ធនាគារជាតិនៃកម្ពុជា(NBC)បានចេញផ្សាយរបាយការណ៍ហិរញ្ញវត្ថុ ស្តីពីការត្រួតពិនិត្យស្ថិរភាពហិរញ្ញវត្ថុ (Financial Stability Review ឬ FSR) របស់ខ្លួនជាសាធារណៈលើកដំបូង ដែលមានគោលបំណងដើម្បីផ្តល់ទិន្នន័យហិរញ្ញវត្ថុដែលអាចជឿជាក់បានដល់សាធារណជន និងបង្ហាញពីវិធានការរបស់ NBC ក្នុងការរក្សាស្ថិរភាពហិរញ្ញវត្ថុ និងការតាក់តែងគោលនយោបាយម៉ាក្រូប្រុងប្រយ័ត្ននានាដើម្បីបង្ការហានិភ័យ។
ថ្លែងនៅក្នុងពិធីសម្ពោធរបាយការណ៍ហិរញ្ញវត្ថុនេះ លោកជំទាវ នាវ ច័ន្ទថាណា ទេសាភិបាលរងនៃធនាគារជាតិនៃកម្ពុជាបានថ្លែងថា៖“FSR គឺជាឯកសារដ៏មានតម្លៃដែលជួយឱ្យសាធារណជន និងអ្នកវិនិយោគយល់ច្បាស់ពីវិស័យហិរញ្ញវត្ថុ។ វាប្រាប់ពីការសម្រេចចិត្ត និង គោលនយោបាយនៅក្នុងវិស័យសាធារណៈ និងឯកជន។ វាមានប្រយោជន៍ជាពិសេសសម្រាប់វិនិយោគិន ស្ថាប័នហិរញ្ញវត្ថុ និងអ្នកពាក់ព័ន្ធដែលនឹងនាំឆ្ពោះទៅរកការសម្រេចចិត្តលើការវិនិយោគ ការពង្រីកអាជីវកម្ម និងជួយកាត់បន្ថយហានិភ័យដែលអាចកើតមានទៀតផង”។
របាយការណ៍នេះវាយតម្លៃពីសក្តានុពល និងលទ្ធភាពនៃហានិភ័យចំពោះស្ថិរភាពហិរញ្ញវត្ថុរួមទាំងហានិភ័យម៉ាក្រូសេដ្ឋកិច្ច និងប្រព័ន្ធ។ វាដោះស្រាយបញ្ហាទាក់ទងនឹងម៉ាក្រូហិរញ្ញវត្ថុ និងការពិភាក្សាអំពីគោលនយោបាយសក្តានុពលដើម្បីជួយកាត់បន្ថយហានិភ័យជាប្រព័ន្ធ។
ការត្រួតពិនិត្យពីស្ថិរភាពហិរញ្ញវត្ថុនេះ ត្រូវបានធ្វើឡើងដោយ NBC ចាប់តាំងពីឆ្នាំ2011 មកម៉្លេះ ប៉ុន្តែចាប់តាំងពីពេលនោះមក វាត្រូវបានគេធ្វើឡើងសម្រាប់តែការប្រើប្រាស់ផ្ទៃក្នុងប៉ុណ្ណោះ។ របាយការណ៍ត្រួតពិនិត្យស្ថិរភាពហិរញ្ញវត្ថុត្រូវបានធ្វើឡើងដោយមានជំនួយបច្ចេកទេសស្ដីពីបញ្ហាស្ថិរភាពហិរញ្ញវត្ថុពីមូលនិធិរូបិយវត្ថុអន្តរជាតិ ឬIMF។
លោកស្រី Yong Sarah Zhou តំណាងមូលនិធិរូបិយវត្ថុអន្តរជាតិ IMF ប្រចាំនៅកម្ពុជាបានថ្លែងថា៖ “យើងដឹងថា វិស័យហិរញ្ញវត្ថុកម្ពុជាកំពុងរីកចម្រើនយ៉ាងរហ័ស កា្លយជាប្រព័ន្ធកាន់តែស្មុគស្មាញ និងពិបាកខ្លាំង។ ការចេញផ្សាយរបាយការណ៍នេះនឹងផ្ដល់ជាវេទិកាដើម្បីចែករំលែកឆន្ទៈរបស់ NBC អំពីការអភិវឌ្ឍសេដ្ឋកិច្ច និងហិរញ្ញវត្ថុ ដើម្បីកំណត់ហានិភ័យនៅក្នុងប្រព័ន្ធសេដ្ឋកិច្ច និងហិរញ្ញវត្ថុ ពិភាក្សាគោលនយោបាយដែលអាចធ្វើឡើង និងកាត់បន្ថយហានិភ័យដែលអាចកើតឡើង”។
