អាការហើមភ្នែកតែងកើតឡើងជារឿយៗចំពោះមនុស្សគ្រប់វ័យ នៅពេលដែលអ្នកសម្រាកមិនគ្រប់គ្រាន់ ឬប្រើប្រាស់ភ្នែកសម្លឹងអេក្រង់កំព្យូទ័រខ្លាំងហួសកម្រិត និងច្រើនម៉ោង។ ចំពោះដំណោះស្រាយអាការហើមភ្នែកក៏មានច្រើនយ៉ាងផងដែរ ដោយអ្នកអាចប្រើប្រាស់កាកកាហ្វេ ស្អំទឹកកក ឬស្អំចំណិតត្រសក់ជាដើម។ តែដោយឡែក ទស្សនាវដ្ដី ឡារ៉ែន នឹងជម្រាបជូនអំពីវិធីងាយៗ ដែលជួយកាត់បន្ថយអាការហើមភ្នែកយ៉ាងមានប្រសិទ្ធភាព។
ជាដំបូងអ្នកត្រូវស្វែងយល់ជាមុនសិនថា តើត្របកភ្នែករបស់អ្នកហើមដោយសារអ្វី? បើទោះបីជាភាគច្រើនមានការសង្ស័យលើការគេងមិនបានគ្រប់គ្រាន់ ដែលបណ្តាលឱ្យភ្នែកទៅជាហើមនៅពេលព្រឹកឡើង។ ប៉ុន្តែតើអ្នកមានដឹងទេថា ក្រៅពីគេងមិនគ្រប់ ក៏មានកត្តាច្រើនទៀត ដែលនាំឱ្យភ្នែកហើមបានផងដែរ។ អ្នកអាចពិនិត្យមើលនូវកត្តាមួយចំនួនដូចខាងក្រោមនេះ ៖
• រលាកភ្នែក
ការហើមភ្នែក ក៏អាចជាអាការដ៏ញឹកញាប់មួយនៃអាការរលាកភ្នែកផងដែរ។ រឿងផ្សេងៗដូចជា ការគេងនៅលើខ្នើយដែលមានធូលីដីច្រើន ភួយចាស់ៗ និងដុះផ្សិត សុទ្ធតែជារបស់ដែលអាចបណ្តាលឱ្យមានប្រតិកម្មងាយរលាក-ភ្នែក និងមានបញ្ហាស្បែក ដែលបង្កជាការហើមភ្នែកបានទាំងអស់។
• អាកាសធាតុក្តៅហែង
ការអង្គុយនៅក្នុងបន្ទប់ ឬកន្លែងដែលមានអាកាសធាតុក្តៅ អាចធ្វើឱ្យភ្នែករបស់អ្នកឡើងស្ងួត និងងាយរលាកជាងធម្មតា។ នេះដោយសារតែកម្តៅអាចធ្វើឱ្យភ្នាសមានទឹករំអិលក្នុងភ្នែកស្ងួត ជាពិសេសនៅបរិវេញជុំវិញភ្នែក ដែលជាហេតុនាំឱ្យភ្នែកទៅជារលាក និងហើមបាន។
• ការយំ
រឿងនេះនរណាក៏ដឹងដែរថា ការយំបណ្តាលឱ្យហើមភ្នែកបាន។ វាគឺជាការផលិតក្រពេញទឹកភ្នែកនៅក្នុងភ្នែក ហើយកាលណាការផលិតទឹកភ្នែកច្រើនជ្រុលពេក វាអាចបណ្តាលឱ្យជាលិកាជុំវិញភ្នែកទៅជាប៉ោងហើមបាន។
• ការមករដូវ
អ្នកអាចបន្ទោសការហើមភ្នែកនេះ ដោយសារតែការមករដូវបាន។ ធម្មតាភ្នែករបស់អ្នកមានបញ្ហាដោយសារកង្វះជាតិទឹកនៅក្នុងរាងកាយ ក្នុងអំឡុងពេលមករដូវប្រចាំខែ ភ្នែកក៏ក្លាយទៅជាហើមតែម្តងទៅ វាមិនខុសគ្នានឹងការហើមពោះក្នុងពេលមករដូវនោះទេ។ នោះក៏ដោយសារតែអ្នកទទួលទានទឹកមិនបានគ្រប់គ្រាន់ហ្នឹងឯង។
• កង្វះអ័រម៉ូនទីរ៉ូអុីត
ការហើមភ្នែកអាចជាផលរំខានមួយនៃជំងឺកង្វះអ័រម៉ូនទីរ៉ូអុីត។ ប្រសិនជាអ្នកមានជំងឺនេះមែន អ្នកពិតជាអាចមើលឃើញភាពក្រាសនៃខ្លាញ់នៅជុំវិញបរិវេណភ្នែករបស់អ្នក ដែលវាជាហេតុនាំឱ្យហើមភ្នែក។
• គ្រឿងស្រវឹង
គ្រឿងស្រវឹងមិនគ្រាន់តែអាចបង្កឱ្យរាងកាយខ្សោះជាតិទឹកនោះទេ តែក៏បណ្តាលឱ្យភ្នែកស្ងួត និងហើមបានដែរ។ មនុស្សភាគច្រើនមាននិន្នាការទទួលទានអាហារមានរសជាតិប្រៃច្រើនជាមួយគ្រឿងស្រវឹង ដូច្នេះវាអាចនឹងទាញយកជាតិទឹកចូលទៅក្នុងបរិវេណភ្នែកបានផងដែរ។
បើទោះបីជាភ្នែករបស់អ្នកហើមយ៉ាងណាក៏ដោយ តែយើងនៅមានដំណោះស្រាយ ដែលអាចព្យាបាលដោយចំណាយថវិកាអស់តិច តែមានប្រសិទ្ធខ្ពស់ និងមិនប៉ះពាល់ដល់សរសៃភ្នែក និងកែវភ្នែក។ សូមសាកល្បងវិធីដូចខាងក្រោមនេះ ៖
1. យកផ្លែត្រសក់មកក្លាស្សេឱ្យត្រជាក់ ហើយហាន់ជាចំណិតស្តើងៗ រួចយកវាមកដាក់នៅលើត្របកភ្នែកទាំងសងខាងរបស់អ្នក ដោយបិទភ្នែកសម្រាកឱ្យបានពី10-20នាទី។
2. យកថង់តែដែលឆុងរួចមកក្លាស្សេឱ្យត្រជាក់ រួចសឹមយកមកដាក់ស្អំនៅលើត្របកភ្នែកទាំងសងខាង ដោយសម្រាកឱ្យបានយូរបន្តិច។
3. យកក្រណាត់ស្អាតមកជ្រលក់ទឹកត្រជាក់ រួចយកមកស្អំនៅលើភ្នែក ដោយបិទភ្នែកគេងប្រមាណ10-20នាទីជាការស្រេច។
4. ដើម្បីបន្ថយអាការហើមភ្នែក អ្នកគ្រាន់តែយកស្លាបព្រាដាក់ក្លាស្សេក្នុងថតកករឹងនៃទូទឹកកក ទុកចោលមួយយប់ ពេលភ្ញាក់ឡើង ចូរយកស្លាព្រាដែលកំពុងត្រជាក់ខ្លាំងនោះមកស្អំនៅជុំវិញភ្នែក រហូតដល់ស្លាបព្រាចាប់ផ្តើមក្តៅឧណ្ហៗវិញ។ គ្រាន់តែអនុវត្តវិធីដែលបានរៀបរាប់ពីខាងលើតែប៉ុណ្ណេះ នោះភ្នែករបស់អ្នកនឹងបាត់ហើមជាមិនខាន៕
