ការជ្រើសរើសជំនាញសិក្សា ជាកូនសោគន្លឹះយ៉ាងសំខាន់ក្នុងការបំផុសសក្តានុពលដែលមានស្រាប់ឱ្យកាន់តែមានឥទ្ធិពល សម្រាប់ប្រើប្រាស់ក្នុងការដោះស្រាយបញ្ហាជីវិត និងសង្គមនាថ្ងៃអនាគត។ បច្ចុប្បន្ននេះ ការធ្វើការងារមិនមែនប្រកួតប្រជែងតែក្នុងទីផ្សារក្នុងស្រុកប៉ុណ្ណោះទេ តែធនធានមនុស្សទាំងអស់ត្រូវប្រកួតប្រជែងក្នុងទីផ្សារសកលដ៏ទូលំទូលាយ ដែលទាមទារឱ្យមានការខិតខំប្រឹងប្រែងកាន់តែខ្លាំង។
លោក អាំង ភារៈ ប្រធានមជ្ឈមណ្ឌលការងាររាជធានីភ្នំពេញនៃទីភ្នាក់ងារជាតិ និងមុខរបររបស់ក្រសួងការងារ និងបណ្តុះបណ្ដាលវិជ្ជាជីវៈ បានលើកឡើងថា ការជ្រើសរើសអាជីព គឺជារឿងសំខាន់ខ្លាំងណាស់សម្រាប់ជីវិតរបស់មនុស្សម្នាក់ៗ ជាពិសេសយុវជនកម្ពុជាដែលកំពុងតែមានការរីកលូតលាស់យ៉ាងលឿនសម្រាប់ត្រៀមខ្លួនចូលទៅក្នុងទីផ្សារការងារនៅថ្ងៃអនាគត។ នៅគ្រប់ប្រទេសទាំងអស់ មិនថាប្រទេសអភិវឌ្ឍន៍ ឬកំពុងអភិវឌ្ឍន៍នោះទេ ការស្វែងរកជំនាញដែលស្របនឹងចំណង់ចំណូលចិត្ត និងទេពកោសល្យរបស់ខ្លួនជាចំណុចដែលគេយកចិត្តទុកដាក់ ព្រោះប្រសិនបើជ្រើសរើសជំនាញខុស បណ្តាលឱ្យខាតបង់ពេលវេលាច្រើនដើម្បីស្វែងរកសេចក្តីសុខពិតប្រាកដក្នុងជីវិតរស់នៅ។
លោក អាំង ភារៈ បាននិយាយថា៖ “ខ្ញុំនៅចាំពីអ្នកគ្រូខ្ញុំម្នាក់នៅប្រទេសជប៉ុន ដែលគាត់ធ្លាប់ធ្វើជាអ្នកគ្រប់គ្រងការងារសំខាន់នៅក្នុងក្រុមហ៊ុនមួយ ហើយនៅជប៉ុនមិនមែនជារឿងធម្មតាទេដែលបានឈានដល់តំណែងនេះ តែចុងក្រោយគាត់នៅតែសម្រេចចិត្តបោះបង់ការងារនោះចោល ហើយងាកមកធ្វើជាគ្រូបង្រៀនវិញ។ នៅពេលនោះគាត់បានប្រាប់ថា គាត់ទើបតែស្គាល់ខ្លួនឯងនៅអាយុជាង 40ឆ្នាំនេះទេ”។
អ្នកជំនាញផ្នែកការងារខាងលើបានបន្ថែមទៀតថា នៅពេលដែលយើងរកឃើញអ្វីដែលយើងស្រឡាញ់ពិតប្រាកដ យើងនឹងអាចធ្វើការងារនោះដោយមិននឿយហត់ ដែលធ្វើឱ្យផលិតភាពការងាររបស់យើងក៏កើនខ្ពស់ទៅតាមនោះដែរ។ ពេលខ្លះមនុស្សសុខចិត្តបោះបង់លុយដុំ មកយកលុយរាយវិញ ឱ្យតែសប្បាយចិត្តជាមួយអ្វីដែលខ្លួនបានធ្វើ ហើយរស់យ៉ាងមានន័យជាមួយអាជីពការងារដែលខ្លួនស្រឡាញ់ពេញចិត្តអស់មួយជីវិត។ ដើម្បីកុំឱ្យស្តាយក្រោយ យុវវ័យចាំបាច់ត្រូវស្វែងយល់ឱ្យច្បាស់ពីខ្លួនឯង និងព័ត៌មានជាមូលដ្ឋានជាច្រើនផ្សេងទៀតដើម្បីសម្រេចចិត្តឱ្យបានច្បាស់ពីជំនាញសម្រាប់ជាអាជីពនៅថ្ងៃអនាគត។
លោក តែ ឡាយ ប្រធាននាយកដ្ឋានអប់រំនៃក្រុមហ៊ុន វេសឡាញ អេឌ្យូខេសិន គ្រុប បានលើកឡើងថា យុវជនកាលពីសម័យមុន មិនមានសំណាងបានស្វែងយល់ពីការជ្រើសរើសជំនាញសិក្សានៅមហាវិទ្យាល័យបែបនេះទេ ការសម្រេចចិត្តជ្រើសរើសមុខវិជ្ជា គឺភាគច្រើនដើរដាក់ពាក្យតាមសាកលវិទ្យាល័យនានាដែលផ្តល់ឱកាស ហើយជ្រើសរើសរៀនសាលាណាដែលខ្លួនប្រឡងជាប់។ ការសិក្សាបែបនេះ ពេលខ្លះមិនបានឆ្លើយតបនឹងទេពកោសល្យជាក់ស្តែងរបស់មនុស្សម្នាក់ៗនោះទេ ដែលធ្វើឱ្យពួកគេត្រូវធ្វើការងារខុសនឹងជំនាញដែលបានសិក្សានៅមហាវិទ្យាល័យ។ មានអ្នកខ្លះទៀតដោយសារតែមិនទទួលបានព័ត៌មានច្បាស់លាស់ គាត់ក៏សម្រេចចិត្តសិក្សាតាមអាណាព្យាបាល ឬរៀនតាមគ្នា ដែលធ្វើឱ្យពួកគាត់មិនអាចអភិវឌ្ឍខ្លួនបានល្អក្នុងសាកលវិទ្យាល័យ ហើយចេញមកវិញក៏មិនអាចធ្វើការងារដោយភាពច្នៃប្រឌិតខ្ពស់បានដែរ។
លោក តែ ឡាយ បាននិយាយថា៖ “មនុស្សម្នាក់ៗមានទេពកោសល្យពីកំណើតដែលអាចធ្វើឱ្យយើងជោគជ័យ 50% តែចំពោះគំនិតអប់រំវិញ គេបញ្ជាក់ថា នៅមានមុំសំខាន់ៗចំនួន 3ទៀត គឺសាលារៀន គ្រួសារ និងសង្គម ដែលអាចធ្វើឱ្យគាត់ក្លាយជាមនុស្សដែលមានសមត្ថភាពពេញលេញ”។
លោក តែ ឡាយ បានលើកឡើងផងដែរថា ដោយមើលឃើញពីសារៈសំខាន់នៃការជ្រើសរើសជំនាញ និងសារៈសំខាន់នៃភាគីពាក់ព័ន្ធនានា ទើបសាលារៀនវេសឡាញន៍បានរៀបចំកម្មវិធីតម្រង់ទិសអាជីពការងារ ដើម្បីជួយសិស្សឱ្យបានយល់ពីវិធីសាស្ត្រក្នុងការជ្រើសរើសជំនាញ សំដៅធ្វើយ៉ាងណាឱ្យពួកគេជ្រើសរើសជំនាញត្រូវសម្រាប់សិក្សា។ ការជ្រើសរើសជំនាញត្រូវ ធ្វើឱ្យសិស្សចំណេញពេលវេលាច្រើនសម្រាប់ការអភិវឌ្ឍទាំងអាជីពការងារ ក៏ដូចជាអាជីវកម្មដែលពួកគេនឹងចាប់យកនៅថ្ងៃអនាគតដែរ។
