រដ្ឋបាលរាជធានីភ្នំពេញបានរៀបចំពិធីចុះហត្ថលេខាលើកិច្ចព្រមព្រៀងការដាក់ឱ្យដំណើរការនិងការថែទាំសេវាភ្លើងបំភ្លឺផ្លូវសាធារណៈក្នុងទីក្រុងតាមប្រព័ន្ធគ្រប់គ្រងទីក្រុងវៃឆ្លាតក្នុងរាជធានីភ្នំពេញ (Smart lighting System) រវាងក្រុមហ៊ុន Minebea Cambodia និងក្រុមហ៊ុន PPDE & C ដែលរដ្ឋបាលរាជធានីភ្នំពេញបានប្រគល់សិទ្ធិឱ្យក្រុមហ៊ុន PPDE & C ជាអ្នករៀបចំកែលម្អភ្លើងបំភ្លឺផ្លូវសាធារណៈក្នុងរាជធានីភ្នំពេញ ដោយប្រើអំពូលភ្លើងវៃឆ្លាតតាមបច្ចេកវិទ្យាទំនើបទាន់សម័យ សន្សំសំចៃភ្លើងដែលអំពូលភ្លើងវៃឆ្លាតនេះផលិតដោយក្រុមហ៊ុន Minebea Cambodia របស់ប្រទេសជប៉ុន។
ពិធីចុះហត្ថលេខានេះបានប្រព្រឹត្ដទៅកាលពីថ្ងៃពុធ ទី20 ខែកុម្ភៈ ឆ្នាំ2019 នៅសាលារាជធានីភ្នំពេញ ក្រោមអធិបតីភាពឯកឧត្ដម ឃួង ស្រេង អភិបាលរាជធានីភ្នំពេញ និងលោក យូស៊ីហ៊ីសា កៃណឺម៉ា អគ្គនាយកក្រុមហ៊ុន Minebea Mitsumi ជប៉ុន។
ឯកឧត្ដម ឃួង ស្រេង បានមានប្រសាសន៍ដោយបានចាត់ទុកក្រុមហ៊ុន Minebea ដែលបានផលិតគ្រឿងបរិក្ខារប្រើប្រាស់ផ្សេងៗថា ជារោងចក្រដែលមានបរិយាកាសការងារល្អ ពុំដែលកើតមានបញ្ហារវាងថៅកែ និងកម្មករ-កម្មការិនីឡើយ។ ឯកឧត្ដមបានថ្លែងអំណរគុណដល់ក្រុមហ៊ុន Minebea ដែលបានផ្តល់ទំនុកចិត្ត និងជ្រើសរើសយករាជធានីភ្នំពេញ ធ្វើជាទីតាំងវិនិយោគដោយមើលឃើញពីកត្តាសន្តិភាព ស្ថិរភាពនយោបាយ និងបរិយាកាសវិនិយោគនៅកម្ពុជា។ រដ្ឋបាលរាជធានីភ្នំពេញធ្វើការគាំទ្រយ៉ាងពេញទំហឹងចំពោះក្រុមហ៊ុន Minebea ។
ឯកឧត្ដម ឃួង ស្រេង បានបន្តថា រដ្ឋបាលរាជធានីភ្នំពេញត្រៀមខ្លួនធ្វើការគាំទ្រជានិច្ចចំពោះអ្នកវិនិយោគមកពីប្រទេសជប៉ុន ស្របពេលដែលកម្ពុជាមានសក្ដានុពលច្រើនសម្រាប់ធ្វើការវិនិយោគ និងស្របតាមចំណង់ចំណូលចិត្តរបស់ពលរដ្ឋកម្ពុជាដែលចូលចិត្តប្រើប្រាស់ផលិតផលរបស់ជប៉ុន។
លោក យូស៊ីហ៊ីសា កៃណឺម៉ា អគ្គនាយកក្រុមហ៊ុន Minebea ជប៉ុន បានអរគុណដល់រដ្ឋបាលរាជធានីភ្នំពេញដែលជានិច្ចកាលតែងតែផ្តល់ការគាំទ្រដល់ក្រុមហ៊ុនរបស់លោក។ អំពូលភ្លើងឆ្លាតវៃប្រភេទ LED ដែលក្រុមហ៊ុន Minebea នឹងផ្គត់ផ្គង់សម្រាប់បំភ្លឺផ្លូវសាធារណៈក្នុងរាជធានីភ្នំពេញ គឺជាអំពូលភ្លើងដែលអាចសន្សំសំចៃថាមពលអគ្គិសនីរហូតដល់ 80% បើប្រៀបធៀបនឹងអំពូលភ្លើងធម្មតា និងអាចដំឡើង ឬបន្ថយពន្លឺតាមរយៈទូរបញ្ជាតាមស្ថានភាពជាក់ស្តែងនៃចរាចរណ៍តាមដងផ្លូវ។
អំពូលភ្លើងឆ្លាតវៃនេះត្រូវបានក្រុមហ៊ុនប្រើប្រាស់សាកល្បងរួចហើយ នៅតាមវិថីសំខាន់ៗចំនួន 3គឺ៖ មហាវិថីព្រះនរោត្តម មហាវិថីសហព័ន្ធរុស្ស៊ី និងមហាវិថីសម្តេចតេជោហ៊ុនសែន ជាអំពូលភ្លើងដែលធានាបាននូវសោភណភាព និងបរិស្ថានយ៉ាងល្អប្រសើរ។ នេះជាការបោះជំហានថ្មីមួយទៀតរបស់រាជធានីភ្នំពេញក្នុងការគ្រប់គ្រងទីក្រុងវៃឆ្លាតដូចបណ្តាទីក្រុងនានានៅក្នុងតំបន់អាស៊ានផងដែរ។
សូមបញ្ជាក់ថា អំពូលភ្លើងបំភ្លឺផ្លូវវៃឆ្លាតនេះ មិនត្រឹមតែជួយដល់បរិស្ថានប៉ុណ្ណោះទេ គឺជួយដល់ផ្នែកសន្តិសុខនៅពេលរាត្រី និងធានាបាននូវសុវត្ថិភាពចរាចរណ៍ ព្រមទាំងកាត់បន្ថយនូវការចំណាយថវិកាច្រើនទៀតផង៕
