ត្រីមាសទី1 ឆ្នាំ2019 នេះ កម្ពុជាបាននាំចេញជ័រកៅស៊ូជិត 5ម៉ឺនតោនដោយទទួលបានចំណូលជាង 61លានដុល្លារអាមេរិក។ នេះបើតាមរបាយការណ៍របស់អគ្គនាយកដ្ឋានកៅស៊ូ នៃក្រសួងកសិកម្ម រុក្ខា ប្រមាញ់ និងនេសាទ។
របាយការណ៍បានបញ្ជាក់ថា ចាប់ពីខែមករា ដល់ខែមីនា ឆ្នាំ2019 បរិមាណបញ្ចេញលក់ជ័រកៅស៊ូ សរុបចំនួន 48,192តោន បានកើនឡើងចំនួន 9,046តោន ស្មើនឹង23% បើធៀបនឹងរយៈពេលដូចគ្នានៅឆ្នាំ2018។ សម្រាប់តម្លៃជ័រកៅស៊ូជាមធ្យម ក្នុងរយៈពេលត្រីមាសទី1 ឆ្នាំ2019នេះ មានតម្លៃ 1,279ដុល្លារក្នុង1តោន តម្លៃនេះបានកើនឡើងចំនួន 179ដុល្លារក្នុង1តោន ស្មើនឹង12%។
របាយការណ៍នេះបានបង្ហាញថា កៅស៊ូនេះត្រូវបានប្រមូលផលក្នុងផ្ទៃដី 201,519ហិកតាដោយមានចម្ការកៅស៊ូសរុបនៅកម្ពុជាស្មើនឹង 436,357ហិកតា ដែលក្នុងនោះផ្ទៃដីចៀរជ័រមានចំនួនជាង 20ម៉ឺនហិកតា។
ឯកឧត្តម ប៉ុល សុផា អគ្គនាយកនៃអគ្គនាយកដ្ឋានកៅស៊ូ បានថ្លែងប្រាប់ថា៖«តម្លៃជ័រកៅស៊ូពេលបច្ចុប្បន្ននេះ មិនទាន់ល្អសមរម្យនៅឡើយទេ សម្រាប់ឧស្សាហកម្មកៅស៊ូនៅកម្ពុជា តែសម្រាប់កសិករដាំកៅស៊ូលក្ខណៈគ្រួសារវិញ គឺអាចទទួលយកបាន កសិករ និងអ្នកផលិតតូចៗមិនប្រឈមខ្លាំងជាមួយនឹងតម្លៃបច្ចុប្បន្នទេ»។
ឯកឧត្តម អគ្គនាយកបានបញ្ជាក់ទៀតថា តម្លៃជ័រកៅស៊ូ គឺអាស្រ័យលើទីផ្សារអន្តរជាតិ ខណៈសេដ្ឋកិច្ចពិភពលោកកំពុងជួបបញ្ហា។ បើតម្លៃជ័រកៅស៊ូនៅតែបន្តធ្លាក់ចុះនោះ នឹងផ្តល់វិបាកសម្រាប់ឧស្សាហកម្មកៅស៊ូ និងកសិករ ខណៈការចំណាយសម្រាប់ពលកម្មក្នុងវិស័យនេះ នៅតែជាបញ្ហាប្រឈម។
កាលពីខែមករាក្រសួងកសិកម្មបានប្រកាសថា កំពុងធ្វើការងារលើសំណើមួយដើម្បីកាត់បន្ថយពន្ធលើការនាំចេញកៅស៊ូ ក្នុងគោលបំណងទាក់ទាញវិនិយោគិនកាន់តែច្រើនទៅលើវិស័យនេះ។
បច្ចុប្បន្នប្រទេសវៀតណាម គឺជាទីផ្សារកៅស៊ូធំបំផុតរបស់កម្ពុជា ទោះបីជាកម្ពុជាបាននាំចេញទៅកាន់ប្រទេសផ្សេងទៀត ដែលរួមមានប្រទេសចិន វៀតណាម សិង្ហបុរី និងម៉ាឡេស៊ីក៏ដោយ។
សូមបញ្ជាក់ថា រយៈពេលពេញមួយឆ្នាំ2018 កម្ពុជាបាននាំចេញជ័រកៅស៊ូជាង 21ម៉ឺនតោន ទទួលបានចំណូលជិត 300លានដុល្លារអាមេរិក៕
