ចាន់ រតនា ជាកីឡាករគុនខ្មែរមួយរូបដែលធ្វើបានល្អមែនទែន ដោយប្រកួតលើសង្វៀន MMA បាន 8ដងមិនដែលចាញ់សោះ ក្នុងកំណត់ត្រាឈ្នះ5 និងស្មើ3 ដោយលើកចុងក្រោយបានយកឈ្នះកីឡាករឥណ្ឌូនេស៊ី 2នាក់ជាប់ៗគ្នា។
ជាធម្មតា កីឡាករដែលប្រកួតឈ្នះពី 3ទៅ4លើកជាប់គ្នាលើសង្វៀនមួយនេះ ស្ថាប័នONE Championship តែងតែផ្តល់ឳកាសក្នុងការប្រកួតដណ្តើមខ្សែក្រវាត់ណាមួយនាពេលបន្ទាប់ ដោយនឹងតម្រូវឱ្យប៉ះជាមួយកីឡាករម្ចាស់ខ្សែក្រវាត់ ឬជើងខ្លាំងណាម្នាក់ជាមិនខាន។
ជាក់ស្តែងកាលពីពេលថ្មីៗនេះ ONE Championship បានបង្ហោះវីដេអូដែល ចាន់ រតនា ផ្តួលគូប្រកួតឱ្យសន្លប់ 2ប្រកួតចុងក្រោយ ហើយបានប្រកាសឱ្យទស្សនិកជនជួយស្វែងរកគូប្រកួតដែលស័ក្តិសមនឹងរូបគេបំផុតសម្រាប់ការប្រកួតបន្ទាប់ក្នុងដំណើរឈានទៅរកការប្រកួតដណ្ដើមខ្សែក្រវាត់ពិភពលោករបស់ស្ថាប័នមួយនេះ៕
