ទីភ្នាក់ងារទេសចរណ៍បារាំង Atout France និងសមាគមទីភ្នាក់ងារទេសចរណ៍កម្ពុជា (CATA) បានព្រមព្រៀងសហការគ្នាដើម្បីផ្សព្វផ្សាយប្រទេសកម្ពុជា និងបារាំងជាទិសដៅទេសចរណ៍ ដោយរំពឹងថា កំណើនភ្ញៀវទេសចររវាងប្រទេសទាំង2 នឹងកើនឡើងកាន់តែច្រើន បន្ទាប់ពីគណ: ប្រតិភូរបស់ Atout France បានធ្វើដំណើរមកទស្សនកិច្ចកម្ពុជា។ នេះបើយោងតាមប្រធានសមាគមទីភ្នាក់ងារទេសចរណ៍កម្ពុជា។
សមាគម Atout France គឺជាស្ថាប័នដែលមានការចូលរួមពីរដ្ឋាភិបាល និងវិស័យឯកជននៅប្រទេសបារាំងដើម្បីផ្សព្វផ្សាយពីគោលដៅទេសចរណ៍ដ៏សម្បូរបែបនៅប្រទេសបារាំង បានមកបំពេញទស្សនកិច្ចលើកដំបូងនៅកម្ពុជា និងបានធ្វើសិក្ខាសាលាមួយស្តីពីការលើកកម្ពស់វិស័យទេសចរណ៍រវាងប្រទេសកម្ពុជា និងបារាំង ដោយបានឯកភាពថានឹងធ្វើការជាមួយគ្នា។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានមានប្រសាសន៍ថា៖“សិក្ខាសាលានេះដឹកនាំដោយលោក Morad Tayebi ប្រធានសមាគម Atout France និងមានការចូលរួមដោយអ្នកតំណាងរបស់ក្រុមហ៊ុនអាកាសចរណ៍ Air France និង Club Med និងក្រុមហ៊ុនបារាំងមួយចំនួនទៀត”។
លោកស្រីបានឱ្យដឹងថា៖“សមាគមទាំង2 បានព្រមព្រៀងលើវិស័យទេសចរណ៍ ដោយបានកត់សម្គាល់ពីកំណើននៃចំនួនភ្ញៀវទេសចរបារាំងនៅក្នុងប្រទេសកម្ពុជា ក៏ដូចជាការកើនឡើងនៃចំនួនប្រជាជនកម្ពុជាដែលធ្វើដំណើរទៅប្រទេសបារាំងដែរ។ ខ្ញុំគិតថា វាជាការចាប់ផ្តើមដ៏ល្អ និងជាលើកទី1 ហើយដែលសមាគមទាំង2 ជួបគ្នា និងផ្លាស់ប្តូរព័ត៌មាន”។
លោកស្រីបានបន្តថា៖“តាមរយៈដំណើរទស្សនកិច្ចនេះ យើងសង្ឃឹមថា ចំនួនភ្ញៀវទេសចរនៃប្រទេសទាំង2 នឹងកើនឡើងកាន់តែច្រើនបន្ថែមទៀត។ ភ្ញៀវទេសចរបារាំងត្រូវបានគេចាត់ទុកថា ជាក្រុមដែលចូលចិត្តធ្វើដំណើរមកកម្ពុជារយៈពេលយូរថ្ងៃ និងចំណាយច្រើនដោយសារមានចំណាប់អារម្មណ៍ខ្លាំងចំពោះតំបន់ប្រាសាទ តំបន់វប្បធម៌ និងប្រពៃណីរបស់ខ្មែរ”។
លោកស្រី ស៊ីវលីន បានឱ្យដឹងទៀតថា ដំណើរទស្សនកិច្ចរបស់ទីភ្នាក់ងារអភិវឌ្ឍន៍ទេសចរណ៍បារាំង ពិតជាមានសារៈសំខាន់ណាស់សម្រាប់ការអភិវឌ្ឍវិស័យទេសចរណ៍នៅកម្ពុជា ព្រោះតាមរយៈដំណើរទស្សនកិច្ចនេះ សក្តានុពលនៃវិស័យទេសចរណ៍នៅកម្ពុជា នឹងត្រូវគេយកទៅផ្សព្វផ្សាយកាន់តែធំទូលាយនៅក្នុងប្រទេសបារាំង។
លោកស្រីបន្ថែមថា៖“នៅក្នុងដំណើរទស្សនកិច្ចរបស់ Atout France លើកទី1 មកកម្ពុជានេះ មានការចូលរួមពីតំណាងក្រុមហ៊ុនធំៗរបស់បារាំងជាច្រើន ដូចជាក្រុមហ៊ុនអាកាសចរណ៍ Air France ក្រុមហ៊ុនទេសចរណ៍ Club Med SAS និងក្រុមហ៊ុនកម្សាន្តតាមនាវា CroisiEurope”។
