ធ្វើដំណើរទៅកម្សាន្តនៅខាងក្រៅ ស្បែករបស់អ្នកពិតជាគេចមិនផុតពីត្រូវប្រឈមនឹងការបំផ្លាញពីអាកាសធាតុដែលក្តៅផង មានខ្យល់ធ្លាក់ផង បន្ថែមដោយកាំរស្មីពីពន្លឺថ្ងៃផងនោះឡើយ។ ប៉ុន្តែប្រសិនបើអ្នកដឹងពីរបៀបនៃការថែរក្សាស្បែកឱ្យបានល្អវិញនោះ មិនថាអ្នកទៅប៉ះនឹងទឹកសមុទ្រ ប៉ះខ្យល់ ឬប៉ះនឹងកម្តៅថ្ងៃនៅលើភ្នំ ឬកន្លែងណានោះទេ គឺអ្នកពិតជាមិនចាំបាច់ត្រូវគិតខ្វាយខ្វល់ច្រើនឡើយ។ តាមរយៈគន្លឹះងាយៗមួយចំនួនខាងក្រោមនេះ គឺពិតជាអាចជួយឱ្យអ្នកមានអារម្មណ៍ស្រស់ស្រាយ និងជឿជាក់ជាងមុនជាមិនខាននៅក្នុងដំណើរកម្សាន្តនៅចុងឆ្នាំនេះ។
ប្រើឡេថែរក្សាស្បែករាល់ថ្ងៃ ជាពិសេសបន្ទាប់ពីងូតទឹករួច។ ក្នុងករណីដែលអ្នកទៅលេងទឹកសមុទ្រអ្នកគួរតែលាបឡេថែរក្សាស្បែក ដើម្បីបន្ថែមសំណើម និងការពារស្បែកពីខ្យល់ និងទឹកសមុទ្រ។
ស្បែកដៃមានសភាពស្តើងជាងកន្លែងផ្សេងៗដូច្នេះអ្នកត្រូវលាបក្រែមផ្តល់សំណើមឱ្យស្បែកដៃមុនពេលចូលគេង ហើយក៏ត្រូវពាក់ស្រោមដៃផងដែរ នៅពេលដែលអ្នកត្រូវចេញទៅខាងក្រៅ។
ការងូតទឹកក្តៅអាចធ្វើឱ្យអ្នកមានអារម្មណ៍ល្អនៅពេលអាកាសធាតុរងា ប៉ុន្តែវាក៏ជាមូលហេតុនៃការបំផ្លាញស្បែកដែរ។ ដើម្បីចៀសឱ្យផុតពីបញ្ហាស្បែកស្ងួតអ្នកគួរងូតទឹកជាមួយទឹកក្តៅឧណ្ហៗ ហើយជូតខ្លួនឱ្យស្ងួតដោយកន្សែងពោះគោទន់។
អ្នកពិតជាមិនចង់ឱ្យអ្នកទេសចរដូចគ្នាបានឃើញបបូរមាត់របស់អ្នកប្រេះបែកក្រហែងទេមែនទេ? បើដូច្នេះអ្នកគួរកុំលិតបបូរមាត់ ហើយប្រើក្រែមលាបមាត់ជាមួយនឹង SPF 15 ព្រោះវាអាចជួយកែបញ្ហាប្រេះបែកនៃបបូរមាត់បាន ព្រមទាំងអាចការពារបបូរមាត់របស់អ្នកពីការបំផ្លាញនៃកម្តៅថ្ងៃ។
ដើរលេងក្រោមកម្តៅថ្ងៃស្រូបយកខ្យល់បរិសុទ្ធ វាពិតជាសប្បាយណាស់ ប៉ុន្តែវាក៏បង្កប់ទៅដោយការបំផ្លាញដល់ស្បែកផងដែរ។ អ្នកត្រូវប្រាកដក្នុងចិត្តថា មុនពេលចេញដំណើរ15នាទី អ្នកត្រូវលាបឡេការពារកម្តៅថ្ងៃឱ្យបានល្អ។
មុនពេលកក់សក់មួយម៉ោង ឬមួយយប់ អ្នកគួរម៉ាស្សាស្បែកក្បាល ដើម្បីជួយជំរុញដល់ចលនាឈាមរត់។ ប្រើប្រេងជំនួយសក់ក្រោយពេលងូតទឹករួច ដើម្បីការពារ និងកាត់បន្ថយសភាពសក់ដែលបែកចុង។
ចាប់ផ្តើមចេញដំណើរកម្សាន្តក្រោមពន្លឺព្រះអាទិត្យភ្លាម ត្រូវការពារសក់ឱ្យបានល្អ ដោយការពាក់មួក (តែមិនត្រូវប្រើមួកចង្អៀតពេកនោះទេ)ព្រោះវាអាចជួយការពារសក់មិនឱ្យសំពោង ដោយសារខ្យល់ស្ងួត និងកម្តៅថ្ងៃ៕
