ផ្នត់គំនិតមានសារៈសំខាន់ខ្លាំងណាស់សម្រាប់មនុស្សម្នាក់ៗក្នុងការរៀបចំដំណើរជីវិតឱ្យក្លាយជាមនុស្សមានឥទ្ធិពល សមិទ្ធផល និងភាពរឹងមាំសម្រាប់អភិវឌ្ឍសមត្ថភាពរបស់ខ្លួនឱ្យបានខ្លាំង ក៏ដូចជាការចូលរួមចំណែកក្នុងការអភិវឌ្ឍសង្គមជាដើម។
លោកឧកញ៉ា ចេង ខេង អគ្គនាយកក្រុមហ៊ុន CPL បានបង្ហាញពីវិធីសាស្ត្រសំខាន់ៗមួយចំនួនដើម្បីរៀបចំដំណើរជីវិតឱ្យទទួលបានលទ្ធផលល្អ ជោគជ័យ និងមានសុភមង្គលសម្រាប់ការរស់នៅ។ លោកឧកញ៉ាបានលើកឡើងថា ចំណុចទី1 ដែលគួរគិតគឺការរៀបចំពេលវេលា។ ពេលវេលាសំខាន់ខ្លាំងណាស់សម្រាប់មនុស្សម្នាក់ៗ ព្រោះមនុស្សម្នាក់ៗមានពេលវេលា1ថ្ងៃ 24ម៉ោងដូចគ្នា តែមនុស្សខ្លះទទួលបានលទ្ធផលល្អធ្វើបានរឿងជាច្រើនក្នុង 1ថ្ងៃៗ តែមនុស្សខ្លះធ្វើសកម្មភាពបានតិច ឬធ្វើច្រើនតែទទួលបានលទ្ធផលតិចជាដើម។ ដើម្បីឱ្យការគ្រប់គ្រងពេលវេលាអាចធ្វើទៅបានល្អ យើងម្នាក់ៗត្រូវចេះរៀបចំតារាងពេលវេលា និងកំណត់បុគ្គលគោលដៅដើម្បីការប្រាស្រ័យទាក់ទង។ប្រសិនបើយើងរៀបចំត្រូវ យើងនឹងទទួលបានលទ្ធផលច្រើនលើសពីការរំពឹងទុក ហើយពី 1ខែទៅ1ខែ យើងនឹងអភិវឌ្ឍជាប់រហូត តែប្រសិនបើយើងរៀបចំមិនបានល្អវិញ យើងទាក់ទងមនុស្សច្រើនក្នុង 1ថ្ងៃៗ តែពេលខ្លះក្នុងចំណោមមនុស្ស 20នាក់ដែលយើងទំនាក់ទំនងនោះ មានតិចបំផុតដែលអាចទទួលបានលទ្ធផល។
លោកឧកញ៉ា ចេង ខេង បានមានប្រសាសន៍ថា៖ “សម្រាប់ក្រុមហ៊ុនខ្ញុំ ខ្ញុំឱ្យបុគ្គលិកជ្រើសរើសមនុស្សត្រឹមតែ 10នាក់ប៉ុណ្ណោះដើម្បីទាក់ទងក្នុង 1ថ្ងៃ តែមនុស្សទាំងអស់នោះត្រូវតែជាមនុស្សដែលមានលទ្ធភាព ឬមានគុណភាពសម្រាប់ការទំនាក់ទំនងចំគោលដៅ។ ចំនួននេះមិនច្រើនទេ តែប្រសិនបើយើងគិតទៅក្នុងរយៈពេលធ្វើការងារ 1ខែ 24ថ្ងៃ យ៉ាងហោចណាស់យើងបានទំនាក់ទំនងមនុស្ស 240នាក់ដែរ។ ក្នុងចំណោម 240នាក់នោះ យ៉ាងហោចណាស់ក៏មាន 10នាក់ដែរដែលចាប់អារម្មណ៍ និងទទួលយកសេវាកម្មរបស់យើង ហេតុនេះហើយទើបយើងអាចអភិវឌ្ឍបានលឿន”។
