ដូចបានជ្រាបថា អ្នកនាង ស្រេង សុកាន់ដា ហៅនាងខ្ញុង តារាកំប្លែងដ៏ល្បីឈ្មោះ ប្រចាំក្រុមនាយពាក់មី បានបង្កការភ្ញាក់ផ្អើលកក្រើកដល់ទស្សនិកជនយ៉ាងខ្លាំង កាលពីម្សិលមិញនេះ នៅពេលដែលគេឃើញនាង Live វីដេអូចេញពីផេកផ្លូវការរបស់ខ្លួន បង្ហាញមុខមាត់ដែលមានស្នាមជាំ ដែលទស្សនិកជនខ្លះសង្ស័យថានាងត្រូវប្ដីវាយទៀតផង។ តែតារាកំប្លែង នាង ខ្ញុង អះអាងថាមុខមាត់ដែលមានស្នាមជាំជាច្រើនដុំ គឺក្រោយពីវះកាត់កែច្រមុះ ធ្វើរួចរាល់រយៈពេល7ថ្ងៃហើយ ក៏ប៉ុន្តែគ្រាន់តែមិនទាន់កាត់ចេសតែប៉ុណ្ណោះ។ ក្នុងនោះក្រៅពីបង្ហាញការព្រួយបារម្ភ មហាជនក៏ជូនពរឱ្យអ្នកនាងឆាប់ជាជា ជាពិសេសក៏ចង់ឃើញមុខមាត់ថ្មីក្រោយពេលដែលអ្នកនាង ខ្ញុង កែហើយ ថាតើវាស្រស់ស្អាត និងប្លែកយ៉ាងណា?។
រឿងរ៉ាវខាងលើដ៏គួរឱ្យចាប់អារម្មណ៍នេះ បានធ្វើឱ្យ លោក ម៉ៃ សុគន្ធ ដែលមហាជនជាច្រើនបានស្គាល់ថាជា តារាមហាទើស បង្ហោះរូបភាព និងសារដាស់តឿនដល់មហាជន ចំពោះរឿងចាក់ច្រមុះឱ្យស្អាត និងស្រួចដោយបានរៀបរាប់ថា៖ «វាជាការឈឺចាប់មួយ សូមកុំជឿលើការចាក់ច្រមុះឱ្យស្អាតនិងស្រួចឱ្យសោះវាគ្រោះថ្នាក់ណាស់។ ខ្ញុំឆ្លងកាត់ហើយ ថ្ងៃនេះសូមបង្ហាញការពិតមួយនេះទុកជាបទពិសោធន៍ចុះ បងប្អូនបើចង់កែច្នៃភាពខ្វះខាតពីធម្មជាតិ សូមជៀសពីការចាក់បំពេញ។ បើចង់មែនធ្វើតែម្តងទៅ ខុសខ្ទង់ រឺមិនស្រឡាញ់ ដកចេញភ្លាម។ តែបើចាក់វិញ ខុសហើយ ត្រូវខាតពេលវេលា ខាតទាំងលុយច្រើន ព្រោះពិបាកណាស់ក្នុងការវះកាត់បូមយកចេញ»៕
