បើគិតចាប់តាំងពីពេលវេលាដែលលោក អាន់ ដា បានចាប់ផ្តើមអាជីពជាតារាចម្រៀងប្រចាំនៅក្នុងផលិតកម្ម KH promotion មក មានរយៈពេលជិត 10ឆ្នាំហើយ និងនេះគឺជាលើកទី1 ហើយដែលលោកមានឱកាសសម្ដែងក្នុងខ្សែភាពយន្ដ។
រឿង «ម្ចាស់គ្រងបេះដូង» ជាវណ្ណកម្មរបស់ផលិតកម្ម KH Promotion ដែលបានចាក់បញ្ចាំងនៅលើកញ្ចក់ទូរទស្សន៍អាស៊ីអាគ្នេយ៍កំពុងតែទទួលបានការគាំទ្រពីមហាជន ដែលក្នុងនោះក៍មានវត្ដមានលោក អាន់ ដា សម្ដែងជាតួអង្គនាយប៉ូលិសផងដែរ។ មានអ្នកគាំទ្ររបស់លោកមួយចំនួនបានសម្ដែងការភ្ញាក់ផ្អើល គ្រាដែលឃើញលោកទើបតែចាប់អាជីពសម្តែងជាលើកដំបូងសោះ តែលោកធ្វើបានល្អមិនខុសពីតារាអាជីពមានបទពិសោធរាប់ឆ្នាំឡើយ។
ពាក់ព័ន្ធនឹងការសម្ដែងនេះត្រូវបានលោក អាន់ ដា បញ្ជាក់ថា លោកពុំនឹកស្មានថា មានឱកាសបានសម្ដែងក្នុងភាពយន្ដដូច្នេះទេ ព្រោះកន្លងមកលោកធ្លាប់សម្ដែងតែក្នុងឈុតខារ៉ាអូខេប៉ុណ្ណោះ។ ពីមុនលោកចាត់ទុកថា ការសម្ដែងខារ៉ាអូខេមិនខុសពីសម្ដែងភាពយន្ដទេ តែផ្ទុយទៅវិញក្រោយពីសម្ដែងបានប្រហែល 4ទៅ 5ឈុត ទើបដឹងថា វាមានភាពខុសគ្នាឆ្ងាយណាស់ ព្រោះការសម្ដែងភាពយន្ដត្រូវការចងចាំច្រើន ដូចជាការតុបតែងខ្លួន ចរិតនៃតួអង្គដែលយើងកំពុងតែសម្តែង ពិសេស ការចូលអារម្មណ៍គឺខ្លាំងជាងការសម្ដែងខារ៉ាអូខេទៅទៀត។
លោកអាន់ ដា បន្ដថា៖ «ក្នុងរឿងនេះខ្ញុំសម្ដែងជាតួអង្គប៉ូលិសដែលត្រូវទាមទារឱ្យខ្ញុំត្រូវប្រឹងសម្ដែងខ្លាំង ព្រោះខ្ញុំត្រូវស្វែងយល់ពីចរិតឫកពាប៉ូលីសដ៏ម៉ឺងម៉ាត់ម្នាក់ថា តើគេត្រូវធ្វើបែបណា? ពោលគឺប្រឹងសម្ដែងយ៉ាងណាឱ្យមានលក្ខណៈធម្មជាតិ»។ លោកបន្ដថា បើទោះជារឿងនេះលោកមិនមានឱកាសធ្វើជាតួឯក ដ្បិតអីរឿងនេះជាវណ្ណកម្មរបស់ផលិតកម្ម KH Promotionក៏ដោយ ប៉ុន្ដែលោកពេញចិត្ដនូវតួអង្គប៉ូលិសនេះខ្លាំងព្រោះលោកចង់សម្ដែងជាយូរមកហើយ និងអ្វីដែលកាន់តែធ្វើឱ្យលោករំភើបនោះគឺលោកទទួលបានអ្នកគាំទ្រច្រើន។
ជាមួយគ្នានេះដែរ លោកអាន់ ដា បញ្ជាក់ថា ប្រសិនបើក្រោយពីការចាក់បញ្ចាំងរឿងនេះចប់ លោកទទួលបានការគាំទ្រច្រើនរហូតមានផលិតកម្មផ្សេងចង់បានលោកទៅសម្ដែងនោះ លោកនឹងបន្ដចាប់អាជីពមួយនេះបន្ថែមទៀត។ ទោះជាយ៉ាងណាលោកអះអាងថា លោកនឹងមិនបោះបង់ចោលអាជីពចម្រៀងជាដាច់ខាត ព្រោះយ៉ាងហោចណាស់ ក៏វាបានធ្វើឱ្យលោកនៅមានប្រជាប្រិយភាពក្នុងអាជីពសិល្បៈដែរ ដែលពិសេសនោះ គឺការសម្ដែងរបស់លោកកំពុងតែមានការពេញនិយមតាមរយៈការថតដាក់នៅក្នុងភាពយន្ដភាគនានាដែលបានចាក់បញ្ចាំងនៅស្ថានីយទូរទស្សន៍បាយ័ន និង PNN ជាដើម៕
