កំពុងតែមានទុក្ខកង្វល់ជាខ្លាំង ព្រោះតែមុនចង្រៃតែប៉ុន្មានគ្រាប់ ដែលមកទុំពីលើស្បែកមុខរបស់អ្នកមិនព្រមចេញទៅណាទាល់តែសោះមែនទេ? ឈប់គិត ឈប់បារម្ភ ព្រោះមិនប៉ុន្មានថ្ងៃទៀតទេមេនាំភាពមិនស្អាតនេះនឹងត្រូវរលាយបាត់ជាមិនខាន។ ឈប់! មិនមែននៅសុខៗវាទៅបាត់ដោយឯកឯងទេណា៎ កុំច្រឡំ… វាទៅព្រោះយើងជាអ្នកបណ្តេញវាចេញទេតើ ហើយវិធីបណ្តេញនោះគឺ៖
មុនធម្មតា : មុនអ្នកធ្វើការដុះសម្អាតមុខ អ្នកត្រូវធ្វើការចំហុយមុខអ្នកជាមុនសិន និងយកប៉េងប៉ោះមកដុះមុខ៖ បំបើករន្ធញើស ក៏ដូចជារន្ធមុនរបស់អ្នកឱ្យធំបន្តិចជាមួយនឹងការចំហុយទឹកក្តៅមួយសន្ទុះ បន្ទាប់មកត្រដុសស្បែកមុខរបស់អ្នកជាមួយនឹងផ្លែប៉េងប៉ោះទុំមួយផ្លែ(កាត់ជា2កង់ទទឹងផ្លែ) ដោយច្របាច់យកទឹកចេញ និងមានលាយគ្រឿងផ្សំមួយចំនួនដូចជា ប៉េងប៉ោះ លាយស្ករស2-3ស្លាបព្រា(សម្រាប់ស្បែកធម្មតា)ឬប៉េងប៉ោះលាយប្រេងដូង កន្លះស្លាបព្រា(សម្រាប់ស្បែកស្ងូត) ដោយមានលាយទឹកឃ្មុំកន្លះស្លាបព្រាផងនោះទៅត្រដុសលើស្បែក ប្រមាណជា2នាទី។ ទុកចោលប្រហែល2-3 នាទីទៀត រួចសម្អាតចេញដោយទឹកក្តៅតិចៗ។ បន្ទាប់មកសឹមជូតមុខឱ្យបានស្អាត រួចផ្តល់សំណើមដល់ស្បែកវិញផង។
មុនខ្សាច់ : មិនសូវឃើញនៅកន្លែងណាផ្សេងក្រៅពីក្បែរៗច្រមុះនោះទេ ស្ទាបពេលណាមានតែអារម្មណ៍គ្រោតគ្រាត។ បណ្តោយឱ្យនៅយូរមិនបានទេ ត្រូវតែកម្ចាត់ចោល។ សម្អាតមុខរបស់អ្នកឱ្យស្អាត បន្ទាប់មកយកស៊ុតពណ៌ស(លាយទឹកឃ្មុំ) មកលាបលើផ្ទៃមុខរបស់អ្នក។ រួចទុកវាឱ្យស្ងួត ពេលដែលវាស្ងួតហើយ ត្រូវលាងសម្អាតមុខរបស់អ្នកជាមួយទឹក បន្ទាប់មកជូតមុខឱ្យស្ងួត ហើយប្រសិនបើអ្នកចង់បន្ថែមភាពតឹងណែនឱ្យស្បែកមុខនោះ អ្នកអាចយកស៊ុតពណ៌លឿងដែលនៅសល់នោះមកលាបនៅលើមុខម្តងទៀតក៏បាន។ ទុកវាចោល15-20នាទី បន្ទាប់មកសឹមលាងសម្អាតចេញវិញ ហើយជូតមុខឱ្យស្ងួត រួចផ្តល់សំណើមដល់ស្បែកមុខតាមធម្មតា។
ទោះជាយ៉ាងណាក៏ដោយកុំភ្លេចថា មុនដែលបាត់ទៅវិញហើយ ក៏អាចត្រឡប់មកវិញបានគ្រប់ពេលដែលអ្នកធ្វេសប្រហែសដែរ ដូច្នេះកុំភ្លេចឱ្យសោះថា នៅពេលដែលទទួលបានផ្ទៃមុខដ៏ស្រស់ស្អាតហើយនោះ ត្រូវថែរក្សាការពារវាឱ្យបានជាប់លាប់ផង។ បន្ទាប់ពីត្រឡប់មកពីខាងក្រៅវិញ ត្រូវចាំប្រហែល15-20នាទីសិន ដើម្បីឱ្យកម្តៅនៅលើស្បែកថយចុះ សឹមលាងសម្អាតផ្ទៃមុខឱ្យបានស្អាត ជាមួយនឹងហ្វូមលាងសម្អាតមុខដែលអ្នកប្រើប្រាស់ប្រចាំថ្ងៃ ព្រោះថារាល់ពេលដែលអ្នកចេញទៅខាងក្រៅ អ្នកពិតជាបាននាំត្រឡប់មកវិញនូវធូលី និងមេរោគផ្សេងៗមកតាមស្បែកនៅលើផ្ទៃរបស់អ្នក ហើយមេរោគទាំងអស់នោះហើយ ដែលជាមូលហេតុនាំឱ្យកើតមុន។ ចុះចំណែកអ្នកដែលមិនចេញទៅខាងក្រៅវិញ មិនចាំបាច់លាងសម្អាតមុខទេមែនទេ? ក៏នៅតែត្រូវលាងមុខដែរ គ្រាន់តែមិនចាំបាច់ប្រើហ្វូមនោះទេ ព្រោះការលាងមុខដោយទឹកស្អាតអាចជួយបន្ថែមភាពត្រជាក់ដល់ស្បែកមុខ បន្ថយកម្តៅលើស្បែក (កម្តៅក៏មានចំណែកក្នុងការធ្វើឱ្យស្បែកកើតមុនដែរ)។ ការពារស្បែកពីធូលីដី និងមេរោគរាល់ពេលចេញទៅខាងក្រៅ សម្អាតស្បែកឱ្យបានស្អាតពេលត្រឡប់មកវិញ បាញ់ទឹកលើមុខផ្តល់សំណើម បន្ថែមភាពស្រស់ថ្លា កម្ចាត់កោសិកាស្បែកចាស់ៗ បន្ថយកម្តៅក្នុងរាងកាយ(ពេលអ្នកក្តៅក្នុង ចូរទទួលទានទឹកឱ្យបានច្រើន និងគ្រប់គ្រាន់) និងសម្រាកឱ្យបានគ្រប់គ្រាន់ អនាម័យល្អ… ជាវិធីការពារដ៏ល្អបំផុតសម្រាប់អ្នកដែលចង់ការពារស្បែកមិនឱ្យកើតមុនតទៅទៀត៕
