រដ្ឋាភិបាលបាននិងកំពុងតែរៀបចំផែនការអភិវឌ្ឍប្រភពអគ្គិសនីសម្រាប់ដំណើរការនៅឆ្នាំ2020-2025 ក្នុងគោលដៅការពារកម្រិតខ្ពស់កុំឱ្យមានការកើតឡើងនូវការខ្វះថាមពលដូចឆ្នាំនេះ។ នេះបើយោងតាមមន្រ្តីជាន់ខ្ពស់ពីអាជ្ញាធរអគ្គិសនីកម្ពុជា។
ឯកឧត្តម យឹម វិសិដ្ឋ ប្រធានអាជ្ញាធរអគ្គិសនីកម្ពុជាបានឱ្យដឹងថា កាលពីថ្ងៃទី25 ខែមីនានេះក្រសួងរ៉ែ និងថាមពល ដឹកនាំដោយ ឯកឧត្តមរដ្ឋលេខាធិការក្រសួង រ៉ែ និងថាមពល ទី នរិន្ទ ឯកឧត្តមរដ្ឋមន្ត្រីប្រតិភូអមនាយករដ្ឋមន្រ្តី កែវ រតនៈ អគ្គនាយកអគ្គិសនីកម្ពុជា និងអាជ្ញាធរអគ្គិសនីបានដឹកនាំការប្រជុំជាមួយមន្ត្រីបង្គោលសំខាន់ៗក្នុងវិស័យថាមពល មកពីក្រសួងរ៉ែ និងថាមពល អាជ្ញាធរអគ្គិសនីកម្ពុជា និងអគ្គិសនីកម្ពុជាដើម្បីរៀបចំផែនការអភិវឌ្ឍន៍ប្រភពអគ្គិសនីសម្រាប់ដំណើរការនៅឆ្នាំ2020-2025។
ឯកឧត្តម យឹម វិសិដ្ឋបានបន្តថាមានបញ្ហា2ដែលត្រូវបានជជែកក្នុងការរៀបចំផែនការអភិវឌ្ឍន៍ប្រភពអគ្គិសនី គឺក្រុមការងារប្រជុំបានត្រួតពិនិត្យថាមពលដែលមានស្រាប់ សម្រាប់ឆ្លើយតបនៅឆ្នាំក្រោយ និងលើកទិសដៅ ពិនិត្យ និងប្រើប្រាស់ចាប់ពីឆ្នាំ2020ដល់ 2025។
ឯកឧត្តមប្រធានអាជ្ញាធរអគ្គិសនីកម្ពុជាថា៖“ជាគោលការណ៍យើងបានធ្វើកំណត់ហេតុរួមគ្នាហើយធ្វើសំណើទៅកាន់ឯកឧត្តមរដ្ឋមន្រ្តីក្រសួងរ៉ែ និងថាមពលដើម្បីពិនិត្យ បន្ទាប់មកសំណើនេះនឹងត្រូវបញ្ចូនទៅកាន់សម្តេចនាយករដ្ឋមន្រ្តីដើម្បីសុំអនុម័តសម្រេចជាគោលការណ៍រួម”។
ឯកឧត្តមបន្តថា រដ្ឋាភិបាលនឹងត្រៀមថាមពលសម្រាប់ឆ្នាំខាងមុខៗ និងរកប្រភពថ្មីណាបន្ថែមទៀត ដើម្បីកុំឱ្យមានបញ្ហាចាប់ពីឆ្នាំ2021 ដល់ 2025។ ឯកឧត្តមបន្តថា ប្រភពថ្មីអាចយកចេញពីធ្យូងថ្ម ហ្គាស ឬថាមពលពីវារីអគ្គិសនី ទាំងអស់នេះត្រូវសុំគោលការណ៍រដ្ឋមន្រ្តីរ៉ែ និងថាមពល។
