខខណ្ឌវេជ្ជសាស្រ្តដូចខាងក្រោម៖
– អាយុចាប់ពី 18 ដល់ 60 ឆ្នាំ
– ទម្ងន់ចាប់ពី 45 គីឡូក្រាមឡើង
– មានសុខភាពល្អ
– មនុស្សប្រុសអាចផ្តល់ឈាមបាន 4ដង ក្នុងមួយឆ្នាំ (ចន្លោះពេល 3ខែម្តង)
– មនុស្សស្រីអាចផ្តល់ឈាមបាន 3ដង ក្នុងមួយឆ្នាំ (ចន្លោះពេល 4ខែម្តង)
តម្រូវការឈាមមានគ្រប់ពេលវេលា ហើយសម្រាប់ការផ្គត់ផ្គង់ក៏ត្រូវមានភាពទៀងទាត់ផងដែរ។ ប៉ុន្តែដោយសារការថែរក្សាទុកដាក់ឈាម មានពេលកំណត់នៅមុនពេលប្រើប្រាស់ ទើបជាការចាំបាច់ណាស់ ដែលត្រូវតែមានការធ្វើអំណោយឈាមទៀងទាត់នៅគ្រប់ពេលវេលា នៅគ្រប់ទីកន្លែងដែលគេត្រូវការប្រើប្រាស់ឈាម។ ឈាមគឺជាអំណោយមានតម្លៃដ៏ប្រពៃបំផុត ដែលមនុស្សម្នាក់អាចផ្តល់ទៅឱ្យមនុស្សម្នាក់ទៀតនូវអំណោយនៃជីវិតនេះបាន។
ការសម្រេចចិត្តផ្តល់អំណោយឈាមរបស់លោកអ្នក អាចឱ្យគេជួយសង្រ្គោះជីវិតមនុស្សម្នាក់ ឬ ច្រើននាក់បាន និងដោយសារឈាមរបស់លោកអ្នកអាចយកទៅបំបែកជាសមាសភាពឈាមផ្សេងៗទៀតបានដូចជា៖ គុលិកាក្រហម ប្លាកែត ប្លាស្មា ដែលគេអាចយកទៅប្រើប្រាស់សម្រាប់អ្នកជំងឺក្នុងលក្ខខណ្ឌជាក់លាក់ណាមួយបាន៕