អ្នកជំនួញផ្នែកអចលនទ្រព្យដ៏មានឥទ្ធិពលរូបនេះក៏បានលើកឡើងផងដែរថា ចំណុចទី2 គឺយើងត្រូវតែជាមនុស្សដែលចេះគ្រប់គ្រង និងពិចារណាពីធនធាននៃការធ្វើការងារ។ ពេលធ្វើការងារ យើងគួរចេះសិក្សាវិភាគមើលថា តើយើងចំណាយសាំងអស់ប៉ុន្មាន? ចំណាយលើសេវាផ្សេងៗអស់ប៉ុន្មាន? ហើយអ្វីដែលយើងទទួលបានមកវិញ តើស័ក្តិសមនឹងការខិតខំប្រឹងប្រែង និងការចំណាយនោះដែរឬទេ?។ ប្រសិនបើយើងគិតគូរពិចារណាបានច្បាស់លាស់ យើងនឹងអាចរៀបចំដំណើរជីវិតប្រកបដោយការអភិវឌ្ឍជាវិជ្ជមានមិនខាន។ លើសពីនេះទៅទៀត សកម្មភាពរបស់យើងក៏អាចធ្វើទៅបានទទួលជោគជ័យច្រើនជាងការខាតបង់ដែរ។
បន្ទាប់ពីថ្លឹងថ្លែងពីចំណុចខាងលើនេះហើយ ចំណុចទី3 គឺយើងចាំបាច់ត្រូវតែជាមនុស្សដែលមានផ្នត់គំនិតធ្វើការងារដោយមានការផ្តោតខ្ពស់។ ការផ្តោត (Focus) សំខាន់ខ្លាំងណាស់សម្រាប់មនុស្សម្នាក់ៗ ព្រោះវាអាចធ្វើឱ្យយើងធ្វើការងារបានលឿន មានរបៀបរៀបរយ និងយកចិត្តទុកដាក់ខ្ពស់បំផុត។ ការងារណាក៏ដោយប្រសិនបើយើងផ្តោតបានល្អ ច្បាស់ណាស់ វាគ្មានអ្វីមករំខានយើងបាននោះទេ ព្រោះមនុស្សម្នាក់ៗមានការគិត ឬមានរឿងច្រើនក្នុង 1ថ្ងៃៗដែលចូលមកក្នុងជីវិតឱ្យយើងងាករេ ឬដោះស្រាយ តែប្រសិនបើយើងអាចជម្រុះរឿងមិនចាំបាច់ចោល ហើយផ្តោតខ្លាំងតែលើគោលដៅ យើងនឹងអាចធ្វើការងារនោះឱ្យមុតស្រួចរហូតសម្រេចបានច្បាស់លាស់ ទើបលែងដៃទៅគិតរឿងផ្សេងៗទៀត។
លោកឧកញ៉ា ចេង ខេង បាននិយាយថា៖ “ការផ្តោតរបស់យើងគឺប្រៀបបានទៅនឹងដំណើរកសាងជោគជ័យរបស់ព្រះពុទ្ធដែលចេញទៅបួសដើម្បីជួយមនុស្សដូច្នោះដែរ។ មិនថាមានរឿងអ្នកនៅជុំវិញខ្លួន ការរំខានពីខាងក្រៅ ឬពីផ្នែកណានោះទេ អ្វីដែលសំខាន់ គឺផ្តោតតែម្យ៉ាងគត់ គឺរក្សាសីលរហូតត្រាស់ដឹង។ ហេតុនេះប្រសិនបើយើងធ្វើការងារដោយឆន្ទៈនិងការផ្តោតខ្ពស់ អ្វីក៏យើងអាចធ្វើបានដែរ”។
ចំណុចសំខាន់ទី4 ចុងក្រោយ គឺបន្ទាប់ពីមានការផ្តោតហើយ យើងចាំបាច់ត្រូវមានផែនការច្បាស់លាស់ដើម្បីឱ្យការតាំងចិត្តរបស់យើងកាន់តែមុតស្រួច និងត្រៀមខ្លួនជានិច្ចដើម្បីដោះស្រាយបញ្ហាប្រឈមនានានៅលើផ្លូវទៅកាន់ភាពជោគជ័យ។ កាលណាប្រជាជនខ្មែរយើងមានផ្នត់គំនិតវិជ្ជមាន ជាមនុស្សមានប្រសិទ្ធភាពខ្ពស់ នោះយើងនឹងអាចក្លាយជាមនុស្សរីកចម្រើន មានលុយមានកាក់ និងមានសមត្ថភាពក្នុងការចូលរួមចំណែកអភិវឌ្ឍន៍។ ពេលនោះ សង្គមរបស់យើងក៏ប្រាកដជាអាចអភិវឌ្ឍខ្លាំងក្លាបានទៅតាមនោះដែរ ព្រោះប្រជាជនជាកោសិកាយ៉ាងសំខាន់សម្រាប់សង្គមជាតិ៕