ឯកឧត្តមថាដំណោះស្រាយពេលនេះគឺចរចារជាមួយតួកគីក្នុងការទិញយកកប៉ាលអគ្គិសនីមកកាន់កម្ពុជា។ យើងកំពុងធ្វើការរឿងនេះ។ សព្វថ្ងៃកម្ពុជាមាន 2,600មេហ្គាវ៉ាត់ ប៉ុន្តែរាំងស្ងួតធ្វើឱ្យប៉ះពាល់ដល់វារីអគ្គិសនីភាគច្រើន។
ឯកឧត្តមថា៖“យើងបានគិតគូរច្បាស់លាស់លើរឿងនេះ ធ្វើយ៉ាងម៉េចឱ្យឆ្នាំក្រោយលែងមានបញ្ហាហ្នឹងកើតឡើង។ យើងប្រើម៉ាស៊ីនភ្លើង ដោយប្រើប្រេងខ្មៅ ឬឧស្ម័នធម្មជាតិ (ហ្គាស) ប៉ុន្តែយើងនឹងសិក្សាលម្អិតលើរឿងនេះ”។
ដោយឡែកឯកឧត្តម ទី នរិន្ទ រដ្ឋលេខាធិការក្រសួងរ៉ែ និងថាមពល មានប្រសាសន៍នៅក្នុងសន្និសិទសារព័ត៌មានកាលពីសុក្រសប្តាហ៍មុនថាការប្រើប្រាស់ថាមពលអគ្គិសនីនៅឆ្នាំនេះបានកើនឡើងជាងការរំពឹងទុកដែលនាំឱ្យមានការផ្គត់ ផ្គង់តិចជាងតម្រូវការ ដែលនាំឱ្យមានការខ្វះខាតអគ្គិសនីប្រើប្រាស់។
ឯកឧត្តមថ្លែងថា រដ្ឋាភិបាលបានកំពុងតែស្វែងរកប្រភពថាមពលផ្សេងៗមកបំពេញការខ្វះខាតនេះ។ រដ្ឋាភិបាលបានអភិវឌ្ឍប្រភពថាមពលផ្សេងៗដើម្បីផ្តល់ថាមពលដើម្បីបំពេញតម្រូវការឱ្យបានគ្រប់គ្រាន់។
ឯកឧត្តមមានប្រសាសន៍ថា៖“យើងបានចាប់ដៃគូជាមួយប្រទេសកំពុងអភិវឌ្ឍន៍ក្នុងការរៀបចំផែនការមេក្នុងការអភិវឌ្ឍគម្រោងថាមពលនៅកម្ពុជា”។ កកម្ពុជាបានប្រើប្រាស់ថាមពលប្រមាណជា 9,300លានគីឡូវ៉ាត់ម៉ោង នៅឆ្នាំ2018 ដែលជាមធ្យមប្រមាណជា 25,5លានគីឡូវ៉ាត់ម៉ោងក្នុង1ថ្ងៃ។
ឯកឧត្តម នរិន្ទ មានប្រសាសន៍ថា កាលពីខែមករា ដល់ខែកុម្ភៈ តម្រូវការថាមពលប្រើប្រាស់មានប្រមាណជា 31 លានគីឡូវ៉ាត់ម៉ោងក្នុងមួយថ្ងៃ ដែលតម្រូវការនេះត្រូវរកប្រភពថាមពលផ្សេងៗទៀតមកជំនួស រួមមាន ម៉ាស៊ីនភ្លើងជាដើម។
បច្ចុប្បន្ននេះកម្ពុជា មានវារីអគ្គិសនីដើរដោយកម្លាំងទឹកចំនួន 7កន្លែង ធ្យូងថ្ម2 ដើរដោយពន្លឺព្រះអាទិត្យ 2កន្លែង និងដើរដោយប្រេងកាតមួយចំនួនទៀត។ ឯកឧត្តមបានអះអាងថា តាមរយៈវត្តមានស្ថានីយផលិតថាមពលអគ្គិសនីទាំងនេះ បើមិនមានបញ្ហាបម្រែបម្រួលអាកាសធាតុទេ គឺកម្ពុជាមិនមានជួបបញ្ហាខ្វះខាតថាមពលនោះឡើយ បើទោះបីកំណើនតម្រូវការប្រើប្រាស់កើនឡើងខ្ពស់ក៏ដោយ។
