ប្រិយមិត្តដែលនិយមតាមដានកម្មវិធីប្រឡងចម្រៀងធំៗលំដាប់ពិភពលោកពិតជាមិនទាន់ភ្លេចឈ្មោះអតីតបេក្ខជន មាស មុនីរាជ ឡើយ ព្រោះមានសមត្ថភាពនិងទឹកដមសំឡេងល្អគួរចង់ស្តាប់។ ខិតខំព្យាយាមឈ្មុលចូលក្នុងវិថីសិល្បៈរហូតក្លាយជាម្ចាស់ពានបោះឆ្នោតដោយសំឡេងមហាជនធ្វើឱ្យតារារះថ្មីរូបនេះរំពឹងល្បីរន្ទឺ ក៏ប៉ុន្ដែចង់ក្រោយស្ទើរដើរចេញនៅពេលប្រទះភាពចុកចាប់ជាច្រើន។
មាស មុនីរាជ បានប្រាប់អ្នកសារព័ត៌មានឡារ៉ែនថា «នៅពេលនេះ បើនិយាយពីសិល្បៈលោកដូចតារាថ្មីមិនដឹងពឹងពាក់អ្នកណា។ លោកជាប់ពានឆ្នើមតែក្រោយមកស្រាប់តែមិនដឹងបែបណា គ្មានការជួយវែកផ្លូវឱ្យដើរដូចគេពេញដៃពេញជើងបណ្តោយឱ្យនៅជ្រុងម្ខាង។ យ៉ាងណាលោកវាយលុកច្រើនក្នុងសិល្បៈយល់ច្រើនថា វិថីមួយនេះមិនងាយដើរមានការប៉ែងជើងគ្នាណាស់ ទោះម្ចាស់ពានអ្វីក៏ដោយបើមិនត្រូវចិត្តថ្លើមគេទេកុំសង្ឃឹមល្បី។ មាស មុនីរាជ ដែលចេះទាំងនិពន្ធបទចម្រៀងទៀតនោះ ពោលអស់សង្ឃឹមថាលោកឆ្អែតនឹងសិល្បៈនេះខ្លាំងណាស់ រហូតថា បើនិយាយពីចិត្តវិញសល់ 20 ទៅ30 %លែងចង់ប្រឡូកទើបងាកមកពង្រឹងមុខរបរថ្មីរកស៊ីលក់ទិញឡាននិងដីធ្លីតាមមិត្តភក្តិណែនាំគិតថាល្អអាចប្រសើរជាងសិល្បៈ»។ ធ្វើមិចនិស្ស័យប្រហែលជាហុងស៊ុយយើងមិនទាន់ល្បីឬឱកាសមិនទាន់ដល់ក៏អាចថាបាន។
តាមរយៈការបង្ហាញអារម្មណ៍ពិតគេរំពឹងថា បណ្តាស្ថានីយ៍ទូរទស្សន៍និងកម្មវិធីផេកសិល្បៈល្បីៗនិងជួយរុញតារាមានស្នាដៃរូបនេះឱ្យលេចធ្លោ ដោយយោងលើសំឡេងពិតជាល្អហើយចេះទាំងនិពន្ធខ្លួនឯងទៀត។
គួររំឭកអតីតកាលរបស់ មាស មុនីរាជ លោកជាអតីតបេក្ខជនប្រឡងចម្រៀងឆ្នើមក្នុងកម្មវិធីខេមបូឌាអាយឌលដូវកាលទី១ចូលដល់វគ្គផ្សាយបន្តផ្ទាល់សប្តាហ៍ទី៧ត្រូវចាកចេញដោយជំនាន់ទី១នោះប៉ះបេក្ខជនវគ្គLive Showខ្លាំងមាននី រតនា ម៉ៅ ហាជី អៀម វន្នី សៅ ឧត្តម សុវត្ថិឌី ធារិកាជាដើម។ ដោយមិនអស់ចិត្តបាត់មុខមួយរយៈកាលលោកមកប្រឡងចម្រៀងថ្មីមួយទៀតនៅទូរទស្សន៍បាយ័ននៃកម្មវិធី«The Melody»តស៊ូវ៉ាគេឯងជាមួយទេពកោសល្យសិល្បៈច្រើនដំណាក់កាលនៅទីបំផុតមុនីរាជរីកមុខមាត់ក្លាយជាម្ចាស់ពានសមតាមបំណង។ ពេលនោះទាំងទស្សនិកជននិងអ្នកសិល្បៈមួយចំនួនរំពឹងថា មាស មុនីរាជ ប្រាកដជាក្លាយជាតារាចែងចាំងដូចម្ចាស់ជ័យលាភីផ្សេងៗហើយបណ្តាស្ថាប័នទូរទស្សន៍ដែលខ្លួនខំប្រឡងយិតយោង៕