លោកស្រីក៏បានបង្ហាញពីការពេញចិត្តយ៉ាងខ្លាំងរបស់លោកស្រីលើការចេញផ្សាយការត្រួតពិនិត្យសិ្ថរភាពហិរញ្ញវត្ថុនេះ ដោយលើកឡើងថា វាជារបាយការណ៍ទូលំទូលាយបំផុត និងផ្ដល់ការវិភាគប្រកបដោយគុណភាពខ្ពស់ដើម្បីកំណត់ហានិភ័យនៅក្នុងប្រព័ន្ធសេដ្ឋកិច្ច និងហិរញ្ញវត្ថុ។ ការចាប់ផ្តើមឯកសារនេះ គឺជាព្រឹត្តិការណ៍ដ៏សំខាន់ក្នុងការអភិវឌ្ឍ។ FSR បានចុះបញ្ជីបញ្ហាសំខាន់ៗហើយជួយយើងឱ្យយល់ដឹងកាន់តែច្បាស់អំពីបញ្ហាទាំងនោះ។
លោកស្រី Zhou បានគូសបញ្ជាក់ថា៖“ ការចាប់ផ្តើមនៅថ្ងៃនេះគឺជាសមិទ្ធផលដ៏គួរឱ្យចាប់អារម្មណ៍ និងគួរឱ្យកត់សម្គាល់ដែលអាចធ្វើទៅបានដោយអរគុណដល់ភាពជាអ្នកដឹកនាំដ៏រឹងមាំរបស់ធនាគារជាតិនៃកម្ពុជា និងការខិតខំប្រឹងប្រែងអស់រយៈពេលជាច្រើនឆ្នាំលើកកម្ពស់ស្ថិរភាពហិរញ្ញវត្ថុ។ យើងមានមោទនភាពដែលបានចូលរួមចំណែកក្នុងរឿងនេះ”។
សូមបញ្ជាក់ថា របាយការណ៍នេះត្រូវបានធ្វើឡើងជាមួយនឹងការផ្ដោតជាក់លាក់លើកត្តាសំខាន់3 រួមមានលក្ខខណ្ឌម៉ាក្រូសេដ្ឋកិច្ច ស្ថិរភាព និងចក្ខុវិស័យ ដែលផ្ដោតលើលក្ខខណ្ឌ និងការវាយតម្លៃប្រព័ន្ធហិរញ្ញវត្ថុ និងការភ្ជាប់ម៉ាក្រូហិរញ្ញវត្ថុ និងហានិភ័យដែលអាចកើតឡើងចំពោះស្ថិរភាពហិរញ្ញវត្ថុ។
លោក ឃូ វុឍ្ឍី អគ្គនាយករងបច្ចេកទេសនៃធនាគារជាតិនៃកម្ពុជា បានឱ្យដឹងថា ដោយសារតែប្រាក់ចំណូលកាន់តែខ្ពស់ និងលទ្ធភាពទទួលបានសេវាហិរញ្ញវត្ថុកាន់តែប្រសើរ ការផ្តល់ឥណទានបុគ្គលបានកើនឡើង ដែលជួយលើកកម្ពស់ការវិនិយោគ និងការប្រើប្រាស់ឥណទាន។
លោកបានបន្ថែមទៀតថា ការឃ្លាំមើលយ៉ាងដិតដល់នៅក្នុងសមាសភាពឥណទានដែលបានបង្ហាញសមាមាត្រដ៏ធំនៃឥណទាន កំពុងត្រូវបានបង្កើតឡើងសម្រាប់គោលបំណងពាណិជ្ជកម្ម ដែលបង្កើតប្រាក់ចំណូល។
លោកបានថ្លែងថា៖ “ទោះបីជាមានកំណើនដ៏រហ័សក៏ដោយ ក៏គុណភាពឥណទានមិនទាន់ជាក្តីបារម្ភនោះទេ”។ លោកបន្តថា៖ “NBC បន្តត្រួតពិនិត្យយ៉ាងដិតដល់លើឥណទានបុគ្គលបន្តទៅមុខទៀត”។
ធនាគារជាតិទទួលជំនួយបច្ចេកទេសស្តីពីស្ថិរភាពហិរញ្ញវត្ថុពីមូលនិធិរូបិយវត្ថុអន្តរជាតិនៅក្នុងឆ្នាំ2018 ហើយ IMFក៏បានតែងតាំងទីប្រឹក្សាប្រចាំតំបន់ដើម្បីជួយកសាងសមត្ថភាពរបស់ធនាគារជាតិនៃកម្ពុជានៅក្នុងការវាយតម្លៃហានិភ័យជាប្រព័ន្ធ និងការបង្កើតគោលនយោបាយ ដែលបាននាំឱ្យមានការអភិវឌ្ឍស្តង់ដា និងការបោះពុម្ភផ្សាយ FSR ជាលើកដំបូងនេះឡើង ហើយធនាគារជាតិនៃកម្ពុជាគ្រោងក៏នឹងបោះផ្សាយរបាយការណ៍ហិរញ្ញវត្ថុជារៀងរាល់ឆ្នាំផងដែរ៕