បើយោងតាមអគ្គិសនីកម្ពុជាក្នុងគោលដៅនៃការអភិវឌ្ឍវិស័យអគ្គិសនីដល់ឆ្នាំ 2030 រដ្ឋាភិបាលកម្ពុជាបានរៀបចំផែនការអភិវឌ្ឍប្រភពអគ្គិសនីរួមមាន វារីអគ្គិសនី រោងចក្រអគ្គិសនីដោយធ្យូងថ្ម និងប្រភពផ្សេងៗទៀត ដូចជា ថាមពលពន្លឺព្រះអាទិត្យ ផ្គុំជាមួយនឹងការនាំចូលប្រភពអគ្គិសនីពីប្រទេសជិតខាង ដោបានដាក់ឱ្យដំណើរការគម្រោងជាបន្តបន្ទាប់តាមផែនការដែលបានគ្រោងទុក។
អគ្គិសនីកម្ពុជាបានឱដឹងថា ចាប់ពីខែមករាអាកាសធាតុក្តៅខ្លាំង និងការខ្វះខាតទឹកខុសប្រក្រតីធ្វើឱ្យតម្រូវការប្រើប្រាស់ថាមពលអគ្គិសនីនៅឆ្នាំ2019កើនឡើងយ៉ាងខ្លាំង លើសពីការរំពឹងទុក។ ការខ្វះទឹកនេះធ្វើ ឱ្យសមត្ថភាពផ្គត់ផ្គង់ចេញពីប្រភពវារីអគ្គិសនីថយចុះ មិនអាចធានាការផ្គត់ផ្គង់ថាមពល អគ្គិសនីពេញលេញទូទាំងប្រទេសដល់រដូវប្រាំងដូចសព្វមួយដង។
ដើម្បីដោះស្រាយបញ្ហានេះ អគ្គិសនីកម្ពុជាបានទំនាក់ទំនងជាមួយប្រទេសជិតខាងឱ្យជួយបង្កើនការផ្គត់ផ្គង់អគ្គិសនី បន្ថែមកម្ពុជា។ ជាលទ្ធផល ប្រទេសថៃបានជួយបង្កើនការផ្គត់ផ្គង់បន្ថែម 80មេហ្គាវ៉ាត់ ប្រទេសឡាវ 10មេហ្គាវ៉ាត់ និងប្រទេសវៀតណាមបានជួយរក្សាការផ្គត់ផ្គង់អគ្គិសនីនៅដដែល។ ទោះជាយ៉ាងណាកម្ពុជាខ្វះខាតថាមពលប្រមាណ 13ភាគរយ ដែលតម្រូវឱ្យអគ្គិសនីកម្ពុជាធ្វើការកាត់បន្ថយការផ្គត់ផ្គង់ខ្លះរហូតរដូវវស្សាមកដល់។
ការកាត់បន្ថយការផ្គត់ផ្គង់នេះធ្វើនៅពេលថ្ងៃតាមកន្លែងឆ្លាស់គ្នា ដើម្បីរក្សាការផ្គត់ផ្គង់នៅពេលយប់ ដែលជាពេលប្រជាជនត្រូវការប្រើប្រាស់ជាចាំបាច់ ជាមួយគ្នានេះ។ រយៈពេលនៃការលំបាក 72ថ្ងៃ អគ្គិសនីកម្ពុជានឹងផ្គត់ផ្គង់ជាធម្មតាវិញ។ ប្រសិនជាមានភ្លៀងធ្លាក់មកមុនក្នុងខែឧសភា ការផ្គត់ផ្គង់នឹងមានជាប្រក្រតីឡើងវិញ។៕
