ដោយសារតែការអប់រំកាន់តែមានលក្ខណៈប្រសើរឡើង មនុស្សស្រីចាប់ផ្តើមមានសមត្ថភាព និងគំនិតច្នៃប្រឌិតកាន់តែខ្លាំង ទាំងក្នុងការងារ និងការដោះស្រាយបញ្ហាក្នុងសង្គម។ ដោយមើលឃើញពីតម្រូវការផ្នែកចំណីអាហារសម្រាប់ប្រជាជនខ្មែរបច្ចុប្បន្នដែលមានភាពមមាញឹកច្រើនក្នុងការងារប្រចាំថ្ងៃ យុវតី 2រូបបានប្រើប្រាស់សមត្ថភាពលើជំនាញផលិតចំណីអាហាររបស់ខ្លួនដើម្បីបង្កើតផលិតផលថ្មីដែលជាប្រភេទអាហារធម្មជាតិមានសារធាតុចិញ្ចឹមគ្រប់គ្រាន់ ងាយស្រួលញ៉ាំ ចំណេញពេលវេលា និងថវិកាសម្រាប់អ្នកមិនមានពេលគ្រប់គ្រាន់ដើម្បីចម្អិនអាហារពេលព្រឹក។
កញ្ញា ប៉ែន បូនីតា ស្ថាបនិកនៃក្រុមផលិតអាហារធម្មជាតិ (organic) ខ្មែរស៊ីរៀល និងជាអ្នកជំនាញផ្នែកគីមីអាហារបានលើកឡើងថា បច្ចុប្បន្ននេះនិស្សិត និងអ្នកធ្វើការងារជាច្រើនមានភាពមមាញឹកកាន់តែច្រើន ដែលកំពុងមានបញ្ហារឿងអាហារ ព្រោះពួកគាត់មានពេលខ្លី មិនមានពេលដើរផ្សារច្រើន និងពិបាករកចំណីអាហារនៅពេលព្រឹក ធ្វើឱ្យអ្នកខ្លះសម្រេចចិត្តអត់អាហារពេលព្រឹក រហូតមានបញ្ហាសុខភាព។ ហេតុនេះហើយទើបក្នុងនាមជាអ្នកសិក្សាលើផ្នែកគីមីចំណីអាហារ យើងគិតថា យើងគួរបង្កើតផលិត-ផលមួយដែលអាចជួយពួកគាត់ និងជួយផ្នែកផ្សេងៗទៀតក្នុងសង្គមឱ្យកាន់តែប្រសើរឡើង។ បន្ទាប់មកពួកយើងក៏បង្កើតអាហារ organic ខ្មែរស៊ីរៀលនេះឡើងព្រោះវាជាប្រភេទអាហារក្រៀមដែលគ្មានប្រើប្រាស់ជាតិគីមី អាចញ៉ាំជាមួយទឹកដោះគោបានយ៉ាងងាយ។ ខ្មែរស៊ីរៀលនេះ ជាប្រភេទអាហារស៊ីរៀល(Cereal)ខ្មែរដំបូងបំផុតដែលកន្លងមកយើងធ្លាប់តែឃើញផ្សារទំនើបធំៗគេនាំចូលពីបរទេស ហេតុនេះយើងក៏មានគំនិតផ្សំបន្លែខ្មែរយើងដែលមានស្រាប់ដូចជា ដំឡូង ពោត ត្រាវ ល្ពៅ ស្វាយ និងសណ្តែកសៀងដើម្បីបង្កើតវាឡើង។ អ្នកជំនាញខាងគីមីអាហារខាងលើបានលើកឡើងផងដែរថា មូលហេតុដែលជ្រើសរើសយកប្រភេទបន្លែទាំងអស់នេះ ព្រោះដោយសារតែដំឡូង និងត្រាវមានសារធាតុ Fiber ហើយសណ្តែកសៀងមានសារធាតុប្រូតេអុីន ល្ពៅ មានវីតាមីនAរួមទាំងបន្លែផ្លែឈើផ្សេងៗទៀតមានសារធាតុចិញ្ចឹមល្អសម្រាប់រាងកាយ។ ប្រជាជនខ្មែរយើងភាគច្រើនមិនសូវបានស្វែងយល់ពីតុល្យភាពក្នុងការទទួលទានអាហារនោះទេ ហេតុនេះហើយទើបយើងព្យាយាមបង្កើតអាហារនេះឡើងដោយបញ្ចូលសារធាតុចិញ្ចឹមសម្រាប់ពួកគាត់ឱ្យបានត្រឹមត្រូវ និងមានតុល្យភាពពេញមួយព្រឹក។ ចំពោះវិធីផលិតគឺយើងធ្វើការថ្លឹង និងសម្ងួតដោយវិធីសាស្ត្រធម្មជាតិសុទ្ធសាធ ដោយយើងវាស់សីតុណ្ហភាព និងពេលវេលាត្រឹមត្រូវដើម្បីធានាថាអាហារទាំងអស់នោះមិនបាត់បង់សារធាតុចិញ្ចឹមរបស់វា។ ចំណែកឯពេលវេលាសម្រាប់រក្សាទុក ប្រសិនបើយើងទុកឱ្យបានត្រឹមត្រូវអាហារនេះអាចរក្សាទុកបានរយៈពេល 3ខែ។
កញ្ញា ប៉ែន បូនីតា បាននិយាយថា៖ “អាហារខ្មែរស៊ីរៀលនេះ ក៏ត្រូវបានផលិតឡើងដើម្បីជួយដល់ប្រជាជនខ្មែរយើងផងដែរ ព្រោះប្រទេសយើងជាប្រទេសដែលសម្បូរទៅដោយផលដំណាំ តែកន្លងមកកសិករគាត់មិនអាចរកទីផ្សារបានល្អដែលធ្វើឱ្យគាត់ត្រូវបង្ខំចិត្តលក់ចេញក្នុងតម្លៃថោក។ ម្យ៉ាងវិញទៀត យើងធ្វើបែបនេះក៏ចង់លើកស្ទួយឱ្យមានការដាំបន្លែ organic ឱ្យបានច្រើនដើម្បីជួយដល់សុខភាពរបស់ប្រជាជនជា-ច្រើនផ្សេងទៀត”។
កញ្ញា បូនីតា បានបន្ថែមទៀតថា ផលិតផលខ្មែរស៊ីរៀលនេះ ថ្វីដ្បិតតែវាត្រូវបានវេចខ្ចប់ដាក់ក្នុងកញ្ចប់ និងកំប៉ុងក៏ពិតមែន តែវាមិនមែនជាប្រភេទអាហារ Fast Food ដូចជាមី ឬអាហារដែលមានសារធាតុខ្លាញ់ច្រើនផ្សេងៗទៀតនោះទេ តែវាជាប្រភេទបន្លែផ្លែឈើខ្មែរយើងសុទ្ធសាធ ដែលយើងសម្ងួតដោយគ្មានសារធាតុគីមី ហើយសុវត្ថិភាពទៀតផង។ ចំពោះការជ្រើសរើសបន្លែ និងផ្លែឈើសម្រាប់ជាគ្រឿងផ្សំវិញក៏យើងមានការប្រយ័ត្នដែរ ព្រោះជាធម្មតាគ្រឿងផ្សំខ្លះដាំនៅក្នុងដីហេតុនេះប្រសិនបើយើងមិនបានពិនិត្យឱ្យស្រួលទេនឹងមានបញ្ហាច្រើនដែលជាហេតុធ្វើឱ្យប៉ះពាល់ដល់សុខភាពអ្នកទទួលទាន។ ដើម្បីធានាពីភាពស្អាត យើងបានសហការជាមួយ Khmer Organic ដែលជាអ្នកផ្គត់ផ្គង់បន្លែ organic ដែលមានការទទួលស្គាល់ពីស្ថាប័នជំនាញត្រឹមត្រូវ។