ប្រទេសបារាំងជាទីផ្សារទេសចរណ៍កំពូលរបស់អឺរ៉ុប នៅអឺរ៉ុបដែលមាន 2.8 ភាគរយនៃភ្ញៀវទេសចរទាំងអស់ដែលមកពីប្រទេសអឺរ៉ុប។ នៅឆ្នាំ 2018 ជនជាតិបារាំងជិត 170,900 នាក់បានមកធ្វើទស្សនកិច្ចនៅកម្ពុជាដែលកើនឡើង 2.7%ពី 1ឆ្នាំទៅ 1ឆ្នាំ។
លោកស្រី ស៊ីវលីន បានថ្លែងថា៖ “ខ្ញុំបានជំរុញឱ្យក្រុមហ៊ុនអាកាសចរណ៍ Air France ចាប់ផ្តើមហោះហើរត្រង់មកកាន់ប្រទេសកម្ពុជាវិញ បន្ទាប់ពីខកខានជាង 6ឆ្នាំមកហើយចាប់តាំងពីវាត្រូវបានផ្អាកដោយសារតែកង្វះខាតតម្រូវការ។ យើងបានសង្កេតឃើញថាចំនួនភ្ញៀវទេសចរមកពីប្រទេសបារាំងកំពុងកើនឡើង ដូច្នេះវាជាពេលវេលាល្អដើម្បីចាប់ផ្តើមហោះហើរត្រង់មកទីនេះម្តងទៀត”។
លោកស្រីបានបន្តទៀតថា ចំនួនប្រជាជនកម្ពុជាដែលធ្វើដំណើរទៅប្រទេសបារាំងដើម្បីភាពសប្បាយរីករាយបានកើនឡើងជាបន្តបន្ទាប់ដោយសារតែទីក្រុងប៉ារីសក្លាយជាទីក្រុងដែលមានទេសភាពស្រស់ស្អាត និងគោលដៅទិញទំនិញជាច្រើន។
យោងតាមរបាយការណ៍របស់ក្រសួងទេសចរណ៍ ក្នុងត្រីមាសទី1 ឆ្នាំនេះ កម្ពុជាទទួលបានភ្ញៀវទេសចរបរទេសជាង 1.8លាននាក់ កើនឡើង 9.7% ធៀបនឹងរយៈពេលដូចគ្នាកាលពីឆ្នាំមុន។ ក្នុងចំណោមនេះភ្ញៀវទេសចរបារាំងមានចំនួន 59,401នាក់ កើនឡើង 5%ធៀបនឹងរយៈពេលដូចគ្នាកាលពីឆ្នាំមុន។
យោងតាមសេចក្តីប្រកាសព័ត៌មានរបស់ស្ថានទូតបារាំង បានឱ្យដឹងថា ប្រទេសបារាំង គឺជាទិសដៅទេសចរណ៍ដ៏សំខាន់នៅក្នុងទ្វីបអឺរ៉ុបសម្រាប់ប្រជាជនកម្ពុជា ដោយចំនួននៃការដាក់ពាក្យសុំទិដ្ឋាការបានកើនឡើង 25% នៅឆ្នាំនេះបើប្រៀបធៀបទៅនឹងរយៈពេលដូចគ្នាកាលពីឆ្នាំមុន។
លោក ជុក ជំនោរ អ្នកនាំពាក្យក្រសួងទេសចរណ៍បានថ្លែងបញ្ជាក់ថា ការមកដល់របស់ Atout Franceនឹងផ្តល់ផលប្រយោជន៍ច្រើនសម្រាប់វិស័យទេសចរណ៍កម្ពុជា ព្រោះ Atout France នឹងចូលរួមចំណែកពង្រឹងវិស័យទេសចរណ៍នៅកម្ពុជា ហើយមិនត្រឹមតែជួយធ្វើការផ្សព្វផ្សាយពីវិស័យទេសចរណ៍របស់កម្ពុជានៅប្រទេសបារាំង ប៉ុណ្ណោះទេ ប៉ុន្តែថែមទាំងជួយជំរុញឱ្យគុណភាពសេវាកម្មនៅកម្ពុជាកាន់តែល្អប្រសើរឡើងផងដែរ។
លោកបញ្ជាក់ថែមថា៖ “ជារៀងរាល់ឆ្នាំក្រសួងតែងធ្វើការបណ្តុះបណ្តាលផ្នែកចំណេះដឹង និងភាសាសម្រាប់មគ្គុទេ្ទសក៍ទេសចរណ៍ ដូច្នេះចំនួនមគ្គុទេ្ទសក៍ផ្នែកភាសាបារាំងនៅកម្ពុជាមិនមានបញ្ហានេះកើតឡើងទេ”៕
