តារាចម្រៀងស្រី មាស អាលីស ដែលមហាជនជាច្រើនទទួលស្គាល់ថា ជាតារាចម្រៀងដែលមានទឹកដមសំឡេងក្រអួនក្រអៅដូចលោកយាយ ហួយ មាស បេះដាក់នោះ កំពុងតែទទួលបានប្រជាប្រិយភាពយ៉ាងខ្លាំង ទាំងក្នុងស្រុក និងក្រៅស្រុក។ ក្រៅពីឧស្សាហ៍ឡើងច្រៀងតាមប៉ុស្ដិ៍ទូរទស្សន៍នានាហើយ ខណៈនេះដែរ តារាស្រីសម្បុរសណ្ដែកបាយរូបនេះ ត្រូវបានស្ថានទូតអាមេរិក ផ្ដល់សិទ្ធិអោយចេញទៅច្រៀងសហរដ្ឋអាមេរិកជាលើកដំបូងនៅចុងខែឧសភា នេះផងដែរ ខណៈដែលនាងប្រកាសថា សុខចិត្តទម្លាក់ចោលការងារក្នុងស្រុកទាំងអស់ គ្រាន់តែបានដំណឹងជាប់ទៅច្រៀង។
កញ្ញា មាស អាលីស បានបង្ហាញអារម្មណ៍រំភើបយ៉ាងខ្លាំងដែលការប្រែខ្លួនធ្វើជាតារាចម្រៀងរបស់នាង ទទួលបានជោគជ័យ ហើយធ្វើឱ្យនាងត្រូវបានបងប្អូនខ្មែររស់នៅប្រទេសអាមេរិក ហើយសំណាងត្រូវបានសម្ភាសន៍ជាប់ទៅទៀត។ កញ្ញាថា ខ្លួនត្រូវបានស្ថានទូតអាមេរិកយល់ព្រមឱ្យទិដ្ឋាការទៅសម្ដែងនៅក្នុងប្រទេសនោះរយៈពេល7ខែ ដោយគម្រោងចាកចេញសម្ដែងរបស់នាង គឺនឹងចេញពីប្រទេសកម្ពុជា នៅអំឡុងចុងខែ5នេះ។ កញ្ញាថា នេះជាលើកទី1 ដែលខ្លួនមានឱកាសបានចេញនៅក្នុងប្រទេសមហាអំណាច ដែលតារាភាគច្រើនទទួលបានការអញ្ជើញដូចគ្នា តែសម្ភាសន៍ទៅមិនងាយជាប់។ អ្វីដែលនាងកាន់តែសប្បាយចិត្តទៅទៀត គឺកន្លែងដែលនាងច្រៀងប្រចាំថ្ងៃ បានយល់ព្រមផ្ដល់ច្បាប់អោយនាង7ខែ ក្នុងពេលដែលនាងទម្លាយថា បើត្រលប់មកវិញ កន្លែងច្រៀងប្រចាំថ្ងៃ មិនអោយចូលច្រៀង ក៏នាងមិនអាចបោះបង់ឱកាសទៅសម្ដែង7ខែនៅសហរដ្ឋអាមេរិកនោះដែរ។
គួរបញ្ជាក់ថា ចាប់តាំងពីបានវិវត្តន៍ខ្លួនពីពិធីការិនីវិទ្យុ មកជាតារាចម្រៀង កញ្ញា មាស អាលីស ទទួលបានការគាំទ្រយ៉ាងខ្លាំងដោយសារតែនាងមានទឹកដមសំឡេងស្ទើរតែដូចគ្នាបេះបិតនឹងតារាចម្រៀង អ្នកនាង ហួយ មាស។ កញ្ញាត្រូវគេឃើញឡលងឆាកទូរទស្សន៍មិនសូវលោះពេលនោះទេ ខណៈដែលនាងត្រូវគេកត់សម្គាល់ថាលេចធ្លោកាន់តែខ្លាំង ចាប់តាំងពីបានបង្ហាញខ្លួនក្នុងសកម្មភាពសប្បុរសជាមួយគ្រួសារតារាកម្ពុជា៕
