ពិតជាកក្រើកមិនធ្លាប់មាននៅក្នុងខេត្តព្រះសីហនុ ខណៈដែលវត្តមានតារាចម្រៀងល្បីៗទៅចូលរួមពិធីជប់លៀងដ៏អធឹកអធមអបអរបុណ្យចូលឆ្នាំរបស់បុរីវីអាយភី នាយប់ថ្ងៃទី៧ មេសា មាន៖ កញ្ញា មាស សុខសោភា លោក យ៉ែម សំអូន កញ្ញា សូដា នីតា កញ្ញា រ៉ូលីន អ្នកនាងសួន ចន្ថា កញ្ញា ឡេង មុនីរចនា អ្នកនាង ស៊ីន ឧត្តមផល្លា លោក រិន សាវ៉េត កញ្ញា អ៊ឹង និមល លោក រតនៈ ពិសិដ្ឋនិងតារាៗជាច្រើនរូបទៀត ដោយតារាទាំងអស់សុទ្ឋតែបានបង្កបរិយាកាសឱ្យពិធីទាំងមូលអឹកធឹក និងមានបរិយាកាសសប្បាយរីករាយ នៅលើផ្ទៃដីប្រមាណ60ហិចតា ហើយនៅក្បែរព្រលានយន្តហោះ ដែលនៅមិនឆ្ងាយពីឆ្នេរសមុទ្រខេត្តព្រះសីហនុ។
ខុសពីក្រុមហ៊ុនមួយចំនួនដែលគ្រាន់តែ ធ្វើពិធីជប់លៀងសមាជិកដើម្បីអបអរបុណ្យចូលឆ្នាំ តាំងពីល្ងាចរហូតយប់កណ្ដាលអាធ្រាតុថ្ងៃទី ៧ កន្លងទៅនេះ ក្រុមហ៊ុនអចលនទ្រព្យល្បីល្បាញបុរី វីអាយភី បានទាំងរៀបចំការប្រគំតន្ត្រី និង ធ្វើសង្ក្រាន្តទ្រង់ទ្រាយធំ មានលក្ខណៈធំជាងកាលពីឆ្នាំមុនទៅទៀត ដើម្បីអបអរពិធីបុណ្យចូលឆ្នាំថ្មីប្រពៃណីខ្មែរ។ តារាចម្រៀងមាស សុខសោភា រ៉ូលីន និងតារាល្បី សុទ្ធតែបង្ហាញខ្លួន ធ្វើឱ្យសង្ក្រាន្ដ និងជប់លៀងមួយនេះ កកកុញដោយភ្ញៀវកិត្តិយស និងអ្នកទស្សនា។លោកវីជេ ហេរ៉ូ ដែលជាអ្នករៀបចំកម្មវិធីប្រគំតន្ត្រីបានបង្ហាញពីការភ្ញាក់ផ្អើលថា ដែលរយៈពេលតែប៉ុន្មានខែសោះ តែបុរីវីអាយភី បានរំលេចសំណង់ដល់រាប់រយល្វែង និងមានអ្នកមកទស្សនាការប្រគំតន្ត្រីដែលបានធ្វើឡើងយ៉ាងកក្រើកនាយប់នោះ។ លោកថា ទីតាំងនេះ នឹងក្លាយជាតំបន់លំនៅដ្ឋាន និងសេដ្ឋកិច្ចធំមួយក្នុងពេលដ៏ខ្លី ស្របគ្នាដែលខេត្តព្រះសីហនុ ក៏ស្ថិតក្នុងគម្រោងអភិវឌ្ឍន៍មួយដ៏ធំរបស់អ្នកវិនិយោគចិន។
លោក វ៉ន វណ្ណៈ អគ្គនាយកបុរីវីអាយភី បានអះអាងថា ដោយសារតែល្បឿនក្នុងការលក់ចេញរបស់បុរីវីអាយភី នៅខេត្តព្រះសីហនុ ទទួលបានការគាំទ្រច្រើន ហើយសន្ទុះក្នុងការលក់ចេញក៏លឿនលើសពីការប៉ាន់ស្មាន ទើបលោកសម្រេចចិត្តយកថ្ងៃ៧ មេសា ជាថ្ងៃជប់លៀងជូនដល់បុគ្គលិក ជាក្រុមការងារ និងអតិថិជន ដោយភ្ជាប់ជាមួយនឹងសង្ក្រាន្ដប្រចាំឆ្នាំផង ដើម្បីឱ្យបងប្អូនបានរាំលេងសប្បាយ និង បានទស្សនាសិល្បៈបុរាណ និងសម័យជាទ្រង់ទ្រាយធំ មិនចាញ់សង្ក្រានមួយចំនួន និង មិនខុសពីការប្រគំតន្ត្រីខ្នាតធំតែម្ដង។ លោកថា ពិធីមួយនេះ ក៏មានការចូលរួមពីថ្នាក់ដឹកនាំខេត្ត និងមន្ត្រីជាន់ខ្ពស់ជអាជ្ញាប្រចាំតំបន់យ៉ាងច្រើនផងដែរ ដោយលោកបានចាត់ទុកថាពិធីជប់លៀង ដែលអមដោយតារាល្បីៗដើម្បីធ្វើសង្ក្រាន្ដកាលពីយប់ថ្ងៃនោះ គឺជាការជួបជុំគ្រួសារដ៏ធំរបស់បុរីវីអាយភី ក្រោយពេលជោគជ័យលើមុខជំនួញដីធ្លី និងសាងសល់វិស័យអចលនទ្រព្យ។ លោកថា បុរីវីអាយភីកំពុងបោះជំហានក្លាយជាទីក្រុងរណប និងជាផ្ទះស្នាក់នៅដែលជាជម្រើសដ៏ល្អរបស់អ្នកចង់មកកម្សាន្តនៅខេត្តព្រះសីហនុ ទើបបុរីមួយនេះ សាងសងមិនទាន់បានពាក់កណ្ដាលគម្រោងផង ប៉ុន្តែចំនួនលក់ដាច់គឺស្ទើរតែលប់លើសពីការគ្រោងទុករួចបាត់ទៅហើយ។
ស្របគ្នាដែលលក្ខខណ្ឌនៃការបង់រំលោះ និងតម្លៃដែលបានកំណត់ឡើង គឺតម្រូវចំពោះអ្នកមានជីវភាពមធ្យម និងធូរធារអាចទិញបានយ៉ាងស្រួលផង ទើបទីតាំងបុរីមួយនេះ កាន់តែមានតម្រូវការខ្ពស់ក្នុងការកក់ទិញ។ លោកបន្ដថា នៅក្នុងបុរីនេះ ក្រៅពីមានវីឡាទោល វីឡាកូនកាត់ ផ្ទះល្វែង ក៏មានផ្សារ ហាងទំនើប និងសួនច្បារយ៉ាងផាសុកភាពក្នុងគម្រោងនោះផងដែរ ដោយអាចនឹងជ្រើសធ្វើពិធីជប់លៀង និងសង្ក្រាន្ដធំៗបែបនេះឱ្យបានរាល់ឆ្នាំ ក៏មិនដឹង៕
