កន្លងមកស្ត្រីក្នុងវិស័យបច្ចេកវិទ្យាមានមិនច្រើនពេកទេនៅកម្ពុជា ព្រោះប្រជាជនខ្មែរនៅមានផ្នត់គំនិតមួយយល់ឃើញថាមុខវិជ្ជាបច្ចេកវិទ្យាព័ត៌មាន (ICT) គឺជាមុខវិជ្ជាសម្រាប់បុរស។ ជាក់ស្តែងមុខវិជ្ជានេះជាមុខវិជ្ជាដែលមានលក្ខណសម្បត្តិល្អសម្រាប់ស្ត្រីផងដែរក្នុងសង្គមដែលកំពុងតែមានការវិវឌ្ឍយ៉ាងលឿនផ្នែកបច្ចេកវិទ្យា នៅគ្រប់វិស័យទាំងអស់។
បច្ចុប្បន្ននេះ ស្ត្រីលើពិភពលោកមិនមែនតែកម្ពុជា នោះទេ ត្រូវបានលើកទឹកចិត្តឱ្យចូលរួមឱ្យបានសកម្មក្នុងវិស័យបច្ចេកវិទ្យា។ ការលើកទឹកចិត្តទាំងអស់នោះមានដូចជា ការផ្តល់កូតាអាហារូបករណ៍ពិសេសសម្រាប់ស្ត្រី ការបង្កើតកម្មវិធីផ្លាស់ប្តូរបទពិសោធ ការប្រកួតប្រជែងសម្រាប់ស្ត្រី និងការលើកទឹកចិត្តចំពោះមុខតំណែងមួយចំនួនសម្រាប់ស្ត្រីតែម្តងនៅក្នុងក្រុមហ៊ុនសំខាន់ៗនានា។ ស្ត្រីជាចំណែកយ៉ាងសំខាន់នៅក្នុងសង្គមនាពេលបច្ចុប្បន្ន ដែលអាចមានលទ្ធភាពខ្ពស់ដើម្បីដោះស្រាយបញ្ហាប្រឈមនានាដោយការប្រើប្រាស់បច្ចេកវិទ្យា ជាពិសេសបញ្ហារបស់ស្ត្រីដូចគ្នា ព្រោះមានតែស្ត្រីទេដែលយល់ និងដឹងពីអារម្មណ៍ស្ថានភាព និងបញ្ហាប្រឈមនានារបស់ស្ត្រីដូចគ្នា។
ដើម្បីជំរុញស្ត្រីឱ្យចូលរួមកាន់តែសកម្មក្នុងវិស័យបច្ចេកវិទ្យាព័ត៌មានវិទ្យា ក្រសួងអប់រំ យុវជន និងកីឡា សហការជាមួយគ្រឹះស្ថានបណ្តុះបណ្តាល IT Academy STEP Cambodia ចាប់ផ្តើមអនុវត្តកម្មវិធីមួយឈ្មោះថា “Sister of Code” ដើម្បីលើកទឹកចិត្តឱ្យសិស្សស្រីនៅកម្ពុជាព្យាយាមសរសេរកូដកម្មវិធី និងអភិវឌ្ឍទំនុកចិត្តក៏ដូចជាផ្តល់ឱកាសជោគជ័យផ្នែកឌីជីថលដល់និស្សិតស្រីនៅផងដែរ។
កម្មវិធី នេះនឹងជួយស្ត្រីកម្ពុជាឱ្យកាន់តែមានសមត្ថភាពដើម្បីចូលរួមប្រកួតប្រជែងក្នុងទីផ្សារការងារ ជាពិសេសគឺបង្កើតស្នាដៃជានវានុវត្តន៍ថ្មីសម្រាប់ដោះស្រាយបញ្ហានានា និងឈានទៅក្លាយជាអ្នកជំនាញខ្លាំងៗដើម្បីបម្រើឱ្យវិស័យនានានាពេលអនាគត។ ចំពោះសិស្សដែលអាចចូលរៀនបានគឺមានអាយុចន្លោះពី 10ឆ្នាំ ដល់ 18ឆ្នាំ ដែលកម្មវិធីនេះនឹងបង្រៀនពីមូលដ្ឋានគ្រឹះក្នុងការសរសេរកូដដោយឥតគិតថ្លៃរយៈពេល 6ខែ ហើយត្រូវសិក្សាក្នុងមួយថ្ងៃ-មួយសប្តាហ៍ រយៈពេល 2ម៉ោងកន្លះ៕
