ធនាគារពាណិជ្ជនានានៅកម្ពុជាបាននិងកំពុងបង្កើនដើមទុនក្នុងការផ្តល់កម្ចីដល់វិស័យអចលនទ្រព្យ និងកម្ចីសម្រាប់វិស័យសំណង់មានចំនួនជាង30% នៃផលបត្ររបស់ពួកគេ ដែលភាគរយនៃប្រាក់កម្ចីទាក់ទងនឹងអចលនទ្រព្យមានការកើនឡើងយ៉ាងខ្លាំងបើធៀបនឹងឆ្នាំមុនៗ និងស្របពេលជាមួយនឹងការវិនិយោគផ្ទាល់ពីបរទេសធំៗ ដែលភាគច្រើនមកពីប្រទេសចិន។ នេះបើយោងតាមធនាគារជាតិនៃកម្ពុជា។
យោងតាមរបាយការណ៍នៃធនាគារជាតិនៃកម្ពុជាបានបង្ហាញថា វិស័យអចលនទ្រព្យត្រូវបានគាំទ្រដោយលំហូរចូលវិនិយោគផ្ទាល់ពីបរទេស(FDI)ដល់សកម្មភាពសំណង់ និងអចលនទ្រព្យដែលមានចំនួន20% នៃការវិនិយោគផ្ទាល់ពីបរទេសសរុបនៅឆ្នាំ2018 និងកើនឡើង27.5%។
ជាមួយគ្នានេះផងដែរ ធនាគារក៏បានពង្រីកឥណទានយ៉ាងឆាប់រហ័សដល់វិស័យអចលនទ្រព្យ និងផលិតផលហិរញ្ញវត្ថុ ដែលទាក់ទងនឹងប្រាក់កម្ចីអចលនទ្រព្យពី16.5% នៃឥណទានសរុបក្នុងឆ្នាំ2012 ដល់27.6% នៅឆ្នាំ2018។ ទន្ទឹមនឹងនេះដែរ ប្រាក់កម្ចីពីធនាគារដល់វិស័យសំណង់និងសកម្មភាពអចលនទ្រព្យ ដែលមានប្រហែល17.1%នៃប្រាក់កម្ចីធនាគារសរុបបានកើនឡើង35.4%នៅក្នុងឆ្នាំ2018។
យ៉ាងណាក្ដី នៅក្នុងរបាយការណ៍ឥណទានប្រចាំឆ្នាំរបស់ខ្លួន ក្រុមហ៊ុន Moody’s Investors Service Inc. និងភ្នាក់ងារស្រាវជ្រាវសេដ្ឋកិច្ចបានកត់សម្គាល់ថា សេដ្ឋកិច្ចកម្ពុជាកំពុងស្ថិតក្នុងល្បឿនមួយជាមួយនឹងកំណើនប្រកបដោយស្ថិរភាព ដោយ-សារតែមានការវិនិយោគដោយផ្ទាល់ពីប្រទេសចិននៅក្នុងវិស័យអចលនទ្រព្យ។
ប៉ុន្តែរបាយការណ៍នេះក៏បានព្រមានដែរថា“ការពឹងផ្អែករបស់វិស័យធនាគារទៅលើវិស័យអចលនទ្រព្យ អាចធ្វើឱ្យវិស័យហិរញ្ញវត្ថុជួបហានិភ័យ ប្រសិនបើការវិនិយោគពីបរទេសលែងហូរចូលកម្ពុជា ដោយសារការប្រែប្រួលនៃសេដ្ឋកិច្ចពិភពលោក ជាពិសេសសង្គ្រាមពាណិជ្ជកម្មអាមេរិក-ចិន និងការព្រួយបារម្ភពីវិបត្តិសេដ្ឋកិច្ចពិភពលោក”។
ធនាគារក្នុងស្រុកកំពុងចាប់ផ្តើមគិតគូរពីភាគរយនៃប្រាក់កម្ចីអចលនទ្រព្យនៃផលបត្រសរុបរបស់ពួកគេ ដោយធ្វើតាមការក្រើនរំឭកពីធនាគារជាតិ អំពីការផ្តល់កម្ចីច្រើនពេកដល់បុគ្គល ឬអង្គភាពដោយគ្មានកំណត់ត្រាហិរញ្ញវត្ថុត្រឹមត្រូវ។
