រដ្ឋមន្ត្រីក្រសួងពាណិជ្ជកម្មបានស្នើគណៈប្រតិភូមូលនិធិហ្សិនចិន ;(Shenzhen)នៃសាធារណរដ្ឋប្រជាមានិតចិនឱ្យជួយពង្រឹងវិស័យពាណិជ្ជកម្មអេឡិចត្រូនិក (E-Commerce) បច្ចេកវិទ្យា និងសុវត្ថិភាពព័ត៌មានក្នុងប្រទេសកម្ពុជាតាមរយៈការសម្របសម្រួលគម្រោងបង្កើតកម្មវិធីទូរស័ព្ទដៃ WeChat ជាខេមរភាសា ជាមួយក្រុមហ៊ុន ថេនសេន (Tencent) ដែលជាស្ថាបនិកកម្មវិធី WeChat។
ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ក្នុងជំនួបជាមួយគណៈប្រតិភូសម្រាប់កិច្ចសហប្រតិបត្តិការអន្តរជាតិ ដែលដឹកនាំដោយលោកស្រី តៅ យីតៅ (Tao Yitao) អនុប្រធានមូលនិធិហ្សិនចិនបានគូសបញ្ជាក់ថា៖“ ក្រសួងពាណិជ្ជកម្ម ចង់បានកម្មវិធីទូរស័ព្ទដៃ WeChat ជាភាសាខ្មែរ ដោយសារកម្មវិធីនេះ ផ្តល់ឱ្យអ្នកប្រើប្រាស់ធ្វើការទំនាក់ទំនងគ្នាគ្រប់ទីកន្លែង ទូទាត់ចំណាយតាមប្រព័ន្ធអេឡិចត្រូនិក (E-payment) ដោយប្រើប្រាស់បាកូដ និងអាចទប់ស្កាត់ព័ត៌មានក្លែងក្លាយ (Fake News) នៅលើប្រព័ន្ធអុីនធើណិតថែមទៀត”។
ឯកឧត្តមរដ្ឋមន្ត្រី បានជម្រាបគណៈប្រតិភូមូលនិធិហ្សិនចិន អំពីកំណែទម្រង់របស់ក្រសួងពាណិជ្ជកម្ម និងការធ្វើបច្ចុប្បន្នភាពយុទ្ធសាស្ត្រ សមាហរណកម្មពាណិជ្ជកម្ម (CTIS) ឆ្នាំ2019-2023 ដែលមានដាក់បញ្ចូលសេវាកម្ម ឧស្សាហកម្មធុនស្រាល ពាណិជ្ជកម្មតាមអេឡិចត្រូនិក ក៏ដូចជាសេដ្ឋកិច្ចឌីជីថល និងបដិវត្តន៍ឧស្សាហកម្ម 4.0 ជាគោលដៅអាទិភាពសម្រាប់អភិវឌ្ឍន៍។
លោកស្រី តៅ យីតៅ បានឆ្លើយតប និងថ្លែងអំណរគុណលោករដ្ឋមន្ត្រីសម្រាប់ការធ្វើបដិសណ្ឋារកិច្ច គណៈប្រតិភូមូលនិធិហ្សិនចិនយ៉ាងកក់ក្តៅ និងបានសន្យានាំយកសំណើរបស់ក្រសួងពាណិជ្ជកម្ម ទៅជម្រាបក្រុមហ៊ុនថេនសេន (Tencent) ដើម្បីសិក្សាអំពីលទ្ធភាពបង្កើតកម្មវិធី WeChat ជាខេមរភាសា សម្រាប់អ្នកប្រើប្រាស់ទូរស័ព្ទចល័តនៅក្នុងប្រទេសកម្ពុជា ដើម្បីចូលរួមអភិវឌ្ឍន៍វិស័យពាណិជ្ជកម្មអេឡិចត្រូនិក និងសេដ្ឋកិច្ចឌីជីថល ជាមួយរាជរដ្ឋាភិបាល។
នៅក្នុងឱកាសនោះដែរ ដើម្បីលើកស្ទួយប្រសិទ្ធភាពការងារនៅក្នុងក្រសួង និងនៅតាមមន្ទីរពាណិជ្ជកម្មរាជធានីខេត្ត និងជាការពង្រឹង និងពង្រីកកិច្ចសហប្រតិបត្តិការ រវាងតំបន់ហ្សិនចិន និងព្រះរាជាណាចក្រកម្ពុជា នៅក្រោមក្របខ័ណ្ឌមេគង្គ-ឡានឆាន លោកស្រី តៅ យីតៅ និងគណៈប្រតិភូបានចុះកិច្ចសន្យាផ្តល់កុំព្យូទ័រយួរដៃ (Laptop) ចំនួន 50គ្រឿង ដែលជាអំណោយរបស់សាកលវិទ្យាល័យ ហ្សិនចិន ជូនលោករដ្ឋមន្ត្រី និងក្រសួងពាណិជ្ជកម្ម។
ឯកឧត្តម ប៉ាន សូរស័ក្តិ ក៏បានអំពាវនាវដល់មូលនិធិហ្សិនចិន និងគណៈប្រតិភូទាំងអស់ សិក្សាលម្អិត និងជួយគាំទ្រកម្ពុជាតាមរយៈការធ្វើពាណិជ្ជកម្ម និងវិនិយោគនៅកម្ពុជា ដើម្បីទាញយកផលប្រយោជន៍ពីគ្នាទៅវិញទៅមក ដោយសារ Shenzhen គឺជាតំបន់មួយដែលមានការអភិវឌ្ឍប្រកបដោយបច្ចេកវិទ្យាទំនើប និងឈានមុខគេនៅក្នុងផលិតកម្ម ឧស្សាហកម្ម និងសេវាកម្ម ជាពិសេសពាណិជ្ជកម្មតាមអេឡិចត្រូនិក៕
