ក្រុមម្ចាស់ជើងឯកប្រចាំទ្វីបអាហ្វ្រិក កាមេរូន មិនបានជួបលទ្ធផលជាវិជ្ជមានឡើយក្នុងការប្រកួតបើកឆាកនៃពូល B ក្នុងព្រឹត្តិការណ៍ Confederations Cup របស់ពួកគេ ដោយសារតែក្រុមបាល់ទាត់ជម្រើសជាតិស៊ីលីបានផ្តួលពួកគេក្នុងលទ្ធផល 2-០ ក្នុងការប្រកួតនៅទីក្រុង Moscow កាលពីថ្ងៃអាទិត្យ។
ស្របពេលដែលការប្រកួតនេះហាក់ដូចជាត្រូវបញ្ចប់ក្នុងលទ្ធផលស្មើទៅហើយនោះ ស្រាប់តែខ្សែបម្រើប្រយុទ្ធ Arturo Vidal បានទម្លុះតំបន់ការពារ និងរកគ្រាប់បាល់បើកឆាកបាននៅរយៈពេល10នាទីចុងក្រោយ មុនពេល Eduardo Vargas បានបង្ហាញពីទម្រង់លេងយ៉ាងល្អ ហើយរកគ្រាប់បាល់ទី2បានសម្រាប់ស៊ីលី។ អ្នកចាំទី Jospeh Ondoa របស់ក្រុមជម្រើសជាតិកាមេរូន ត្រូវបំពេញការងារជាច្រើនក្នុងតង់ទី1 ខណៈដែលរូបគេក៏បានសង្គ្រោះបាល់យ៉ាងល្អផងដែរនៅនាទីទី1ពីការស៊ុតរបស់កីឡាករ Vargas។
ស្របពេលពេលជាមួយគ្នានេះដែរ ក្រុមជម្រើសជាតិម៉ិកស៊ិក បានរកគ្រាប់បាល់តាមស្មើនៅពេលជិតបញ្ចប់ការប្រកួត ដោយបានផ្តល់នូវការខកចិត្តដល់ក្រុមជម្រើសជាតិ ព័រទុយហ្គាល់ ក្នុងការប្រកួតលើពូល A នៃយុទ្ធនាការ Confederations Cupនេះដែរ ដោយក្រុមទាំងពីរបានបញ្ចប់ក្នុងលទ្ធផល 2 – 2 នៅកីឡដ្ឋាន Kazan Arena កាលពីថ្ងៃអាទិត្យ។ កីឡាករ Ricardo Quaresma បានរកគ្រាប់បាល់បើកឆាកសម្រាប់ព័រទុយហ្គាល់ ប៉ុន្តែខ្សែប្រយុទ្ធ Javier Hernandez បានរកគ្រាប់បាល់តាមស្មើវិញនៅពេលជិតបញ្ចប់តង់ទី1 មុនពេល Cedric បានរក្សាឲ្យក្រុមខ្លួនមានគ្រាប់បាល់នាំមុខជាថ្មី នៅជិតបញ្ចប់ការប្រកួត តែទោះបីជាយ៉ាងណា ម៉ិកស៊ិក បានតាមស្មើវិញនៅនាទីបន្ថែម តាមរយៈគ្រាប់បាល់របស់កីឡាករ Hector Moreno។
លោក Fernando Santos គ្រូបង្វឹកនៃក្រុមជម្រើសជាតិព័រទុយហ្គាល់ បានឲ្យដឹងថា៖ «យើងគួរតែអាចបង្រ្កាបការប្រកួតនេះបាន ប៉ុន្តែវាមិនបានកើតឡើងឡើយ។ ពិតណាស់ លទ្ធផលស្មើ គឺជាលទ្ធផលដ៏យុត្តិធម៌»៕
ប្រភពពី៖ Sport24