សហស្ថាបនិកមួយរូបទៀត កញ្ញា ម៉ៅ សុជាតា ដែលជាអ្នកជំនាញផ្នែកគីមីចំណីអាហារដូចគ្នាដែរនេាះ បានលើកឡើងថា អាហារប្រភេទខ្មែរស៊ីរៀលនេះ ជាអាហារដែលផ្សំឡើងដោយយើងបានធ្វើការសាកល្បង និងស្ទង់មតិច្បាស់លាស់ពីមនុស្សជាច្រើនប្រភេទក្នុងប្រទេស។លក្ខណៈពិសេសរបស់អាហារនេះ ក្រៅពីការមិនប្រើប្រាស់សារធាតុគីមីដើម្បីរក្សាទុក និងជាបន្លែធម្មជាតិហើយនោះ វាក៏ជាផលិតផលខ្មែរដែលឆ្លើយតបទៅនឹងសេចក្តីត្រូវការរបស់ប្រជាជនខ្មែរយើង និងមានរសជាតិបែបខ្មែរយើងទៀតផង។ សម្រាប់ 1កញ្ចប់ យើងគ្រោងលក់ចេញក្នុងតម្លៃត្រឹមតែ 2,000រៀល ទៅ 2,500 រៀលប៉ុណ្ណោះ ហើយចំពោះប្រភេទកំប៉ុងវិញយើងគ្រោងលក់ចេញត្រឹមតែតម្លៃ 2,500រៀល ទៅ 3,000រៀល ដែលតម្លៃនេះធូរថ្លៃជាងអាហារស៊ីរៀលបរទេស 30%។
កញ្ញា ម៉ៅ សុជាតា បាននិយាយថា៖ “ទន្ទឹមនឹងមានគុណសម្បត្តិច្រើន យើងក៏មានបញ្ហាប្រឈមមួយចំនួនផងដែរលើការគាំទ្រពីសំណាក់ប្រជាជនខ្មែរ។ កន្លងមកប្រជាជនខ្មែរយើងមួយចំនួនហាក់មិនទាន់បើកចិត្តទូលាយ ឬទុកចិត្តលើផលិតផលខ្មែរនៅឡើយទេ ហេតុនេះខ្ញុំស្នើសុំឱ្យពួកគាត់ចាប់ផ្តើមបង្វែរគំនិតមកគិតថា បច្ចុប្បន្ននេះអ្នកជំនាញខ្មែរមួយចំនួនក៏អាចបង្កើតផលិតផលមិនចាញ់បរទេសដែរ ហើយម្យ៉ាងទៀតប្រសិនបើផលិតផលនោះមានការទទួលស្គាល់ពីក្រសួងជំនាញ និងស្ថាប័នវាយតម្លៃត្រឹមត្រូវ គាត់អាចគាំទ្របាន ចៀសវាងគាំទ្រផលិតផលដែលគ្មានការទទួលស្គាល់ ហើយវាយតម្លៃថា ផលិតផលទាំងអស់សុទ្ធតែមានបញ្ហា”។
កញ្ញា សុជាតា បានបញ្ជាក់ផងដែរថា យើងក៏នៅមានបញ្ហាខ្លះៗផងដែរជុំវិញការវេចខ្ចប់ ព្រោះពួកយើងជាអ្នកជំនាញចំណីអាហារ មិនទាន់មានសមត្ថភាពខ្លាំងក្នុងការបង្កើតការរចនាសម្បកខាងក្រៅឱ្យមើលទៅមានការទាក់ទាញខ្លាំងនៅឡើយ តែយើងនឹងព្យាយាមអភិវឌ្ឍបន្ថែមដើម្បីប្រកួតប្រជែងទាំងក្នុងទីផ្សារជាតិ និងជាគោលដៅចង់ប្រកួតប្រជែងជាមួយទីផ្សារក្នុងតំបន់ ដើម្បីឱ្យផលិតផលកសិកម្មខ្មែរកាន់តែមានសក្តានុពល។ យើងសង្ឃឹមថា គម្រោងផលិតផលិតផលអាហារដែលជាស្នាដៃខ្មែរនេះ នឹងទទួលបានការគាំទ្រពីប្រជាជនកម្ពុជានៅទូទាំងប្រទេស តែទោះជាយ៉ាងនេះក្តី ក៏ពួកយើងមានភាពរីករាយផងដែរដែលផលិតផលរបស់យើងបានទទួលចំណាត់ថ្នាក់លេខ1 ក្នុងការប្រកួតកម្មវិធី Techno Innovation នៃវិទ្យាស្ថានបច្ចេក-វិទ្យាកម្ពុជា (សាលាតិចណូ) ដែលនេះជាជំហានដំបូងដ៏សំខាន់មួយក្នុងការអភិវឌ្ឍឱ្យកាន់តែប្រសើរឡើង៕
