ផ្ទីដូងជាប្រភេទបន្លែដែលងាយស្រួលដាំដុះ ងាយស្រួលថែទាំ និងឆាប់បានប្រមូលផលជាងបន្លែផ្សេងៗទៀត និងមានតម្រូវការខ្ពស់គួរសមនៅលើទីផ្សារផងដែរ ដោយសារតែបន្លែប្រភេទនេះ គេអាចយកទៅចម្អិនធ្វើជាអាហារបានច្រើនប្រភេទទៅតាមចំណង់ចំណូលចិត្តរបស់គ្រួសារនីមួយៗ ដូចជា ស្រុសធ្វើជាអន្លក់ជ្រលក់ប្រហុក ឬញ៉ាំជាមួយទឹកគ្រឿង ធ្វើជាបន្លែស្ងោរជាមួយឆ្អឺងជំនីជ្រូក ឬស្ងោរជាមួយសាច់មាន់ក៏បាន និងថែមទាំងមានរសជាតិឆ្ងាញ់ទៀតផង។
លោក ប៉ែន វណ្ណៈ អ្នកមើលការទូទៅក្នុងសហគមន៍ដាំបន្លែសម្បូរសប្បាយ មានទីតាំងនៅភូមិព្រៃក្តួច ឃុំត្រពាំងក្រញូង ស្រុកត្រាំកក់ ខេត្តតាកែវ មានប្រសាសន៍ថា ផ្ទីដូងពិតជាងាយស្រួលដាំដុះ ងាយស្រួលថែទាំមែន និងប្រើរយៈពេលខ្លីត្រឹមរយៈពេលតែ 1ខែ ឬ10ខែ 10ថ្ងៃ ប៉ុណ្ណោះគេអាចកាត់វាយកមកធ្វើម្ហូបពិសា ឬយកទៅដាក់លក់នៅលើទីផ្សារបានហើយ និងថែមទាំងមានតម្រូវការច្រើនគួរសមនៅលើទីផ្សារទៀតផង។
លោកបានរៀបរាប់ និងបង្ហាញពីរបៀបដាំដុះបន្លែផ្ទីដូងនេះថា មុនដំបូងគេត្រូវធ្វើធ្នើរៀបចំថ្នាលសម្រាប់បណ្តុះកូនផ្ទីឱ្យខ្ពស់ផុតពីដីប្រមាណជា 1ម៉ែត្រ ដែលមានទទឹងប្រហែល1.5ម៉ែត្រ និងបណ្តោយប្រហែល10ម៉ែត្រ ហើយយកដីដំបូកលាយជាមួយជីអាចម៍គោ ដោយត្រូវលាយច្របល់ចូលគ្នាឱ្យសព្វដែលមានអត្រាល្បាយស្មើគ្នា រវាងដី និងជីអាចម៍គោ ពោលគឺ50%ម្នាក់ បន្ទាប់មកគេត្រូវយកធ្យូងអង្កាមទៅលាយជាមួយ ដោយដាក់ធ្យូងអង្កាម1គីឡូក្នុងចំណោមដីជី10ទៅ15គីឡូក្រាម រួចយកទៅចាក់លើធ្នើកម្រាស់ជាង1តឹក ហើយផ្អាប់ទុករហូតដីត្រជាក់មានដុះស្មៅខ្លះហើយ ទើបយកគ្រាប់ផ្ទីទៅបាចពីលើឱ្យល្មមៗ ដែលត្រូវចេះប៉ាន់ស្មានដោយខ្លួនឯង កុំឱ្យស្តើងពេក កុំឱ្យក្រាសពេក បន្ទាប់មកត្រូវយកដីស្រទាប់លើទៅរោយពីលើស្តើងធ្វើជាគម្របកប់គ្រាប់ផ្ទី ការពារការហើរប៉ើងគ្រាប់ ឬសត្វស្លាបចុះចឹកស៊ីបាន ហើយត្រូវស្រោចទឹកព្រឹកល្ងាចៗរៀងរាល់ថ្ងៃ ដោយប្រើបោយទឹកផ្កាឈូកស្រោច កុំយកទឹកទុយោទៅបាញ់ស្រោច នាំឱ្យប៉ើងគ្រាប់ផ្ទីដុះមិនស្មើល្បាយ។ រហូតកូនផ្ទីអាយុបាន10ថ្ងៃទើបគេដកយកទៅស្ទូងនៅលើដីទៅតាមរងនីមួយដែលអាចដាំឃ្លាតពីគ្នាប្រមាណជា 2.5តឹកកន្លះក្នុងមួយដើមឬមួយគុម្ព ហើយរងនីមួយៗមានទទឹងប្រហែល1ម៉ែត្រ និងបណ្តោយវែងក៏បានខ្លីក៏បានទៅតាមផ្ទៃដីដាំដុះរបស់កសិករម្នាក់ៗ បន្ទាប់ពីស្ទូងហើយ គ្រាន់តែស្រោចទឹកមួយថ្ងៃពីរដងរួចមើលថែទាំសត្វល្អិតជាការស្រេច។ ជាទូទៅផ្ទីដូង មិនសូវមានសត្វល្អិតបំផ្លាញនោះទេ ដោយពេលខ្លះមានសត្វស្រមោចយាយីម្តងម្កាលកើដែរ តែគេគ្រាន់តែយកផេះទៅរោយចំកន្លែងស្រមោចរោមនោះ វានឹងរត់ចេញអស់ទៅវិញមិនខាន។
អ្នកជំនាញកសិកម្មខាងលើអះអាងថា ក្រោយពីស្ទូងកូនបានប្រមាណជា 15ទៅ20ថ្ងៃមកដើមផ្ទីចាប់ផ្តើមបែកខ្នែង ដែលគេអាចកាត់យកទៅធ្វើម្ហូបឬលក់នៅលើទីផ្សារបានហើយ ដែលក្នុងមួយគីឡូក្រាមមានតម្លៃចន្លោះពី 3.000ទៅ4000រៀល។ ហើយជួនកាលមានអ្នកភូមិមកសុំចែកយកទៅធ្វើម្ហូបឆាឬស្ងោរ ទៅតាមចំណង់ចំណូលចិត្តគ្រួសារនីមួយៗ ប៉ុន្តែភាគច្រើនការដាំដុះផ្ទីខាងលើនេះ គឺដើម្បីផ្គត់ផ្គង់ទៅឱ្យផ្សារសហគមន៍កសិផលធម្មជាតិ សេដាក (CEDAC) ក្នុងក្រុងភ្នំពេញ។ ក្រោយពីកាត់លក់លើកទី1 បើមានការថែទាល្អដាក់ជីហើយស្រោចទឹកឱ្យបានទៀងទាត់មួយថ្ងៃ 2ដងមួយសប្តាហ៍ក្រោយមកគេអាចកាត់មែកទៅលក់ម្តងទៀត ហើយវាផ្តល់ផលបានយូររហូតដល់អាយុ 6ខែឯណោះ បើសិនជាមានការថែទាំល្អ។
សម្រាប់ផ្ទៃដីដាំដុះផ្ទីដូងមានទំហុំ 20គុណនឹង50ម៉ែត្រ គេអាចប្រមូលផលផ្ទីបានប្រមាណជា50ទៅ60គីឡូក្រាមក្នុងមួយខែ ហើយការដែលផ្ទីដូងនៅក្នុងកសិដ្ឋានខាងលើ ផ្តល់ផលតិចនេះដោយសារតែផ្ទៃដីកសិដ្ឋានខាងលើ ដាំដុះបន្លែចម្រុះផ្សេងៗ មានដូចជាត្រប់ស្រួយ ម្ទេសប្លោក ប៉េងប៉ោះ និងបន្លែផ្សេងៗទៀតប្រមាណជា 20មុខឯណោះ។ ព្រោះថាការដាំដុះបន្លែច្រើនប្រភេទនៅលើទីតាំងដីតែមួយ ងាយស្រួលប្រមូលផលបន្លែច្រើនប្រភេទ សម្រាប់ផ្គត់ផ្គង់ទៅតាមតម្រូវការនៅលើទីផ្សារ។
អ្នកប្រឹក្សាអំពីសុខភាពលើកឡើងថា ការទទួលទានផ្ទីដូង ផ្តល់គុណប្រយោជន៍បានល្អជាងការទទួលទានបន្លែផ្សេងៗទៀត ប៉ុន្តែការផ្តល់សារធាតុបន្លែរបស់ផ្ទីដូង នៅចាញ់ការផ្តល់សារធាតុបន្លែរបស់ស្លឹកបាស់នៅឡើយទេ៕
