កីឡាករ អូត ភូថង ដែលល្បីពូកែខាងក្បាច់កែងនោះ ជាកីឡាករប្រដាល់ជើងខ្លាំងមួយរូបដែលមានរាងខ្ពស់ស្រឡះ និងមានល្បិចប្រយុទ្ធនៅលើសង្វៀនដ៏សាហាវបំផុត ជាពិសេសស្នៀតកែង និងជង្គង់របស់គេដែលជាអាវុធប្រចាំត្រកូលដែលគូប្រកួតមិនអាចធ្វេសប្រហែសបានឡើយ។
ស្ថិតក្នុងសភាពស្ងប់ស្ងាត់កិត្តិស័ព្ទលើសង្វៀនប្រដាល់អស់មួយរយៈ ឈ្មោះ អូត ភូថង ជាកីឡាករប្រដាល់ល្បីឈ្មោះ និងជាប្អូនប្រុសកំពូលកីឡាប្រដាល់ អេ ភូថង ពេលនេះត្រូវបានបណ្តាញផ្សព្វផ្សាយមួយរៀបរាប់ពីជីវិតពិតរបស់កីឡាកររូបនេះដែលហាក់ដូចជាស្ថិតនៅលើខ្សែផ្លូវដ៏មហាកម្សត់មួយ មិនស័ក្តិសមនឹងកិត្តិស័ព្ទដ៏ល្បីល្បាញលើវិស័យក្បាច់គុនខ្មែរសោះឡើយ ដោយសារតែគេប្រទះឃើញលោកធ្វើការនៅឯបារបារាំងមួយកន្លែងក្នុងតួនាទីជាអ្នកយាមម៉ូតូឱ្យគេតាំងពីម៉ោង 10យប់ រហូតដល់ម៉ោង 5ព្រឹក និងទទួលបានប្រាក់ខែត្រឹម 150ដុល្លារតែប៉ុណ្ណោះ។
អ្នកប្រដាល់កែងឆេះបានបានរៀបរាប់យ៉ាងស្ងប់ស្ងាត់ថា«សព្វថ្ងៃនេះខ្ញុំមានបើកក្លិបមួយទទួលសិស្សបង្ហាត់ប្រដាល់នៅកន្លែងរបស់បងធម៌របស់ខ្ញុំដែលជាក្លិបប្រដាល់ និងទទួលបង្ហាត់សិស្សដែលចង់ចេះក្បាច់គុនបុរាណខ្មែរ មានឈ្មោះថា KunKhmer Fighter»។ បណ្ដាញផ្សព្វផ្សាយខាងលើបានឱ្យដឹងទៀតថា ក្រៅពីធ្វើការបង្ហាត់សិស្សនៅក្លិបរបស់បងធម៌របស់លោកបានកម្រៃខ្លះមែនក្ដី តែជីវិតអ្នកប្រដាល់របស់ អូត ភូថង ក៏នៅតែឡើងប្រដាល់ជាមួយគូប្រកួតបរទេសម្តងម្កាលដែរ ដោយទទួលបានប្រាក់តម្លៃខ្លួន 1លានរៀល ហើយប្រសិនបើមិនបានឡើងវាយទេ ក៏មិនបានប្រាក់ដែរ៕
