រថយន្ត Minivan ម៉ាក Lexus ដំបូងគេបានបង្ហាញខ្លួនជាផ្លូវការនៅក្នុងកម្មវិធី Shanghai Auto Show ដែលផលិតឡើងជាពិសេសសម្រាប់ទីផ្សារប្រទេសចិន ហើយក៏នឹងដាក់លក់លើទីផ្សារអាស៊ីផងដែរ។
រថយន្តប្រភេទ Minivan នេះមានម៉ូដែលជា Lexus LM ដែលវាមានទ្រង់ទ្រាយស្រដៀងនឹងរថយន្ត Toyota Alphard ដែរ ប៉ុន្តែមានរចនាប័ទ្មស្រដៀងនឹងរថយន្ត Lexus ជំនាន់ចុងក្រោយ។ រថយន្ត LM ដែលបង្ហាញខ្លួននៅសៀងហៃ គឺមានបំពាក់កៅអីចំនួន4 ដោយផ្នែកខាងក្រោយ គឺប្រៀបដូចជាកាប៊ីនយន្តហោះប្រភេទ Business-Class អ៊ីចឹងដែរ។
កៅអីអ្នកបើកបរ និងកៅអីអ្នកដំណើរជួរខាងក្រោយត្រូវបានខណ្ឌចែកដោយជញ្ជាំងកញ្ចក់មួយដែលអាចបិទ-បើកបាន ហើយលើជញ្ជាំងនេះក៏មានបំពាក់ទូរទស្សន៍ដ៏ធំមួយ និងមានគ្រឿងបរិក្ខារជាច្រើនទៀត។ Lexus និយាយថា រថយន្ត LM នេះក៏នឹងមានប្រភេទកៅអីអង្គុយចំនួន7 ផងដែរ។
ចំណុចសំខាន់របស់រថយន្តនេះ គឺកៅអីអ្នកដំណើរជួរខាងក្រោយ។ កៅអីនេះមានបំពាក់ប្រព័ន្ធកម្ដៅ ប្រព័ន្ធខ្យល់ មានមុខងារម៉ាស្សា និងអាចសេ0រ៉េបានច្រើនរបៀប។ កៅអីអង្គុយនេះមានផ្ទុកដោយ Foam មួយប្រភេទ ដែលអាចឱ្យអ្នកដំណើរអង្គុយបានយ៉ាងស្រណុកសុខស្រួល។
ទូរទស្សន៍ជាប់ជញ្ជាំង គឺមានទំហំ 26អ៊ីញ អាចភ្ជាប់ជាមួយស្មាតហ្វូន និង Tablet ហើយអាចចាក់ឌីស្កបានទៀតផង។ មុខងារដទៃទៀត មានដូចជាឧបករណ៍បំពងសំឡេងចំនួន19 ទូទឹកកកចំណុះ 14លីត្រ ដែលអាចដាក់ស្រាបាន 2ដប អេក្រង់ Touch ស្ថិតនៅកណ្ដាលកៅអីទាំង2 សម្រាប់បញ្ជាទូរស័ព្ទ បញ្ជាកៅអី បញ្ជាម៉ាស៊ីនត្រជាក់ និងបញ្ជាប្រព័ន្ធសំឡេងជាដើម។ លើសពីនេះនៅមានស្រទាប់ការពារ និងទប់សំឡេងរំខានពីខាងក្រៅទៀតផង។
Lexus LM នេះមានជម្រើសម៉ាស៊ីនចំនួន2 គឺ LM 350 ប្រើប្រាស់ម៉ាស៊ីន 3.5លីត្រ 6ស៊ីឡាំង និង LM 300h ប្រើប្រាស់ម៉ាស៊ីន 2.5លីត្រ 4ស៊ីឡាំង គួបផ្សំនឹងម៉ូទ័រអគ្គិសនី។ Lexus ទាំង2 នេះនឹងចេញលក់នៅចុងឆ្នាំ2019 នេះ ជាមួយជម្រើសពណ៌ស និងពណ៌ខ្មៅ។ តម្លៃមិនទាន់បង្ហាញនៅឡើយទេ ប៉ុន្តែវាច្បាស់ជាថ្លៃជាង Toyota Alphard មិនខាន៕
