សម្រាប់ iPhone 11 គឺដូចគ្នានឹងដំណឹងដែលបានលេចឮកន្លងមកដែរ ដោយ iPhone ស៊េរីថ្មីទាំង2 នឹងមានបំពាក់អេក្រង់ OLED ទំហំ 5.8អ៊ីញ និងទំហំ 6.5អ៊ីញ តែអ្វីដែលឱ្យគួរសោកស្ដាយនោះ គឺស្នាមខាងមុខ មិនទាន់ផ្លាស់ប្ដូរទំហំនៅឡើយ។
ដោយសារតែនៅយូរខែទៀតទើប iPhone ស៊េរីថ្មី និង iOS 13 ប្រកាសចេញជាផ្លូវការ។ ប៉ុន្តែមានប្រភពព័ត៌មានចំនួន2 បានចែករំលែកដំណឹងសំខាន់ៗមួយចំនួនស្ដីអំពី iPhone ជំនាន់ថ្មី និងប្រព័ន្ធប្រតិបត្តិការជំនាន់ចុងក្រោយផងដែរ។
យ៉ាងណាក្ដី ប្រភពទាំងនោះបានលើកឡើងថា មុខងារ FaceID នឹងមានសមត្ថភាពខ្លាំងជាងមុនលើការដោះសោ។ ឧទាហរណ៍ ដូចជាអាចចំណាំផ្ទៃមុខបានក្នុងទំហំធំទូលាយជាងមុន។ រន្ធបំពងសំឡេងបែប Stereo ក៏នឹងមានសមត្ថភាពប្រសើរជាងមុខដែរ។
ឯកាមេរ៉ាវិញ iPhone ឆ្នាំ2019 នឹងមានបំពាក់កាមេរ៉ា 3 នៅខាងក្រោយ ដោយមួយជាកាមេរ៉ាធម្មតា មួយទៀតជាកាមេរ៉ា Zoom និងមួយថ្មីទៀតជាកាមេរ៉ា Ultra-Wide។
កាមេរ៉ាទី 3នេះ ដើមឡើយត្រូវមានមុខងាររក្សាលំនឹង OIS ប៉ុន្តែ Apple បានសម្រេចទុកប្រើលើ iPhone ឆ្នាំ2020 ។ ដូចនេះមុខងារ OIS នឹងមានតែនៅលើកាមេរ៉ាមេ និងកាមេរ៉ា Zoom ប៉ុណ្ណោះ។
ចំពោះកាមេរ៉ា Wide-Angle វិញ អាចផ្ដិតយករូបភាពក្នុងទំហំ 120ដឺក្រេ។ ទំហំនេះមិនធំជាងគេណាស់ណាទេ ប៉ុន្តែក៏មិនតូចជាងកាមេរ៉ារបស់គូប្រជែងផ្សេងទៀតដែរ។ តែអ្វីដែលគួរចាប់អារម្មណ៍នោះគឺ ភ្លើង LED នៅខាងក្រោយនឹងមិនឡើងទំហំទេ ប៉ុន្តែនឹងអាចជះពន្លឺបានភ្លឺ និងធំជាងមុន។ ចំណែកឯកម្រាស់នៃកាមេរ៉ានឹងស្ដើងជាងមុន មិនលៀនចេញមកខ្លាំងដូចមុនឡើយ៕
