នៅអឺរ៉ុប ខ្យល់ដកដង្ហើមអាចធ្វើឱ្យយើងស្លាប់បាន ព្រោះជារៀងរាល់ឆ្នាំមានមនុស្សប្រមាណជាង 400,000នាក់ត្រូវបានគេរកឃើញថា បានស្លាប់ដោយសារតែការពុលបរិយាកាស។ ចំនួនដ៏ច្រើននេះក៏បានផ្តល់ផលប៉ះពាល់យ៉ាងច្រើនផងដែរដល់ការចំណាយរបស់សង្គម គឺដល់ទៅរាប់រយពាន់លានអឺរ៉ូឯណោះនៅអឺរ៉ុប។
គុណភាពខ្យល់នៅក្នុងប្រទេសមហាសេដ្ឋីផ្នែកសេដ្ឋកិច្ចធំៗនៅអឺរ៉ុបទាំងអស់នេះ បានបង្កប់ដោយហានិភ័យខាងសុខភាពជាច្រើន ដោយក្នុងនោះបញ្ហាកើតឡើងពីប្រភពចម្រុះនៃវិស័យឧស្សាហកម្ម រួមទាំងសកម្មភាពនៃការរស់នៅរបស់មនុស្សដែលបានបង្កើតជាឧស្ម័នពុលដោយផ្ទាល់ និងដោយប្រយោល។ការប្រើប្រាស់ថង់ប្លាស្ទិកច្រើនជ្រុលក៏ជាប្រភពដ៏មិនល្អមួយដែលនាំឱ្យមានបញ្ហាប្រឈមចំពោះបរិយាកាស និងបរិស្ថានដែរ។
ផែនការកំណត់កម្រិតស្តង់ដារនៃគុណភាពបរិយាកាសនៅអឺរ៉ុប ត្រូវបានអនុវត្តតាំងពីជាង 20ឆ្នាំមុនម៉្លេះ តែទោះបីជាមានរយៈពេលវែងបែបនេះក៏ដោយ ក៏នៅអឺរ៉ុបមិនទាន់អាចធ្វើបាននូវប្រព័ន្ធស្តង់ដាមួយសម្រាប់ប្រទេសនានាក្នុងការដោះស្រាយបញ្ហាខ្យល់អាកាសនេះនៅឡើយ។ ប្រទេសនីមួយៗបានកំណត់យកស្តង់ដានៃភាពស្អាតក្នុងបរិយាកាសផ្សេងៗពីគ្នាទៅតាមស្ថានភាពជាក់ស្តែង ជាឧទាហរណ៍ស្តង់ដាដែលគេគិតថា ខ្យល់អាកាសស្អាតនៅក្នុងទីក្រុង Krakow(ប្រទេស Poland) បែរជាមិនអាចទទួលយកបានសម្រាប់ទីក្រុង Brussels(ប្រទេស Belgium)នោះទេ។
យោងតាមការប៉ាន់ស្មានរបស់អង្គការសុខភាពពិភពលោក (WHO) បានឱ្យដឹងថា មានមនុស្សប្រមាណ2លាននាក់បានស្លាប់ជុំវិញពិភពលោកដោយសារតែការពុលបរិយាកាស ហើយស្ថាប័នដ៏សំខាន់នេះក៏បានចេញសេចក្តីណែនាំដែលអាចទទួលយកបានសម្រាប់ដោះស្រាយបញ្ហានេះផងដែរ តែបញ្ហាប្រឈមនៅតែកើតមានសម្រាប់ពិភពលោកដែលកំពុងមានកំណើនប្រជាជន និងតម្រូវការយ៉ាងច្រើន។
លោក Janusz Wojciechowski សវនករដែលដឹកនាំការស្រាវជ្រាវពីបញ្ហាបំពុលបរិយាកាស បាននិយាយថា ចំនួនអ្នកស្លាប់ដោយសារតែការបំពុលបរិយាកាសជាហានិភ័យដ៏ធំមួយសម្រាប់វិស័យសុខភាពសាធារណៈរបស់អឺរ៉ុប។ បើគិតទៅ មានមនុស្សច្រើនជាង 1,000នាក់បានស្លាប់ជារៀងរាល់ថ្ងៃក្នុងទ្វីបអឺរ៉ុបទាំងមូល ចំនួននេះគឺខ្ពស់ជាងគ្រោះថ្នាក់ចរាចរណ៍ដោយសាររថយន្តដល់ទៅ 10ដងឯណោះ។
លោក Janusz Wojciechowski បានបញ្ជាក់ផងដែរថា សហភាពអឺរ៉ុបបានចំណាយថវិកាប្រមាណ 3.4ពាន់លានអឺរ៉ូលើការប្រើប្រាស់ថាមពលដែលមានការបំពុលខ្លាំង ច្រើនជាងចំនួនសម្រាប់ប្រឆាំងនឹងការបំពុលបរិយាកាសដែលមានត្រឹមតែ 1.8ពាន់លានអឺរ៉ូប៉ុណ្ណោះ។ យើងសង្ឃឹមថា ការបំពុលបរិយាកាសនឹងក្លាយជាចំណុចអាទិភាពមួយសម្រាប់អឺរ៉ុបក្នុងការដោះស្រាយ។
តាមការស្រាវជ្រាវ គុណភាពខ្យល់នៅទីក្រុងឡុងដ៍កាលពីចុងខែមករាបានឱ្យដឹងថា មានករណីលើសពីកម្រិតហាមឃាត់លើការបំពុលបរិយាកាសដែលបានកំណត់ទុកកាលពីឆ្នាំ2018 ចំណែកឯនៅជុំវិញទ្វីបអឺរ៉ុបវិញប្រទេសនានាចាប់ផ្តើមព្យាយាមគ្រប់លទ្ធភាពដើម្បីរៀបចំផែនការសកម្មភាពដោះស្រាយបញ្ហានេះ។ នៅទីក្រុង Berkeley (សហរដ្ឋអាមេរិក)ដែលជាតំបន់មួយត្រូវបានគេរាប់បញ្ចូលថា មានការបំពុលខ្យល់ដែរនោះ ហើយដើម្បីដោះស្រាយបញ្ហាពុលបរិយាកាសនេះអាជ្ញាធរនៅទីនោះបានហាមឃាត់ប្រជាពលរដ្ឋរបស់ខ្លួនមិនឱ្យជក់បារីលើសពី 7ដើមឡើយក្នុង 1ថ្ងៃ។ ចំពោះនៅទីក្រុង Brussels វិញបានគ្រោងរៀបចំព្រឹត្តិការណ៍ “ថ្ងៃដែលគ្មានរថយន្ត”ដើម្បីចូលរួមដោះស្រាយបញ្ហាបំពុលបរិយាកាសនេះដែរ៕