ជាក់ស្តែងអតិថិជនមួយរូប ដែលទទួលបានកម្ចីសម្រាប់ការទិញអចលនទ្រព្យបានលើកឡើងថា មួយរយៈចុងក្រោយនេះ ការខ្ចីជាលក្ខណៈបុគ្គលដើម្បីទិញអចលនទ្រព្យ(ផ្ទះ)គឺមានកាន់តែច្រើនឡើង ដោយសារតែភាពងាយស្រួលនៃការទទួលបានកម្ចី និងការប្រកួតប្រជែងល្អប្រសើរជាងមុនពាក់ព័ន្ធនឹងអត្រាការប្រាក់ពីធនាគារដែលប្រកួតប្រជែងគ្នា តែក៏ជាបញ្ហាប្រឈមផងដែរ នៅពេលមានការ-ផ្តល់ជូននូវការខ្ចីខាងអចលនទ្រព្យពុំបានគិតដល់លទ្ធភាពបង់សងវិញរបស់អ្នកខ្ចី។
ជាមួយគ្នានេះដែរ ស្ថានភាពវិនិយោគនៅក្នុងប្រទេសកម្ពុជារយៈពេលប៉ុន្មានឆ្នាំមកនេះ នៅតែមានភាពល្អប្រសើរ ពោលគឺចាប់តាំងពីជួបវិបត្តិហិរញ្ញវត្ថុអំឡុងឆ្នាំ2008 មក ក្នុងនោះលំហូរទុនវិនិយោគទាំងក្នុង និងក្រៅប្រទេសបានដើរតួជាកត្តាសំខាន់ដែលជំរុញកំណើនសេដ្ឋកិច្ចកម្ពុជាឱ្យស្ថិតក្នុងរង្វង់ប្រមាណ 7%ក្នុង 1ឆ្នាំ ។ ជាក់ស្ដែងសម្រាប់រយៈពេល 4ខែដើមឆ្នាំ2019 នេះ គម្រោងវិនិយោគប្រមាណ 115គម្រោង ដែលមានទឹកប្រាក់ប្រមាណ 4ពាន់លានដុល្លារអាមេរិកត្រូវបានអនុម័តជាបន្តបន្ទាប់។
ក្នុងរយៈពេល 5ឆ្នាំចុងក្រោយ គិតចាប់ពីឆ្នាំ2014 ដល់ឆ្នាំ2018 កម្ពុជាបានអនុម័តគម្រោងវិនិយោគសរុបចំនួន 959គម្រោង ដែលមានទុនវិនិយោគសរុបប្រមាណ 23ពាន់លានដុល្លារអាមេរិក និងអាចបង្កើតការងារបានចំនួន 1លានកន្លែងជូនពលរដ្ឋក្នុងស្រុក។ នេះបើយោងតាមប្រសាសន៍
សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ សម្តេចតេជោ ហ៊ុន សែន បានមានប្រសាសន៍ថា៖ “ដោយឡែកក្នុងរយៈពេល 4ខែដើមឆ្នាំ2019 នេះ គម្រោងវិនិយោគដែលកម្ពុជាបានអនុម័ត មានចំនួន 115គម្រោងរួចហើយដែរ ដែលមានទឹកប្រាក់វិនិយោគសរុបប្រមាណ 4ពាន់លានដុល្លារអាមេរិក ហើយបើប្រៀបធៀបទៅនឹងរយៈពេលដូចគ្នាក្នុងឆ្នាំ2018 គឺមានគម្រោងវិនិយោគចំនួនតែ 81គម្រោងនិងមានទុនវិនិយោគ ប្រមាណតែជាង 863លានដុល្លារអាមេរិកប៉ុណ្ណោះ”។
សូមបញ្ជាក់ថា កម្ពុជានៅតែមានសក្ដានុពលវិនិយោគខ្ពស់សម្រាប់វិនិយោគិនបរទេស និងក្នុងស្រុក លើវិស័យជាច្រើនដែលកំពុងមានអាទិភាព ដូចជាគម្រោងវិស័យទេសចរណ៍ វិស័យកសិកម្ម និងសំណង់ជាដើម ដែលវិស័យទាំងនេះ ត្រូវបានគេកត់សម្គាល់ឃើញថា មានសម្ទុះងើបឡើងខ្លាំង នៅក្នុងរយៈពេលប៉ុន្មានឆ្នាំចុងក្រោយនេះ៕