ទើបតែរៀបអាពាហ៍ពិពាហ៍នៅកោះពេជ្រមិនទាន់បានប៉ុន្មានខែផង ស្រាប់តែព័ត៌មានក្នុងស្រុកមួយបានចេញផ្សាយថា តារាហ្វេសប៊ុកល្បីឈ្មោះ អ្នកនាង Love Riya និងស្វាមីក្មេង បានបែកគ្នាក្រោយរៀបការ ។ តាមរយៈបណ្ដាញសង្គមហ្វេសប៊ុក ឡារ៉ែន ទទួលព័ត៌មានបានថា ភ្លាមៗអ្នកនាង Love Riya ក៏កំពុងពរពោះ មិនស្រណុកចិត្តចំពោះព័ត៌មានបានចេញផ្សាយនោះឡើយ និងបានអះអាងថា បានធ្វើឱ្យប្ដីប្រពន្ធអ្នកនាង ប្រតិកម្មពេញទំហឹង ជាមួយព័ត៍មានបំផ្លើសការពិត។ អ្នកទាំងពីរព្រលយសារស្រដៀងគ្នាថា ដើមចមនៃដំណឹងអកុសលដែលមិនអាចទទួលយកបាននោះ អាចបណ្ដាលមកពីអ្នកឈ្នានីសបញ្ចេញព័ត៌មានមិនពិត ឬអាចមានអ្នកជួលឱ្យបង្ខូចឈ្មោះលោក និងភរិយា ដើម្បីធ្វើឱ្យគ្រួសារខ្លួនខូចឈ្មោះ។
អ្នកនាង Love Riya បានបញ្ជាក់ក្នុងម៉ោង Live ថា អ្នកនាង និងស្វាមី មិនមានសូម្បីតែរឿងទាក់មាត់គ្នា ទើបអ្នកនាងហួសចិត្តនៅពេលមានការចុះផ្សាយថា អ្នកនាង និងស្វាមី រស់នៅមិនចុះសម្រុងគ្នា ក្រោយរៀបការ។ អ្នកនាងប្រកាសថា កាន់តែហួសចិត្តទៅទៀត នៅពេលដំណឹងដែលបានចុះផ្សាយ បានង្ខូចឈ្មោះថា ស្វាមីអ្នកនាងដើរលេងបាត់ៗដាច់យប់ ដល់ថ្នាក់អ្នកនាងឈប់ទទួល ហើយស្វាមីរត់ទៅនៅផ្ទះម្ដាយ ដោយអ្នកនាងប្រកាសជាសាធារណៈថា អត់មានរឿងរ៉ាវបែបនោះទាល់តែសោះ។ អ្នកនាងថា ស្វាមីរបស់ខ្លួនគឺជានិស្សិតពេទ្យ ដែលមានការងារចុះស្ដារមិនសូវទំនេរ ហើយលោកក៍មានការងារផ្ទាល់ខ្លួន ដែលត្រូវចេញដើរក្រៅប្រទេសផងដែរ គឺមិនមែនស្វាមីរបស់អ្នកនាង មិនបានបង្ហាញមុខក្នុងពេលអ្នកនាងទៅណាមកណា ឬ នៅក្នុងពេល Live លក់ផលិតផល ក៍ជារឿងបែកគ្នានោះទេ។ អ្នកនាងបញ្ជាក់ថា នោះគឺជាដំណឹងដែលចង់បង្ខូចឈ្មោះស្វាមីរបស់អ្នកនាង និងធ្វើឱ្យប៉ះពាល់ដល់កិត្តិយសរបស់ខ្លួនដែលមិនអាចទទួលយកបាន។ យ៉ាងណាមិញអ្នកនាងបង្ហើបថា មិនមែនគម្រោងដាក់បណ្ដឹងពីបទបង្ខូចកិត្តិយស និងបំផ្លើសការពិត ក្រោយការចុះផ្សាយនោះ។ នៅក្នុងម៉ោង Live កាលពីរសៀលថ្ងៃទី១៨ មិថុនា ស្វាមីរបស់អ្នកនាងត្រូវគេឃើញមានវត្តមាននៅក្បែរ ដោយអ្នកនាងបញ្ជាក់ថាដោយសារតែចំថ្ងៃសម្រាកទើបស្វាមីអ្នកនាងទំនេរបាននៅផ្ទះ។
យ៉ាងណាមិញ លោក ហេន ឌ្រី ស្វាមីអ្នកនាង Love Riya ក៏មិនខុសគ្នាដែរ បានបង្ហាញប្រតិកម្មថា លោកមិនដែលដើរលេងដាច់យប់ និងរឹតមិនធ្លាប់មានរឿងមិនចុះសម្រុងជាមួយនឹងភរិយានោះ ដោយមានតែអាណិតភរិយាទ្វេរដង ដែលពរពោះផង នៅប្រឹងរកលុយតាមអនឡាញយ៉ាងសកម្ម។ លោកថាខ្លួននៅឆ្ងាយពីភរិយា តែពេលមានធុរៈចុះស្ដា ពេលរៀនពេទ្យ និងពេលទៅក្រៅម្ដងៗតែម្ដង បើក្រៅពីនោះ គឺមិនដែលនៅឆ្ងាយពីភរិយាឡើយ។ លោកថា អ្នកនាង Love Riya ដ្បិតថាមានវ័យច្រើនជាងលោកបន្តិចមែន ប៉ុន្តែបើលោកក្មេងតែអាយុ ហើយសង្ហារតែរូបរាង តែខ្វះគំនិត ក៍ភរិយារបស់លោក មិនយកធ្វើភរិយានោះដែរ។ លោកចាត់ទុកថា ព័ត៌មានដែលបង្ខូចឈ្មោះពីលោក មានបំណងចង់បំបែកបំបាក់ទំនាក់ល្អរវាងខ្លួន និងភរិយា ខណៈដែលគ្រាន់តែចេញដំណឹងអកុសលនោះភ្លាម អ្នកខ្លះមិនដឹង ក៏មាក់ងាយលោក និងភរិយា ដោយស្មានថាពួកខ្លួន មិនចេះរក្សាចំណងអាពាហ៍ពិពាហ៍ក្រោយរៀបការ។លោកថាមិនត្រូវការប្ដឹងផ្ដល់នោះទេ ប៉ុន្តែបើមានការបង្ខូចឈ្មោះណាមួយ ធ្វើអោយប៉ះពាល់ដល់កិត្តិយសទៀត លោក និងភរិយា នឹងមានវិធានការ៕
