កន្លងទៅថ្មីៗ អតីតកំពូលតារាសម្ដែងស្រីសិចស៊ី វ៉ាង ស្រីណូ បានបង្ហោះរូបភាពជាច្រើនសន្លឹកនៅលើគណនីហ្វេសប៊ុករបស់ខ្លួន ដែលធ្វើឱ្យអ្នកគាំទ្រភ្ញាក់ផ្អើលចាប់អារម្មណ៍គ្រប់ៗគ្នា ក្នុងការទិញរថយន្ត Lexus មួយគ្រឿង ធ្វើជាកាដូរ ជូនដល់អ្នកមានគុណ ជាទីស្រឡាញ់ទាំងពីរ ដែលនាងបានលើកឡើងថា ជារបស់ដែលលោកចង់បានជាយូរមកហើយ។
ស្រាប់តែប៉ុន្មានថ្ងៃមុននេះ តារាស្រីរូបស្រស់នាង វ៉ាង ស្រីណូ ក៏រំលេចការចាប់អារម្មណ៍ថ្មីទៀតជាមួយការបង្ហោះរូបភាពជាច្រើនសន្លឹក និងសកម្មភាពទិញរថយន្តថ្មី លោកប៉ា រួចពោលឡើងថា«សំរេចថាយកឡនណឹងហើយ! ស្អែកនាំសមាជិកថ្មីចូលផ្ទះ! ឡានថ្មីតាតា ម៉ាក់យាយឡូយកប់! កូនសុំតោងកាលីបផងណា»។ យ៉ាងណាការបង្ហាញឡើងដូចនោះអាចបញ្ជាក់បានថា រថយន្តស៊េរីទំនើបជាម៉ាកល្បី គឺ Mercedes-Benz ជាកាដូក្នុងថ្ងៃខួបកំណើតប៉ារបស់នាង ខណៈដែលកន្លងមកក៏បានធ្វើពិធីខួបកំណើតឲ្យលោកប៉ាជាមួយនឹងនំខួបកំណើតលុយដុល្លារទាំងខ្សែៗ។
តារាសម្ដែង ត្រូវបានមហាជនស្គាល់គ្រប់ទិសទី និងមានឈ្មោះជាអ្នកមានចិត្តបុណ្យ ជួយដល់អ្នកខ្វះខាតពេលជួបគ្រោះភ័យម្ដងៗ គឺកញ្ញា វ៉ាង ស្រីណូ ហាក់កំពុងតែលាក់ខ្លួនពួនអាត្មា ដាច់ឆ្ងាយពីវិស័យសិល្បៈ ស្ទើរតែទាំងស្រុងទៅហើយ។ ខណៈដែលថ្មីៗនេះ វ៉ាង ស្រីណូ បានដល់ត្រើយសុខសាន្ដត្រាណហើយ ព្រោះមានទ្រព្យដូចសេដ្ឋិនី ហើយនាងគ្មានគម្រោងវិលត្រឡប់ មករកអាជីពចាស់វិញនោះទេ។ កញ្ញា វ៉ាង ស្រីណូ ដែលបោះបង់អាជីពភាពយន្ដជាច្រើនឆ្នាំមកហើយ ពោលគឺរស់នៅសម្ងំសោយសុខលើគំនរទ្រព្យ និងតែងតែបង្ហាញភាពហ៊ឺហា តាមរយៈការជិះរថយន្ដទំនើបៗ ហើយនាងពាក់គ្រឿងអលង្ការពេជ្រទាំងឈុតៗ មិនចាញ់ជំទាវៗមួយចំនួនឡើយ៕
