ប្រិយមិត្តអ្នកអានបានជ្រាបមកហើយ កំពូលតារាចម្រៀងប្រចាំផលិតកម្មរស្មីហង្សមាស ឱក សុគន្ធកញ្ញា បានរៀបអាពាហ៍ពិពាហ៍យ៉ាងអធឹកអធ័មជាមួយស្វាមីគឺ លោក អ៊ឹង សុខលី កាលពីថ្ងៃទី16 ខែឧសភា ឆ្នាំ2019 ទើបកន្លងផុតទៅថ្មីៗនេះ ដែលមហាជនមួយចំនួនធំ ពិតជាបានជ្រាបថាមង្គលការមួយនេះពិតជាបានធ្វើឱ្យល្បីស្ទើរតែពេញហ្វេសប៊ុក មិនត្រឹមតែប៉ុណ្ណោះទេ សូម្បីតែសារព័ត៌មានធំៗនៅក្នុងប្រទេសក៏បានធ្វើការចុះផ្សាយយ៉ាងព្រោងព្រាតផងដែរ។
ក្រៅពីការចាប់អារម្មណ៍ចំពោះពិធីមង្គលការទាំងមូលហើយនោះ អ្វីដែលកាន់តែពិសេសជាងនេះទៅទៀតនោះ គឺមានវត្តមានថ្នាក់ដឹកនាំដ៏ខ្ពង់ខ្ពស់បានមកអញ្ជើញចូលរួមផងដែរ ក្រោមមហាកិត្តិយស សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៉ុន រ៉ានី ហ៊ុន សែន និងថ្នាក់ដឹកនាំធំៗជាច្រើននាក់ទៀត ព្រមទំាងតារាល្បីៗជាច្រើនដួង ក៏មានមុខក្នុងកម្មវិធីដ៏អធិកអធមមួយនេះដែរ។
ដោយឡែកនៅមុននេះបន្តិច គេប្រទះឃើញរូបភាព2សន្លឹកដែលបានបង្ហោះចេញពីហ្វេសប៊ុករបស់លោក អ៊ឹង សុខលី ព្រមទាំងបានភ្ជាប់សារខ្លីមួយប៉ុណ្ណោះថា “ត្រៀមរួចរាល់សម្រាប់ការធ្វើដំណើរដ៏វែងឆ្ងាយ”។ តែទោះជាយ៉ាងណាក្តី នៅពេលនេះ អ្នកលេងបណ្ដាញសង្គមក៏នៅមិនទាន់ជ្រាបដឹងច្បាស់នៅឡើយទេថា ឱក សុគន្ធកញ្ញា និងស្វាមី នឹងទៅក្រេបទឹកឃ្មុំនៅប្រទេសណានោះទេ គ្រាន់តែដឹងថាទៅកាន់ប៉ែកអឺរ៉ុបតែប៉ុណ្ណោះ៕