ទន្ទឹមនឹងនោះដែរ លោក ថុល រិទ្ធី សហស្ថាបនិកគម្ពីរ បានលើកឡើងថា ការជ្រើសរើសជំនាញត្រូវ និងយល់ពីចរន្តរបស់ពិភពលោក ជាវិធីសំខាន់ក្នុងការធ្វើឱ្យយុវជនខ្មែរអាចមានលទ្ធភាពក្នុងការប្រកួតប្រជែងជាមួយបណ្តាប្រទេសទាំងអស់លើពិភពលោក និងអាចមានឱកាសក្នុងការដើរលឿនជាងគេនៅថ្ងៃអនាគត។ លោកបន្តថា បច្ចុប្បន្ននេះក្រៅពីជំនាញគោលនៅមហាវិទ្យាល័យ និងជំនាញភាសានានាហើយនោះ ជំនាញបច្ចេកវិទ្យាក៏ជាជំនាញមួយដែលយុវជនត្រូវចាប់យក ព្រោះគ្រប់មុខរបរទាំងអស់នៅលើពិភពលោកចាំបាច់ត្រូវប្រើប្រាស់បច្ចេកវិទ្យា។ ហេតុនេះការសិក្សាបច្ចេកវិទ្យាថ្មីៗស្របនឹងចរន្តរបស់ពិភពលោក ដូចជាកម្មវិធីប្រភេទ Open sources ជាដើមជាអ្វីដែលយុវជនខ្មែរគួរស្វែងយល់ ព្រោះបច្ចុប្បន្ននេះបណ្តាប្រទេសជាច្រើនមិនទាន់ចាប់អារម្មណ៍ខ្លាំងនៅឡើយទេ តែខ្មែរយើងចាប់ផ្តើមផ្សព្វផ្សាយ និងជំរុញឱ្យមានការសិក្សាបន្តិចម្តងៗហើយ។ នៅថ្ងៃក្រោយ ពេលពិភពលោកចាប់ផ្តើមប្រើប្រាស់កម្មវិធីនេះ យុវជនយើងបច្ចុប្បន្ននេះអាចប្រើប្រាស់បានរួចស្រេច មិនចាំបាច់ខំខ្លាំងដូចបណ្តាប្រទេសផ្សេងទៀតនោះទេ។
លោក ថុល រិទ្ធី បាននិយាយថា៖ “ការសម្រេចចិត្តត្រូវ ធ្វើឱ្យយើងចំណេញពេលវេលា និងអភិវឌ្ឍសមត្ថភាពបានលឿន ហើយអាចរស់នៅប្រកបដោយសេរីភាពទៀតផង។ នៅពេលដែលយើងជ្រើសរើសជំនាញត្រូវ យើងធ្វើការដោយក្តីស្រឡាញ់ នោះយើងនឹងមានសេរីភាពក្នុងការបង្កើតស្នាដៃប្រកបដោយមោទនភាព ហើយយើងក៏អាចមានសេរីភាពផ្នែកហិរញ្ញវត្ថុផងដែរ។ ប្រសិនបើយើងមិនមានសមត្ថភាពពិតប្រាកដ នោះយើងនឹងធ្វើការងារដើម្បីតែបម្រើ ឬជាទាសកររបស់លុយតែប៉ុណ្ណោះ”។
អ្នកជំនាញវិទ្យាសាស្ត្រកុំព្យូទ័រខាងលើបានលើកឡើងផងដែរថា យុវជនកម្ពុជាជំនាន់ថ្មី គួរចាប់ផ្តើមស្វែងរកអ្វីដែលខ្លួនស្រឡាញ់ឱ្យឃើញ ហើយអភិវឌ្ឍចំណុចខ្លាំងនោះឱ្យបានល្អដើម្បីបន្តចែករំលែកចំណេះដឹង និងដោះស្រាយបញ្ហាសំខាន់នានាតាមរយៈសមត្ថភាពដែលយើងមានទាំងផ្នែកបច្ចេកវិទ្យា និងផ្នែកផ្សេងៗទៀត៕
