ទើបតែចំណាយថវិកាខ្ទង់ពាន់ធ្វើខួបកំណើតអស់ខ្ទស់ពាន់ដុល្លារសោះ លោកថៃ នរៈវិទូ ត្រូវបានផលិតផលល្បីល្បាញប្រចាំប្រទេសថៃ គឺ P80 តែងតាំងជាអ្នកតំណាងផលិតផលយ៉ាងកាលីប ដែលតំណែងមួយនេះ នៅក្នុងប្រទេសថៃគឺ តារាសម្ដែងល្បីល្បាញលោក ណាដេត តែប៉ុណ្ណោះ។ លោកត្រូវបានប្រកាសក្នុងពិធីបើកសម្ពោធក្រុមហ៊ុន ដែលមានម្ចាស់ក្រុមហ៊ុនថៃចូលរួម កាលពីថ្ងៃទី28 ខែមេសា ដែលជាការបោះទុនរបស់អ្នកស្រី ងិន ម៉ានីយ៉ា ម្ដាយបង្កើតរបស់លោក ដែលមហាជនស្គាល់ថា ជាអ្នកនិពន្ធល្បីឈ្មោះមួយរូបនៅក្នុងផលិតកម្មរស្មីហង្សមាស។
លោកថៃ នរៈវិទូ បញ្ជាក់ក្រោយពិធីកាត់ខ្សែបូរបើកសម្ពោធក្រុមហ៊ុនយីហោ “អិនជី ម៉ានីយ៉ា(ខេមបូឌា)ឯ.ក” ដោយប្រាប់ថា ក្រុមហ៊ុនដែលម្ដាយលោកបានបើកសម្ពោធជាផ្លូវការនេះ គឺជាក្រុមហ៊ុនដែលម្ដាយរបស់លោកបានទទួលសិទ្ធិផ្ដាច់មុខពីក្រុមហ៊ុន P80 របស់ថៃ ដោយភាគីថៃផ្ដល់សិទ្ធិអោយចែកចាយផលិតផលនេះដំបូងគេនៅកម្ពុជា តាមរយៈក្រុមហ៊ុនម្ដាយរបស់លោកតែមួយគត់ ខណៈដែលលោកក្រៅពីមានភាគហ៊ុនមួយនៅក្នុងក្រុមហ៊ុន លោកក៏ជាតំណាងផលិតផល ដែលនឹងមានភារៈច្រើនជាមួហនឹង P80។
មានហេតុផលមួយដែលលោក និងម្ដាយចំណាយទុនដ៏ច្រើនសម្រាប់អាជីវកម្មមួយនេះ គឺដោយសារតែ P80 គឺជាផលិតផលសុខភាពដែលជួយឱ្យអ្នកទទួលទានមានសុខភាពរឹងមាំ និងជាផលិតផលដែលមានការទទួលស្គាល់ដោយក្រសួងសុខាភិបាលរបស់ថៃ និងជាផលិតផលលក់ដាច់បំផុតនៅក្និងប្រទេសថៃ ដែលលោក និងម្ដាយយល់ថា មិនខុសពីនាំផលិតផលសុខភាពដែលចម្រាញ់ចេញពីធម្មជាតិ ដើម្បីជាប្រយោជន៍ដល់ទីផ្សារនៅកម្ពុជា។
អ្នកស្រី ងិន ម៉ានីយ៉ា ជាអគ្គនាយកក្រុមហ៊ុនបានអះអាងថា អ្នកស្រីមិនត្រឹមតែបើកក្រុមហ៊ុន P80 ឱ្យកូនៗទាំង ជាពិសេសគឺលោក ថៃ នរៈវិទូ ធ្វើជាអ្នកទទួលខុសត្រូវប៉ុណ្ណោះទេ ប៉ុន្តែអ្នកស្រី និងក្រុមការងារ ក៏នឹងពង្រីកការចែកចាយតាមរយៈការបង្កើតកូនក្រុម និងបង្កើតបណ្ដាញរបស់ក្រុមហ៊ុន ដែលមានន័យថាក្រុមហ៊ុននឹងផ្ដល់ផលចំណេញដល់សមាជិក្រុមដែលមានសមត្ថភាពស្វែងរកអតិថិជនឱ្យចាប់អារម្មណ៍លើផលិតផលសុខភាពមួយនេះនៅកម្ពុជាផងដែរ។
អ្នកស្រីថាគឺជាមោទនភាព ដែលក្រុមហ៊ុនដ៏ធំរបស់ថៃអនុញ្ញាតិឱ្យអ្នកស្រី និងកូនៗ បានក្លាយជាអ្នកទទួលសិទ្ធិផ្ដាច់មុខលើ P80 ដោយអ្នកស្រីរំពឹងថាផលិតផលបំប៉នសុខភាពដែលមិនអាចខ្វះបានមួយនេះ នឹងមានអ្នកគាំទ្រពេញទំហឹង ជាពិសេសអ្នកដែលចង់មានសុខភាពល្អ ហើយចង់ធ្វើជាសមាជិកដើម្បីទទួលបានផលចំណេញពីការលក់ និងចែកចាយ។ អ្នកស្រីទទូចឱ្យអ្នកចង់ធ្វើជំនួញមួយនេះ ឬ ចង់ចែកចាយបន្តទាក់ទងមកក្រុមហ៊ុន ឬ លោក ថៃ នរៈវិទូ ដើម្បីយល់ឱ្យកាន់តែច្បាស់ពីអត្ថប្រយោជន៍របស់ក្រុមហ៊ុនអ្នកស្រី។ ក្រុមហ៊ុនអ្នកស្រីក៏នឹងគម្រោងធ្វើពិធីសម្ពោធទ្រង់ទ្រាយធំម្ដងទៀត ក្នុងពេលដ៏ខ្លី ដោយយកតំណាងផលិតផលគឺតារាសម្ដែង លោក ណាដេត មកបង្ហាញខ្លួននៅកម្ពុជាផងដែរ៕
